Asverys Yw Tir An Shunammyades

1Elisha a gewsis orth an venyn a dhros ev hy mab arta dhe vewnans, ow leverel, ‘Sav yn-bann ha ke gans dha vayni, ha triga plepynag may hylli triga; rag an Arloedh re worhemmynnis divoetter a seyth blydhen, ha re dheuth seulabrys dhe'n tir. 2Ytho an venyn a sevis ha gul herwydh ger gour Duw; hi eth gans hy mayni ha triga yn pow an Filistysi dre seyth blydhen.’ 3Orth penn seyth blydhen an venyn a dhehwelis dhiworth pow an Filistysi, ha mos dhe bysi an myghtern a'y chi ha'y thir. 4Yth esa an myghtern ow kewsel orth Gehazi, gwas gour Duw, ow leverel, ‘Lavar dhymm, my a'th pys, oll an taklow meur re wrug Elisha.’ 5Pan esa ev ow leverel dhe'n myghtern fatell dhros ev korf marow arta dhe vewnans, otta, an venyn a dhros ev hy mab arta dhe vewnans a grias dhe'n myghtern a-barth hy chi ha'y thir. Ha Gehazi a leveris, ‘Ow arloedh an myghtern, homm yw an venyn, ha hemm yw hy mab a dhros Elisha arta dhe vewnans.’ 6Pan wovynnas an myghtern orth an venyn, hi a'n derivas dhodho. Ytho an myghtern a apoyntyas soedhek rygdhi, ow leverel, ‘Asver pup-tra esa dhedhi, hag oll prow an gwel a-dhia'n jydh may hasas hi an tir bys lemmyn.’

Mernans Ben-hadad

7Elisha a dheuth dhe Damaskus; ha klav o Ben-hadad, myghtern Aram. Leverys veu dhe'n myghtern, ‘Gour Duw re dheuth omma’, 8hag ev a leveris dhe Hazael, ‘Kemmer ro y'th leuv ha ke rag metya orth gour Duw, ha pysi an Arloedh dredho, ow leverel, a wrav yaghhe dhiworth an kleves ma?’ 9Ytho Hazael eth dhe vetya orto ha kemmeres ro ganso, begh a bup-tra da a Damaskus war dhew-ugens kowrvargh. Pan dheuth ev ha sevel a-ragdho yn-medh ev, ‘Dha vab, Ben-hadad myghtern Aram, re'm dannvonas dhis, ow leverel, “A wrav yaghhe dhiworth an kleves ma?” ’ 10Elisha a leveris dhodho, ‘Ke ha lever dhodho, “Ty a wra yaghhe yn sur,” mes an Arloedh re dhiskwedhas dhymm may hwra ev merwel yn sur.’ 11Hag ev a viras stag orto ha lagatta erna borthas meth, ha gour Duw a oelas. 12Hazael a wovynnas, ‘Prag yth oelydh, ow arloedh?’ Ev a worthybis, ‘Drefenn my dhe wodhvos an drog a wredh dhe fleghes Ysrael: ty a lesk aga heryow, ty a ladh aga gwer yowynk gans an kledha, ha brewi aga fleghigyow, ha skwardya aga benynes hag yw gans flogh.’ 13Hazael a leveris, ‘Pyth yw dha was, nag yw marnas ki, may hwrello tra a'n par ma?’ Hag Elisha a worthybis, ‘An Arloedh re dhiskwedhas dhymm may fydhydh myghtern war Aram.’ 14Ytho, ev a dhibarthas dhiworth Elisha ha dos dh'y vester a leveris dhodho, ‘Pandr'a leveris Elisha dhis?’ Hag ev a worthybis, ‘Ev a leveris dhymm y hwredh yaghhe yn sur.’ 15Mes ternos ev a gemmeras an kywlett, ha'y droghya yn dowr, ha'y lesa war y fas, may ferwis. Ha Hazael a reynyas yn y le.

Yehoram a Reyn War Yuda

16Y'n pympes blydhen a Yoram mab Ahab myghtern Ysrael, pan o Yehoshafat myghtern Yuda, Yehoram mab Yehoshafat myghtern Yuda a dhallathas reynya. 17Dewdhek bloedh warn ugens o ev pan dhallathas reynya, hag ev a reynyas eth blydhen yn Yerusalem. 18Ev a gerdhas yn fordhow myghternedh Ysrael, dell wrussa chi Ahab, rag myrgh Ahab o y wreg. Ev a wrug an pyth o drog yn golok an Arloedh. 19Byttegyns ny vynnas an Arloedh distrui Yuda a-barth Davydh y was, drefenn ev dhe ambosa dhodho ri lugarn dhodho ha dh'y dhiyskynnysi bys vykken.

20Yn y dhydhyow Edom a rebellyas erbynn Yuda ha gul aga myghtern aga honan warnedha. 21Ena Yehoram a dremenas dhe Sair gans oll y jarettow. Ev a ehwias y'n nos ha gweskel Edom esa ow kyrghynna ev ha kaptenyon an charettow; mes y lu a fias tre. 22Edom re beu ow rebellya erbynn Yuda bys y'n jydh ma. Yn kettermyn Libna ynwedh a rebellyas. 23Gweythresow Yehoram erell, ha pup-tra a wrug, a nyns yns i skrifys yn lyver kovadhow myghternedh Yuda? 24Yehoram a goskas gans y dasow hag a veu ynkleudhys gans y dasow yn sita Davydh; hag Ahazia y vab a reynyas yn y le.

Ahazia a Reyn War Yuda

25Y'n dewdhegves blydhen a Yoram mab Ahab myghtern Ysrael, Ahazia mab Yehoram myghtern Yuda a dhallathas reynya. 26Dew vloedh warn ugens o Ahazia pan dhallathas reynya, hag ev a reynyas unn vlydhen yn Yerusalem. Hanow y vamm o Athalia myrgh Omri myghtern Ysrael. 27Ev a gerdhas yn fordh chi Ahab, hag a wrug drog yn golok an Arloedh, kepar dell wrug chi Ahab, rag ev o deuv chi Ahab.

28Ev eth gans Yoram mab Ahab dhe werrya erbynn Hazael myghtern Aram yn Ramoth-gilead; ha'n Aramysi a wolias Yoram. 29Myghtern Yoram a dhehwelis dhe Yezreel rag bos yaghhes dhiworth an goliow a ros dhodho an Aramysi yn Rama, pan vatalyas orth Hazael myghtern Aram. Ena Ahazia mab Yehoram myghtern Yuda eth yn-nans dhe weles Yoram mab Ahab yn Yezreel, drefenn y vos klav.