Elisha hag Oyl an Wedhwes

1Unn venyn yn mysk gwragedh mebyon an brofoesi a grias dhe Elisha ow leverel ‘Marow yw dha was, ow gour, ha ty a woer dha was dhe berthi own a'n Arloedh. Lemmyn kresysor re dheuth rag kemmeres ow dew vab rag bos y gethyon.’ 2Elisha a leveris dhedhi, ‘Pandr'a wrav ragos? Lavar dhymm, pyth a'th eus y'th chi?’ Ha hi a leveris, ‘Nyns eus travyth dhe'th vaghteth y'n chi, marnas jarrik a oyl.’ 3Ena ev a leveris, ‘Ke yn-mes ha chevisya lestri dhiworth oll dha gentrevogyon, lestri gwag, ha na vedhens nebes. 4Pan dheus a-ji, dege an daras war dha lergh ha war-lergh dha fleghes; ha dinow dhiworth dha jarrik yn oll an lestri, ha dell vons lenwys gorr i a-denewen.’ 5Ytho hi eth a-dhiworto ha degea an daras war hy lergh ha war-lergh hy mebyon. I a dhros an lestri dhedhi ha hi a dhinewis. 6Pan o an lestri leun, yn-medh hi dh'y mab, ‘Dro dhymm unn lester moy.’ Hag ev a leveris dhedhi, ‘Nyns eus lester moy.’ Ena an oyl a astelas resek. 7Hi a dheuth ha leverel dhe wour Duw, hag ev a leveris, ‘Ke, gwerth an oyl ha tyli an gendon, ha ty ha dha mebyon a yll bewa orth an remenant.’

Elisha a Dhrehav Mab an Shunammyades

8Unn jydh yth esa Elisha ow tremena dre Shunem hag yth esa benyn wolusek ena a ynnia warnodho dybri bara. Ytho peskweyth may tremena ev dredhi, ev a dreylya di rag dybri bara. 9Yn-medh hi dh'y gour, ‘My a woer an den usi prest ow tremena omma bos gour sans a Dhuw. 10Gwren, my a'th pys, chambour-to byghan gans parosyow, ha gorra ena ragdho gweli, moes, kador ha lugarn may hallo treylya di pan dheu ev dhyn.’

11Unn jydh pan dheuth ev di, hag ev a dreylyas y'n chambour ha growedha ena, 12ev a leveris dhe Gehazi, y was, ‘Galw orth an Shunammyades ma.’ Pan elwis dhedhi, hi a sevis a-ragdho. 13Ev a leveris dhodho, ‘Lavar dhedhi lemmyn, “Ty re'gan gwithas gans an bern ma; pyth a yll bos gwrys ragos? A vynnydh ger dhe vos kewsys a-barth dhis dhe'n myghtern po dhe gapten an lu?” ’ Hi a worthybis, ‘Trigys esov yn mysk ow fobel ow honan.’ 14Ev a leveris, ‘Ytho pyth a yll bos gwrys rygdhi?’ Ha Gehazi a worthybis, ‘Dhe wir, nyns eus mab dhedhi, ha koth yw hy gour.’ 15Ev a leveris, ‘Galw orti.’ Ytho ev a elwis dhedha, ha hi a sevis y'n daras. 16Ev a leveris, ‘Y'n seson ma, an termyn ma y'n vlydhen a dheu, ty a wra byrla mab.’ Ha hi a leveris, ‘Na, ow arloedh, ty wour Duw, na wowlever dhe'th vaghteth.’

17An venyn a omdhuk, ha dineythi mab y'n seson na, y'n termyn na, dell lavarsa Elisha dhedhi.

18Wosa an flogh dhe devi, ev eth yn-mes unn jydh dh'y das esa gans an vysoryon. 19Ev a leveris dh'y das, ‘Ow fenn, ow fenn!’ An tas a leveris dhe'n gwas, ‘Dog e dh'y vamm.’ 20Ev a'n drehevis, ha'y dhri dh'y vamm, hag ev a esedhas war hy dewlin bys yn hanter-dydh, hag ena merwel. 21Hi eth yn-bann, ha'y worra war gweli gour Duw, ha degeas an daras, ha mos yn-mes. 22Ha hi a elwis orth hy gour ha leverel, ‘Dannvon dhymm, my a'th pys, onan a'n wesyon hag onan a'n asenes, may hylliv poenya dhe wour Duw ha dehweles.’ 23Hag ev a leveris, ‘Prag y fynnydh mos dhodho hedhyw? Nyns yw na loer nowydh na sabot.’ Ha hi a leveris, ‘Y fydh da.’ 24Hi a dhibras an asen ha leverel dh'y gwas, ‘Ke yn-kerdh; na wra lenthe marnas my a lever dhis.’ 25Hi a dhibarthas ha dos dhe wour Duw, dhe venydh Karmel.

