Yaghheans Naaman

1Naaman, kapten lu myghtern Aram, o gour meur a-rag y vester, hag enoradow drefenn an Arloedh dhe ri budhogoleth dredho dhe Aram. An gour o kasor galloesek, mes klavorek. 2Ha galsa Aram yn-mes yn bagasow ha kemmeres yn kethneth moren vyghan a-dhiworth pow Ysrael, ha hi a servya gwreg Naaman. 3Hi a leveris dh'y mestres, ‘Unnweyth a pe ow arloedh gans an profoes usi yn Samaria! Ev a'n yaghhasa a'y lovryjyon.’ 4Ytho Naaman eth ha derivas dh'y arloedh, ow leverel ‘Yndella y leveris an voren dhiworth pow Ysrael.’ 5Myghtern Aram a leveris, ‘Ke yn-rag ha my a dhannvon lyther dhe vyghtern Ysrael.’ Naaman a dhibarthas ha kemmeres ganso deg talent a arghans, ha hwegh mil shekel ha deg chanj a dhillas.

6Ev a dhros an lyther dhe vyghtern Ysrael, hag ynno, ‘Gans an lyther ma, my re dhannvonas Naaman ow gwas dhis, may hylli y yaghhe a'y lovryjyon.’ 7Wosa redya an lyther, myghtern Ysrael a skwardyas y dhillas ha leverel, ‘Ov Duw, dhe ri mernans po bewnans, may tannvon an den ma ger dhymm rag yaghhe gour a'y lovryjyon? Mirewgh fatell usi ev ow hwilas kedrynn genev.’

8Pan glewas Elisha, gour Duw, myghtern Ysrael dhe skwardya y dhillas, ev a dhannvonas messaj dhe'n myghtern ow leverel, ‘Prag y skwardsys dha dhillas? Des lemmyn dhymm hag ev a wra godhvos bos profoes yn Ysrael.’ 9Ytho Naaman a dheuth gans y vergh ha gans y jarettow, ha gortos orth daras chi Elisha. 10Elisha a dhannvonas kannas dhodho, ow leverel, ‘Ke hag omwolghi y'n Yordan seythgweyth, ha dha gig a vydh asverys ha ty a vydh glan.’ 11Mes Naaman o serrys hag eth dhe-ves ha leverel, ‘My a grysi y teffa ev dhymm yn sur, ha sevel, ha gelwel war anow an ARLOEDH, ha gweskel y dhorn a-ugh an tyller ha yaghhe an lovryjyon. 12A nyns yw Abana ha Farpar, avonyow Damaskus, gwell ages oll an dowrow yn Ysrael? A ny allav omwolghi ynna ha bos glann?’ Ytho ev a dreylyas ha mos dhe-ves yn konnar. 13Mes y wesyon a dheuth dhodho ha leverel, ‘Ow thas, mara'th pyssa an profoes a wul neppyth kales, a ny wrusses y wul? Pygemmys moy pan lever ev dhis, “Omwolgh ha bydh glann”?’ 14Ena ev a dhiyskynnas hag omdroghya seythgweyth y'n Yordan, herwydh lavar gour Duw; ha'y gig a veu asverys kepar ha kig fleghik, ha glann o ev.

15Ena ev a dhehwelis dhe wour Duw, ev hag oll y gowethas, ha dos ha sevel a-ragdho ha leverel, ‘Lemmyn my a woer nag eus Duw yn oll an norvys, marnas yn Ysrael. Lemmyn kemmer, my a'th pys, ro dhiworth dha was.’ 16Mes ev a leveris, ‘Dell vew an Arloedh, a savav a-ragdho, ny dhegemmerav travyth.’ Ev a ynnias warnodho y gemmeres, mes ev a's naghas. 17Ena Naaman a leveris, ‘Mar ny gemmerydh, my a'th pys, bedhes res dhe'th was kemmys dor hag yw begh dew vul, rag ny wra dha was offrynna nevra namoy offrynn leskys na sakrifis dhe dhuwow erell, saw dhe'n Arloedh. 18Re affo an Arloedh dha was y'n mater ma: pan dheu ow mester yn chi Rimmon rag gordhya ena, ow poesa war ow bregh, ha my a ombleg yn chi Rimmon – pan omblegyav yn chi Rimmon, re affo an Arloedh dha was y'n mater ma.’ 19Ev a leveris dhodho, ‘Ke yn kres.’

Pithneth Gehazi

Mes wosa ev dhe vos gyllys dhiworto pellder byghan, 20Gehazi, gwas Elisha, gour Duw, a leveris dh'y honan, ‘Ow mester re sparyas Naaman an Aramyas ma, drefenn na dhegemmeras dhiworth y dhiwla an pyth a brofyas ev. Dell vew an Arloedh, my a wra poenya war y lergh ha kemmeres neppyth a-dhiworto.’ 21Ytho Gehazi a fyskis war-lergh Naaman. Ha Naaman, pan welas nebonan ow poenya war y lergh, a dhiyskynnas dhiworth an charett rag metya orto ha leverel, ‘Yw pup-tra da?’ 22Gehazi a leveris, ‘Da yw pup-tra. Ow mester re'm dannvonas, ow leverel, “Otta, nammnygen y teuth dhymm dhiworth bro venydhyek Efraym dew gour yowynk a vebyon an brofoesi; roy dhedha, my a'th pys, talent a arghans ha dew janj a dhillas.” ’ 23Naaman a leveris, ‘Bedhes plegadow dhis kemmeres dew dalent.’ Ev a ynnias warnodho, ha kelmi dew dalent a arghans yn dew sagh, gans dew janj a dhillas, ha'ga ri dhe dhew a'y wesyon; hag i a's dug a-ragdho. 24Ha pan dheuth ev dhe vre an sita ev a's kemmeras dhiworth aga diwla ha'ga gorra y'n chi; hag ev a's gasas dhe vos, hag i a dhibarthas.

25Ev eth a-ji ha sevel a-rag y vester; hag Elisha a leveris dhodho, ‘A-ble osta devedhys, Gehazi?’ Yn-medh ev, ‘Nyns eth dha was neb tyller vytholl.’ 26Mes ev a leveris dhodho, ‘A nyns eth ow holonn genes, pan dreylyas an gour dhiworth y jarett rag metya orthis? Yw hemma an termyn rag kemmeres arghans, ha rag kemmeres dillas, hag olewbrennyer, ha gwinbrennyer, ha deves, hag oghen, ha gwesyon ha maghtethyon? 27Rakhenna lovryjyon Naaman a wra glena dhis, ha dhe'th hasenn bys vykken.’ Hag ev eth yn-mes klavorek dhiworth y lok, mar wynn avel an ergh.