Manasse a Reyn war Yuda

1Manasse o dewdhek bloedh pan dhallathas reynya, hag ev a reynyas pymp blydhen ha hanter-kans yn Yerusalem. Hefsiba o hanow y vamm. 2Ev a wrug an pyth o drog yn golok an Arloedh, ow siwya gweythresow kasadow an kenedhlow a fesyas an Arloedh yn-mes a-dherag pobel Ysrael. 3Ev a dastrehevis an tylleryow ughel a dhistruis y das Hezekia; ev a dhrehevis alteryow dhe Baal, ev a wrug Ashera, dell wrussa Ahab myghtern Ysrael, gordhya oll lu nev, ha'ga servya. 4Ev a dhrehevis alteryow yn chi an Arloedh, may lavarsa an Arloedh anedha, ‘Yn Yerusalem y hworrav ow hanow.’ 5Ev a dhrehevis alteryow rag oll lu an nev y'n dhew klos chi an Arloedh. 6Ev a wre dh'y vab tremena dre dan; ev a wre dewinieth ha pystri, ha dyghtya nygromons ha pystrioryon. Ev a wrug meur a dhrog yn golok an Arloedh, orth y brovokya dhe sorr. 7Ev a settyas an imaj gravys a Ashera re wrussa y'n chi may leveris an Arloedh anodho dhe Davydh ha dh'y vab Solomon, ‘Y'n chi ma hag yn Yerusalem, re dhewisis mes a oll kordhow Ysrael, my a worr ow hanow bys vykken. 8Ny wrav vy arta diannedhi treys Ysrael yn-mes a'n wlas a res dh'aga thasow, mar kwaytyons gul herwydh pup-tra re worhemmynnis dhedha, ha herwydh oll an lagha a worhemmynnis ow gwas Moyses dhedha.’ 9Mes ny woslowsons; Manasse a's kammledyas may hwrussons moy drog ages an kenedhlow a dhistruis an Arloedh a-dherag tus Ysrael.

10An Arloedh a leveris der y wesyon an brofoesi, 11‘Drefenn Manasse, myghtern Yuda, dhe wul an taklow kasadow ma, ha dhe wul taklow gweth ages pup-tra a wrug an Amorysi esa kyns, ha gul dhe Yuda pegha ynwedh gans y idolys, 12rakhenna yndellma y lever an Arloedh, Duw Ysrael, My a dhre war Yerusalem ha Yuda kemmys droktra may hwra kosa diwskovarn pubonan a glew anodho. 13My a ystynn dres Yerusalem an gordenn-vusura usys rag Samaria, ha'n plemmik usys rag chi Ahab; my a rut Yerusalem glan kepar dell rutir skudell glan, orth hy rutya glan ha'y threylya penn a-woeles. 14My a forsak remenant ow ertach, ha'ga gorra yn leuv aga eskerens; i a wra mos ha bos preydh ha pyth ravnys gans aga eskerens oll, 15drefenn i dhe wul an pyth yw drog y'm golok ha dhe'm provokya dhe sorr, a-dhia'n jydh may teuth aga thasow yn-mes a Ejyp, hwath bys y'n jydh ma.’

16Hag ynwedh Manasse a skoellyas meur a woes gwiryon, bys pan lenwis ev Yerusalem a'n eyl penn dh'y gila, war-barth gans an pegh may hwrug ev dhe Yuda y begha, ow kul an pyth o drog yn golok an Arloedh.

17Gweythresow erell Manasse, pup-tra a wrug, ha'n pegh a wrug, a nyns yns i skrifys yn lyver kovadhow myghternedh Yuda? 18Manasse a goskas gans y dasow, hag a veu ynkleudhys yn lowarth y ji, yn lowarth Uzza. Hag Amon y vab a reynyas yn y le.

Amon a Reyn war Yuda

19Dew vloedh warn ugens o Amon pan dhallathas reynya, hag ev a reynyas diw vlydhen yn Yerusalem. Hanow y vamm o Meshullemeth, myrgh Harus a Yotba. 20Ev a wrug an pyth o drog yn golok an Arloedh, kepar dell wrussa y das Manasse. 21Ev a gerdhas yn oll an fordh may kerdhas y das, ha servya an imajys a servyas y das, ha'ga gordhya. 22Ev a asas an Arloedh, Duw y dasow, ha ny gerdhas yn fordh an Arloedh. 23Gwesyon Amon a vrassa er y bynn, ha ladha an myghtern yn y ji. 24Mes pobel an pow a ladhas pubonan re vrassa erbynn myghtern Amon, ha pobel an pow a wrug dhe Yosia y vab bos myghtern yn y le. 25An gweythresow erell a wrug Amon, a nyns yns i skrifys yn lyver kovadhow myghternedh Yuda? 26Ev a veu ynkleudhys yn y vedh yn lowarth Uzza: ha Yosia y vab a reynyas yn y le.