Dasfurvyans Yosia

1Ena an myghtern a dhannvonas ger hag a guntellas dhodho oll henavogyon Yuda hag a Yerusalem. 2An myghtern eth yn-bann dhe ji an Arloedh, hag oll gwer Yuda hag oll annedhysi Yerusalem ganso, ha'n oferysi, ha'n brofoesi, hag oll an bobel byghan ha bras; hag ev a lennas yn aga diwskovarn oll geryow lyver an kevambos re bia kevys yn chi an Arloedh. 3An myghtern a sevis ryb an goloven ha gul kevambos a-dherag an Arloedh, dhe holya an Arloedh, dhe witha y worhemmynnow ha'y dhustuniow ha'y ordenansow gans oll aga holonn hag oll aga enev, dhe fastya geryow an kevambos ma a veu skrifys y'n lyver ma. Hag oll an bobel a sevis y'n kevambos.

4An myghtern a worhemmynnis dhe Hilkia an arghoferyas, ha'n isarghoferyas,23:4 isarghoferyas: Ow siwya an Targum. ha gwithysi an treudhow, may trollens mes a dempel an Arloedh oll an daffar a veu gwrys rag Baal, ha rag Ashera, ha rag oll lu an nev; ev a's loskas a-ves dhe Yerusalem yn gwelyow Kidron, ha doen aga lusu dhe Bethel. 5Ev a bellhas an oferysi bagan apoyntys gans myghternedh Yuda dhe leski sakrifisow y'n tylleryow ughel yn sitys Yuda ha kyrghynn Yerusalem; hag ynwedh an re a offrynna sakrifisow dhe Baal, dhe'n howl, dhe'n loer, dhe doknys an stergylgh ha dhe oll lu an nev. 6Ev a gemmeras an Ashera dhiworth chi an Arloedh a-ves dhe Yerusalem, dhe nans Kidron, ha'y leski yn nans Kidron, ha'y brewi dhe dhoust ha tewlel hy doust war ynkleudhva an werin. 7Ev a dorras dhe'n leur chiow an horys-tempel worow esa yn chi an Arloedh, le mayth esa an benynes ow kwia dillas rag Ashera. 8Ev a dhros oll an oferysi yn-mes a sitys Yuda, ha defola an tylleryow ughel may losksa an oferysi sakrifisow, dhiworth Geba bys Beer-sheba; ev a dorras dhe'n leur tylleryow ughel an yetow esa orth entrans yet Yoshua, governour an sita, esa a'n kledh orth yet an sita. 9Byttegyns ny dho oferysi an tylleryow ughel bys yn alter an Arloedh yn Yerusalem, mes i a dhybri an bara heb goell yn mysk aga brederedh. 10Ev a dhefolas Tofeth usi yn nans Ben-hinnom, ma na wrella denvyth dhe vab po dhe vyrgh tremena dre dan avel offrynn dhe Molek. 11Ev a bellhas an vergh re rosa myghternedh Yuda yn enor a'n howl, orth entrans chi an Arloedh, ryb chambour Nathan-melek an spadhesik, esa y'n portal; hag ev a loskas charettow an howl gans tan. 12An myghtern a dorras dhe'n dor an alteryow war an to ryb chambour gwarthav Ahaz gwrys gans myghternedh Yuda, ha'n alteryow gwrys gans Manasse yn dew glos chi an Arloedh; ev a's tennas dhe'n leur ha'ga brewi dhe dhoust ha tewlel aga doust yn nans Kidron. 13An myghtern a dhefolas an tylleryow ughel a'n est dhe Yerusalem, a'n soth dhe venydh an Distruyans, drehevys gans Solomon myghtern Ysrael rag Ashtoreth, mostedhes an Sidonysi, rag Kemosh, mostedhes Moab, ha rag Milkom, mostedhes an Ammonysi. 14Ev a vrewis an peulveyn, ha treghi dhe'n dowr an Asherim, ha lenwel aga thylleryow a eskern denel.

15Ynwedh ev a dennas dhe'n dor an alter yn Bethel, an tyller ughel gwrys gans Yeroboam mab Nebat, a wrug dhe Ysrael pegha, an alter na hag ynwedh an tyller ughel. Ev a loskas an tyller ughel, orth y vrewi dhe dhoust; ynwedh ev a loskas an Ashera. 16Yosia a dreylyas ha gweles an bedhow esa ena war an vre, hag ev a dhannvonas tus dhe gemmeres an eskern dhiworth an bedhow ha'ga leski war an alter ha'y defola, herwydh ger an Arloedh kewsys gans gour Duw, a dharganas an taklow ma. 17Ev a wovynnas, ‘Pyth yw an men-kov a welav?’ Gwer an sita a leveris dhodho, ‘Bedh an profoes a dheuth dhiworth Yuda neb a dharganas an taklow ma re wrussys erbynn an alter yn Bethel’. 18Ev a leveris, ‘Gesewgh e dhe bowes; na ankresyes denvyth y eskern’. Ytho i a asas y eskern, war-barth gans eskern an profoes a dheuth dhiworth Samaria. 19Yosia a removas ynwedh chiow an tylleryow ughel esa yn sitys Samaria, gwrys gans myghternedh Ysrael, ow provokya sorr an Arloedh; ev a wrug dhedha kepar dell wrussa yn Bethel. 20Ev a ladhas war an alteryow oll oferysi an tylleryow ughel esa ena, ha leski eskern denel warnedha. Ena ev a dhehwelis dhe Yerusalem.