Pan y's gwelas gour Duw a-bell, yn-medh ev dhe Gehazi y was, ‘Otta, an Shunammyades; 26poen, my a'th pys, dhe vetya orti ha leverel dhedhi, Osta yn poynt da? Usi dha wour yn poynt da? Usi dha flogh yn poynt da?’ Hi a worthybis, ‘Yn poynt da.’ 27Pan dheuth hi dhe wour Duw, dhe'n venydh, hi a synsis y dreys. Gehazi a dheuth nes rag hy herdhya dhe-ves. Mes gour Duw a leveris, ‘Gas hi, hwerow yw hy enev; an Arloedh re'n kudhas a-dhiworthiv ha ny'n leveris dhymm.’ 28Ena hi a leveris, ‘A wovynnis vy mab orth ow arloedh? A ny leveris vy, “Na'm toell”?’ 29Ena ev a leveris dhe Gehazi, ‘Grogys dha dhiwglun, ha kemmer ow lorgh y'th dorn, ha ke. Mar metydh orth nebonan, na'n salus, ha mar kwra nebonan dha salusi, na worthyp dhodho; ha gorr ow lorgh war fas an flogh.’ 30Mes mamm an flogh a leveris, ‘Dell vew an Arloedh, ha dell vew dha enev, ny wrav dha asa.’ Ytho ev a sevis ha'y siwya. 31Gehazi eth a-dherag ha gorra an lorgh war fas an flogh; mes nyns esa na lev na klewes. Rakhenna ev a dhehwelis rag metya orto ha derivas dhodho, ow leverel, ‘Ny dhifunas an flogh.’

32Pan dheuth Elisha y'n chi, otta, marow o an flogh, ow krowedha war y weli. 33Ev eth a-ji ha degea an daras orta aga dew ha pysi an Arloedh. 34Ev eth war an gweli ha growedha war an flogh, ha gorra y anow war y anow, ha'y dhewlagas war y dhewlagas, ha'y dhiwdhorn war y dhiwdhorn; hag ev a omystynnas warnodho ha kig an flogh eth ha bos toemm. 35Ena ev a sevis ha kerdhes y'n chi yn-rag ha war-dhelergh, ha mos war an gweli hag omystynn warnodho; ha'n flogh a striwis seythgweyth ha'n flogh a igoras y dhewlagas. 36Ev a elwis orth Gehazi ha leverel, ‘Galw an Shunammyades ma.’ Ytho ev a elwis orti. Pan dheuth hi a-bervedh dhodho ev a leveris, ‘Kemmer dha vab.’ 37Hi a dheuth ha koedha orth y dreys hag omblegya dhe'n dor, ha kemmeres hy mab, ha mos yn-mes.

Elisha a Burha an Galter a Vros

38Elisha a dheuth arta dhe Gilgal hag yth esa divoetter y'n pow. Pan esa mebyon an brofoesi owth esedha a-ragdho, yn-medh ev dh'y was, ‘Gorr an galter veur war an tan ha bryjyon bros rag mebyon an brofoesi.’ 39Onan anedha eth yn-mes y'n gwel rag kuntell erbys hag ev a gavas gwinbrenn gwyls hag ev a guntellas dhiworto barrlennas a bompyons gwyls, ha dos ha'ga divyn a-berth y'n galter a vros, heb godhvos an pyth ens. 40Ytho i a'n diveris rag an wer dh'y dhybri. Mes pan dhallathsons dybri an bros, i a krias, ‘Yma mernans y'n galter, a wour Duw.’ Ha ny yllens y dhybri. 41Ena ev a leveris, ‘Drewgh bleus.’ Hag ev a'n tewlis y'n galter ha leverel, ‘Diver e rag an bobel may hallens dybri.’ Ha nyns esa dregynn y'n galter.

Elisha a Vag Kans Den

42Gour a dheuth dhiworth Baal-shalisha, hag ev a dhros dhe wour Duw bara a'n kynsa frutys, ugens torth a heydh ha pennow-ys glas yn y sagh. Elisha a leveris, ‘Roy hemma dhe'n bobel may hallons dybri.’ 43Y was a leveris, ‘Fatell allav settya hemma a-rag kans den?’ Hag ev a leveris, ‘Roy hemma dhe'n bobel may hallons dybri, rag yndellma y lever an Arloedh, “I a wra dybri ha gasa tamm.” ’ 44Ytho ev a'n settyas a-ragdha, hag i a dhybris, ha gasa tamm, herwydh ger an Arloedh.