Marthus Penn an Voel

1Mebyon an brofoesi a leveris dhe Elisha, ‘Mir lemmyn, an tyller le may trigyn genes yw re vyghan ragon. 2Deun, ni a'th pys, dhe'n Yordan, ha kemmeres pub gour keber, ha gwren tyller ena may hyllyn triga ynno.’ Ev a worthybis, ‘Kewgh.’ 3Ena onan anedha a leveris, ‘Bedhes plegadow dhis dos gans dha wesyon.’ Ev a worthybis, ‘My a wra mos.’ 4Ytho, ev eth gansa. Ha pan dheuthons dhe'n Yordan i a droghas gwydh. 5Mes, hag onan ow kul keber dhe goedha, penn an voel a goedhas y'n dowr; ev a armas ha leverel, ‘Soweth, a vester! Rag chevisys veu.’ 6Gour Duw a leveris, ‘Ple koedhas?’ Hag ev a dhiskwedhas dhodho an tyller. Ev a droghas gwelenn, ha'y thewlel di, ha henna a wrug dhe'n horn neuvella. 7Yn-medh ev, ‘Kemmer e.’ Hag ev a ystynnas y leuv ha'y gemmeres.

Lettys yw Omsettyans Aram

8Pup-prys pan esa myghtern Aram ow kwerrya erbynn Ysrael ev a omgusulya gans y wesyon, ow leverel y fedha y gamp yn neb tyller po arall. 9Mes gour Duw a dhannvonas messaj dhe vyghtern Ysrael, ow leverel, ‘Bydh war na dremenydh an tyller na; rag yma Aram ow mos ena.’ 10Myghtern Ysrael a dhannvonas messaj dhe'n tyller a gewsis gour Duw a-dro dhodho. Moy ages unn po diwweyth ev a'n gwarnyas; yth ev a veu hewoel ena.

11Ytho pur droblys o kolonn myghtern Aram drefenn hemma; ev a elwis y wesyon ha leverel dhedha, ‘A ny dhiskwedhowgh dhymm piw ahanan usi ow skoedhya myghtern Ysrael?’ 12Hag onan a'y wesyon a leveris, ‘Denvyth, ow arloedh, a vyghtern. Mes Elisha, an profoes usi yn Ysrael, a lever dhe vyghtern Ysrael an geryow a gewsydh y'th chambour.’ 13Ev a leveris, ‘Ke ha hwilas le may ma ev, may hylliv dannvon tus dh'y sesya.’ Leverys veu dhodho, ‘Yma ev yn Dothan.’ 14Rakhenna ev a dhannvonas di mergh ha charettow ha lu bras; hag i a dheuth y'n nos ha kyrghynna an sita.

15Pan sevis gwas gour Duw myttin a-varr, ha mos yn-mes, otta, yth esa lu ow kyrghynna an sita, gans mergh ha charettow. Y was a leveris dhodho, ‘Ellas, ow mester! Pandr'a wren?’ 16Ev a worthybis, ‘Na borth own, rag an re usi genen yw moy ages an re usi gansa.’ 17Ena Elisha a bysis, ha leverel, ‘ARLOEDH, my a'th pys, igor y dhewlagas may hallo gweles.’ Ha'n Arloedh a igoras dewlagas an gour yowynk, hag ev a welas; leun o an menydh a vergh ha charettow a dan oll a-dro dhe Elisha. 18Ha pan dheuth Aram er y bynn, Elisha a bysis an Arloedh ha leverel, ‘Gwask an bobel ma, my a'th pys, gans dellni.’ Hag ev a's gweskis gans dellni, herwydh ger Elisha. 19Elisha a leveris dhedha, ‘Nyns yw homma an fordh, ha nyns yw homma an sita. Siwyewgh vy, ha my a wra agas dri dhe'n gour a hwilowgh.’ Hag ev a's hembronkas dhe Samaria.

20Kettell dheuthons bys yn Samaria, Elisha a leveris, ‘A Arloedh, igor dewlagas an dus ma may hallons gweles.’ Ha'n Arloedh a igoras aga dewlagas hag i a welas; hag ottensi yn kres Samaria. 21Myghtern Ysrael a leveris dhe Elisha pan y's gwelas, ‘Ow thas, a wrav aga ladha? A wrav aga ladha?’ 22Hag ev a worthybis, ‘Na wredh. A vynnydh ladha an re a gemmersys prisners dre dha gledha ha dha warak? Sett bara ha dowr a-ragdha may hallons dybri hag eva, ha mos dh'aga mester.’ 23Ytho ev a bareusis gwledh veur ragdha; ha wosa i dhe dhybri hag eva, ev a's dannvonas dhe-ves, hag i eth dh'aga mester. Ha ny dheuth bagasow Aram dhe diredh Ysrael na fella.

Esedhva Ben-hadad war Samaria

24Wosa hemma Ben-hadad, myghtern Aram, a guntellas oll y lu hag yskynna ha gul esedhva war Samaria. 25Yth esa divoetter bras yn Samaria hag yth esens ow kul an esedhva warnedhi bys may feu penn asen gwerthys a beswar-ugens bath a arghans, ha kwarter kab6:25 kab: An kab o musur sygh, a-dro dhe dhew liter. a gawgh kelemmi a bymp bath a arghans. 26Y feu myghtern Ysrael ow tremena war an fos, pan grias benyn dhodho, ‘Gweres, ow arloedh, myghtern!’ 27Yn-medh ev, ‘Mar ny'th weres an Arloedh ple hallav kavoes gweres ragos? Dhiworth an leur-drushya po dhiworth an winwask?’ 28An myghtern a leveris dhedhi, ‘Pandr'a hwer dhis?’ Hi a worthybis, ‘An venyn ma a leveris dhymm, “Roy dha vab jy may hyllyn y dhybri hedhyw, ha ni a dheber ow mab vy a-vorow.” 29Ytho ni a vrojyas ow mab ha'y dhybri. Ternos my a leveris dhedhi, “Roy dha vab may hyllyn y dhybri.” Mes hi re gudhsa hy mab.’ 30Pan glewas an myghtern geryow an venyn, ev a skwardyas y dhillas. Pan esa ow tremena war an fos, an bobel a viras, hag otta, ev a'n jevo yskar a-bervedh nessa dh'y groghen. 31Hag ev a leveris, ‘Re wrello Duw yndella dhymm ha moy ynwedh, mar pes penn Elisha mab Shafat war y dhiwskoedh hedhyw.’ 32Mes Elisha a esedhas yn y ji hag yth esa an henavogyon owth esedha ganso. An myghtern re dhannvonsa gour, mes kyns an gannas dhe dhos, Elisha a leveris dhe'n henavogyon, ‘A welowgh fatell dhannvonas an mab a voldrer ma nebonan rag kemmeres dhe-ves ow fenn? Mirewgh, pan dheu an gannas, degeewgh an daras ha'y synsi fast er y bynn. A nyns yw son treys y vester war y lergh?’

33Pan esa hwath ow kewsel orta, otta, an myghtern a dheuth yn-nans dhodho ha leverel, ‘Dhiworth an Arloedh yw an trobel ma. Prag y tal dhymm gortos an Arloedh pella?’