Solempnys yw an Pask

21An myghtern a worhemmynnis dhe oll an bobel, ow leverel, ‘Gwithewgh an pask dhe'n Arloedh agas Duw dell yw skrifys yn lyver an kevambos ma.’ 22Yn sur ny veu gwithys pask a'n par na a-dhia dhydhyow an vreusysi a vreusi Ysrael, nag yn oll dydhyow myghternedh Ysrael, na myghternedh Yuda; 23mes y'n etegves blydhen a vyghtern Yosia, an pask ma a veu gwithys dhe'n Arloedh yn Yerusalem.

24Hwath pella, Yosia a dhistruis an nygromonsoryon, an goelyogyon, an terafim, an imajys, hag oll an taklow kasadow a veu gwelys yn pow Yuda hag yn Yerusalem. Yndella ev a fastyas geryow an lagha o skrifys y'n lyver a gavas Hilkia an oferyas yn chi an Arloedh. 25Kyns ev, nyns esa myghtern kepar hag ev, neb a dreylyas dhe'n Arloedh a leun golonn, ha gans oll y enev, ha gans oll y nerth, herwydh oll lagha Moyses; ha ny sevis onan kepar hag ev a'y wosa.

26Hwath ny dreylyas an Arloedh dhiworth fellder y sorr bras, a dhewis erbynn Yuda, drefenn oll an taklow re wrussa Manasse dhe brovokya y sorr. 27An Arloedh a leveris, ‘My a gemmer Yuda ynwedh yn-mes a'm golok, kepar dell gemmeris Ysrael yn-mes; ha my a skon an sita ma a dhewisis, Yerusalem, ha'n chi a leveris vy anodho, ow hanow a vydh ena.’

Yosia a Verow yn Batel

28Gweythresow erell Yosia, ha pup-tra a wrug, a nyns yns i skrifys yn lyver kovadhow myghternedh Yuda? 29Yn y dhydhyow, Faro Neko myghtern Ejyp eth yn-bann dhe weres myghtern Assyria orth avon Ewfrates. Myghtern Yosia eth dhe vetya orto yn batel; mes pan vetyas Faro Neko orto yn Megiddo, ev a'n ladhas. 30Y wesyon a'n dug, marow, yn charett dhiworth Megiddo dhe Yerusalem, ha'y ynkleudhyas yn y vedh y honan. Pobel an tir a gemmeras Yehoahaz mab Yosia, ha'y untya ha'y wul myghtern yn le y das.

Reyn ha Kethneth Yehoahaz

31Yehoahaz o tri bloedh warn ugens pan dhallathas reynya, hag ev a reynyas tri mis yn Yerusalem. Hanow y vamm o Hamutal myrgh Yeremia a Libna. 32Ev a wrug an pyth o drog yn golok an Arloedh, poran kepar dell wrug y dasow. 33Faro Neko a'n prisonyas yn Ribla yn pow Hamath, ma na allo reynya yn Yerusalem, hag ev a veghyas an tir gans trubyt a gans talent a arghans ha talent a owr. 34Faro Neko a wrug dhe Elyakim mab Yosia bos myghtern yn le y das Yosia, ha chanjya y hanow dhe Yehoyakim. Mes ev a gemmeras Yehoahaz dhe-ves; ev a dheuth dhe Ejyp ha merwel ena. 35Yehoyakim a ros an arghans ha'n owr dhe Faro, ow korra toll war an tir rag ri an arghans dhe Faro dhe vetya y worholedh. Ev a guntellas an arghans ha'n owr dhiworth pub gour herwydh y dalvosegyans, rag aga ri dhe Faro Neko.

Yehoyakim a Reyn War Yuda

36Pymp bloedh warn ugens o Yehoyakim pan dhallathas reynya, hag ev a reynyas unnek blydhen yn Yerusalem. Hanow y vamm o Zebida, myrgh Pedaya a Ruma. 37Ev a wrug an pyth o drog yn golok an Arloedh, herwydh pup-tra a wrussa oll y dasow.