Yosia a Reyn war Yuda

1Eth bloedh o Yosia pan dhallathas reynya, hag ev a reynyas unnek blydhen warn ugens yn Yerusalem. Yedida o hanow y vamm, myrgh Adaya a Boskath. 2Ev a wrug an pyth o ewn yn golok an Arloedh, ha kerdhes yn fordh Davydh y das, ha ny dreylyas a-denewen dhe'n dyghow na dhe'n kledh.

Hilkia a Gyv Lyver an Lagha

3Y'n etegves blydhen a vyghtern Yosia, an myghtern a dhannvonas Shafan mab Asalia mab Meshullam, an skrifwas, dhe ji an Arloedh, ow leverel, 4‘Ke yn-bann dhe Hilkia an arghoferyas, ha gwra dhodho rekna oll sommenn an arghans dres a-berth yn chi an Arloedh, re guntellas gwithysi an treudhow a-dhiworth an bobel; 5delivrens e yn leuv an re a worvir an ober yn chi an Arloedh; delivrens e dhe'n weythoryon usi yn chi an Arloedh orth y ewnhe, 6dhe'n seri prenn, dhe'n dhrehevoryon, dhe'n seri men; rag prena prenn ha men nedhys rag ewnhe an chi. 7Byttegyns na vedhes akont govynnys orta a'n arghans a veu delivrys yn aga leuv, drefenn i dhe dhyghtya yn onest.’

8Hilkia an arghoferyas a leveris dhe Shafan an skrifwas, ‘My re gavas lyver an lagha yn chi an Arloedh.’ Ha Hilkia a ros an lyver dhe Shafan hag ev a'n redyas. 9Ena Shafan an skrifwas a dheuth dhe'n myghtern, ha derivas dhe'n myghtern, ‘Agas gwesyon re guntellas an arghans a veu kevys y'n chi, hag i re'n delivras yn leuv an weythoryon apoyntys dhe worvires yn chi an Arloedh.’ 10Ena Shafan an skrifwas a dherivas dhe'n myghtern ow leverel, ‘Hilkia an oferyas re ros lyver dhymm.’ Ha Shafan a'n lennas a-rag an myghtern.

11Pan glewas an myghtern geryow lyver an lagha, ev a skwardyas y dhillas. 12An myghtern a worhemmynnis dhe Hilkia an oferyas, hag Ahikam mab Shafan, hag Akbor mab Mikaya, ha Shafan an skrifwas, hag Asaya gwas a'n myghtern, ow leverel, 13‘Kewgh ha hwilewgh dhiworth an Arloedh ragov, rag an bobel, ha rag oll Yuda, a-dro dhe eryow an lyver ma re beu kevys; rag bras yw sorr an Arloedh re beu enowys er agan pynn, drefenn na woslowas agan tasow orth geryow an lyver ma, dhe wul pup-tra herwydh an pyth yw skrifys a-dro dhyn.’

14Ytho Hilkia an oferyas, Ahikam, Akbor, Shafan, hag Asaya eth dhe Hulda an brofoeses, gwreg Shallum mab Tikva mab Harhas, gwithyas an dhillasva; yth esa hi trigys yn Yerusalem y'n Nessa Kwartron, hag i a gewsis orti. 15Hi a leveris dhedha, ‘Yndellma y lever an Arloedh, Duw Ysrael: Leverewgh dhe'n gour a'gas dannvonas, 16Yndellma y lever an Arloedh, My a dhre drog war an tyller ma, ha war y annedhysi, herwydh oll geryow an lyver re redyas myghtern Yuda, 17drefenn i dhe'm forsakya ha leski offrynnow dhe dhuwow erell, ow provokya ow sorr gans oll oberow aga diwla; rakhenna ow honnar a vydh enowys erbynn an tyller ma, ha ny vydh difeudhys. 18Mes yndella hwi a lever dhe vyghtern Yuda a'gas dannvonas dhe hwilas dhiworth an Arloedh: Yndellma y lever an Arloedh, Duw Ysrael: A-dro dhe'n geryow re glewsys, 19drefenn bos dha golonn medhel, ha ty dhe vos uvel a-dherag an Arloedh, pan glewsys an pyth a leveris vy erbynn an tyller ma, hag erbynn y annedhysi, mayth ellens ha bos euth ha molleth, ha skwardya dha dhillas, hag oela a-dheragov, my ynwedh re glewas, a lever an Arloedh. 20Otta, ytho, my a'th kuntell dhe'th tasow, ha ty a vydh kuntellys a-berth y'th vedh yn kres; ny wra dha dhewlagas gweles oll an drog a dhrov war an tyller ma.’ I a dhros an messaj dhe'n myghtern arta.