Koedh Ha Kethneth Yuda

11 Rakhenna yn nawves blydhen y reyn, y'n degves mis, yn degves dydh an mis, Nebukadnessar, myghtern Babylon a dheuth, ev hag oll y lu, erbynn Yerusalem, hag omsettya orti; hag i a dhrehevis gweyth esedhva er hy fynn war bub tu. 2An esedhva a veu gorrys a-dro dhe'n sita bys y'n unnegves blydhen a vyghtern Sedekia. 3Yn nawves dydh an peswora mis an divoetter eth ha bos mar sevur ma nag esa boes rag bobel an tir. 4Ena aswa a veu gwrys yn fos an sita. Oll an soudoryon eth yn-mes25:4 eth yn-mes: Ow siwya an Septuagint. y'n nos der an yet yntra diw fos, ogas dhe lowarth an myghtern, ha'n Kaldeanys ow kyrghynna an sita. I eth war an fordh troha'n Araba. 5Mes lu an Kaldeanys a helghyas an myghtern, ha'y dremena yn plenys Yeriko; oll y lu a veu keskerys dhiworto. 6I a sesyas an myghtern ha'y dhri dhe vyghtern Babylon yn Ribla, ha breus a veu res warnodho. 7I a ladhas mebyon Sedekia a-dherag y dhewlagas; ena genna yn-mes dewlagas Sedekia; i a'n golmas yn kargharow a vrons ha'y dhri dhe Babylon.

8Y'n pympes mis, yn seythves dydh an mis, hag yw an nownsegves blydhen a vyghtern Nebukadnessar myghtern Babylon, y teuth Nebuzaradan, kapten an gorfwythysi, gwas myghtern Babylon, dhe Yerusalem. 9Ev a loskas chi an Arloedh, ha chi an myghtern, hag oll chiow Yerusalem; pub chi bras ev a loskas gans tan. 10Oll lu an Kaldeanys, esa gans kapten an gorfwithysi, a dorras an fosow a-dro dhe Yerusalem. 11Nebuzaradan, kapten an withysi, a dhug yn divroedh remenant an bobel o gesys y'n sita, ha'n gilfowesigyon re gilfisa dhe vyghtern Babylon, oll remenant an routh. 12Mes kapten an withysi a asas re a voghosekka tus an tir dhe vos gonedhysi gwinlannow ha gonedhysi tir.

13An kolovenyow a vrons esa yn chi an Arloedh, ha'n synsellow, ha'n mor a vrons esa yn chi an Arloedh, an Kaldeanys a dorras yn temmyn, ha doen oll an brons dhe Babylon. 14I a gemmeras dhe-ves an kalteryow, an reuvow, an gwelsigow-porv, an basonyow rag ynkys, hag oll an lestri a vrons devnydhys yn gonis an tempel, 15an padellow-tan, ha'n basonyow. Taklow gwrys a owr kapten an withysi a gemmeras rag an owr, ha taklow gwrys a arghans, rag an arghans. 16An dhiw goloven, an unn mor, ha'n karrigellow gwrys gans myghtern Solomon rag chi an Arloedh – an brons a oll an taklow ma o dres poesa. 17Ughelder an eyl koloven o etek kevelin, ha warnedhi yth esa penn a vrons; ughelder an penn o tri hevelin; roesweyth ha greunavalow, oll a vrons, a gylghyas penn an goloven. An nessa koloven a's tevo an keth, gans greunavalow.

18Kapten an withysi a gemmeras Seraya an arghoferyas, Sefania an isarghoferyas, ha tri gwithyas a'n treudhow. 19A-dhiworth an sita ev a gemmeras unn spadhesik re bia kaslewydh an vreselyoryon, ha pymp gour a gonsel an myghtern a veu kevys y'n sita; ha pennskrifennyas kaslewydh an lu neb a'n jevo charj a elwel pobel an tir yn-bann dhe'n lu; ha tri-ugens gour a bobel an tir a veu kevys a-ji dhe'n sita. 20Nebuzaradan kapten an withysi a's kemmeras, ha'ga dri dhe vyghtern Babylon yn Ribla. 21Myghtern Babylon a's gweskis, ha'ga gorra dhe'n mernans yn Ribla yn pow Hamath. Ytho Yuda eth yn divroedh yn-mes a'y dir.

Gedalia Gwrys Governour Yuda

22Ev a apoyntyas Gedalia mab Ahikam mab Shafan avel governour war an bobel gesys yn pow Yuda gans Nebukadnessar myghtern Babylon. 23Pan glewas oll kaptenyon an luyow ha'ga gwer myghtern Babylon dhe apoyntya Gedalia avel governour, i a dheuth gans aga gwer dhe Gedalia yn Mispa: Yshmael mab Nethania, Yohanan mab Kareagh, Seraya mab Tanhumeth an Netofathyas, ha Yaazania mab an Maakathyas. 24Gedalia a wrug ti dhedha ha dh'aga gwer, ow leverel, ‘Na borthewgh own a soedhogyon an Kaldeanys; annedhewgh y'n tir, servyewgh myghtern Babylon, hag y fydh da genowgh.’ 25Mes y'n seythves mis, Yshmael mab Nethania mab Elishama, a'n teylu ryel, a dheuth gans deg den; i a weskis Gedalia may ferwis, war-barth gans an Yedhewon ha'n Kaldeanys esa ganso yn Mispa. 26Ena oll an bobel, ughel hag isel, ha kaptenyon an luyow eth yn-mes ha mos dhe Ejyp; rag yth esa own dhedha a'n Kaldeanys.

Yehoyakin Livrys dhiworth Prison

27Y'n seytegves blydhen warn ugens a dhivroedh Yehoyakin myghtern Yuda, y'n dewdhegves mis, y'n pympes dydh warn ugens a'n mis, Evil-merodak myghtern Babylon, y'n vlydhen may tallathas reynya, a livras myghtern Yehoyakin dhiworth prison; 28ev a gewsis dhodho yn kuv, ha ri dhodho esedh a-ugh esedhow an vyghternedh erell esa ganso yn Babylon. 29Ytho Yekoyakin a worras a-denewen y dhillas prison. Pub dydh a'y vewnans ev a dhybri a-dherag an myghtern. 30Rag y ventons, alowans pub-dydhyek a veu res dhodho gans an myghtern hedre ve bew.