Untyans Yehu

1Ena Elisha an profoes a elwis onan a vebyon an brofoesi ha leverel dhodho, ‘Grogys dha dhiwglun ha kemmer an kostrel ma a oyl y'th leuv ha mos dhe Ramoth-gilead. 2Pan dheudh di, hwila ena Yehu mab Yehoshafat mab Nimshi ha mos a-ji ha gul dhodho sevel dhiworth kres y vreder, ha'y dhoen dhe jambour a-bervedh. 3Ena, kemmer an kostrel a oyl ha'y diveri war y benn, ha leverel, “Yndellma y lever an ARLOEDH: My re'th untyas myghtern war Ysrael.” Ena igor an daras ha fia, na worta.’

4Ytho an gour yowynk, an profoes, eth dhe Ramoth-gilead. 5Ha pan dheuth ev, otta, yth esa kaslewydhyon an lu yn esedhek, hag ev a leveris, ‘My a'm beus messaj ragos, kaslewydh.’ Ha Yehu a leveris, ‘Rag pyneyl ahanan?’ Hag ev a leveris, ‘Ragos, kaslewydh.’ 6Hag ev a sevis ha mos y'n chi; hag ev a dhiveris an oyl war y benn ha leverel dhodho, ‘Yndellma y lever an Arloedh, Duw Ysrael, “My re'th untyas myghtern war bobel an Arloedh, war Ysrael.” 7Ty a wesk dhe'n dor chi Ahab dha vester, may hylliv diella goes ow gwesyon an brofoesi, ha goes oll gwesyon an Arloedh, dre leuv Yezebel. 8Rag chi dien Ahab a verow; ha my a dregh dhiworth Ahab pub gour, keth po rydh, yn Ysrael. 9My a wra dhe ji Ahab bos kepar ha chi Yeroboam mab Nebat, ha kepar ha chi Baasha mab Ahiya. 10An keun a dheber Yezebel yn splatt Yezreel, ha denvyth ny wra hy ynkleudhyas.’ Ena ev a igoras an daras ha fia.

11Ena Yehu a dhehwelis dhe wesyon y arloedh, hag onan a leveris dhodho, ‘Yw pup-tra da? Prag y teuth an muskok ma dhis?’ Ev a worthybis dhedha, ‘Hwi a aswonn an gour ha'y gows.’ 12I a leveris, ‘Gow! Lavar dhyn lemmyn.’ Hag ev a leveris, ‘Yndellma hag yndella y leveris dhymm, ow leverel, “Yndellma y lever an Arloedh, My re'th untyas myghtern war Ysrael.” ’ 13Ena i a fistenas ha pubonan a synsis y dhillasenn ha'y lesa yn-danno war an grisyow lomm, ha seni hirgern, ow leverel, ‘Yehu yw myghtern’.

Ledhys Yw Yoram Myghtern Ysrael

14Yehu mab Yehoshafat mab Nimshi a vrasas erbynn Yoram. Yoram re bia ow tefendya Ramoth-gilead, ev hag oll Ysrael, erbynn Hazael myghtern Aram. 15Myghtern Yoram re dhehwelsa rag bos yaghhes yn Yezreel dhiworth an goliow re rosa dhodho Aram pan vatalyas ev erbynn Hazael myghtern Aram. Yehu a leveris, ‘Mars yw hemma agas hwans, na es denvyth yn-mes, na diank mes a'n sita rag mos ha'y dherivas yn Yezreel.’ 16Rakhenna Yehu a yskynnas yn y jarett ha mos dhe Yezreel mayth esa Yoram ow krowedha. Hag Ahazia myghtern Yuda re dhothya yn-nans rag gweles Yoram.

17Yth esa goelyador a'y sav war an tour yn Yezreel, hag ev a welas routh Yehu ow tos, ha leverel, ‘My a wel routh.’ Yoram a leveris, ‘Kemmer marghek ha'y dhannvon dhe vetya orta, ha leveres, “Eus kres?” ’ 18Ytho marghek eth dhe vetya orto, ha leverel, ‘Yndella y lever an myghtern, “Eus kres?” ’ Ha Yehu a leveris, ‘Pandr'a wodhes a-dro dhe gres? Treyl war ow lergh.’ Ha'n goelyador a dherivas, ‘An gannas a dheuth dhedha, mes nyns usi ow tehweles.’ 19Ena ev a dhannvonas nessa marghek, neb a dheuth dhedha ha leverel, ‘Yndella y lever an myghtern, “Eus kres?” ’ Ha Yehu a worthybis, ‘Pandr'a wodhes a-dro dhe gres? Treyl war ow lergh.’ 20Ha'n goelyador a dherivas, ow leverel, ‘Ev a dheuth dhedha, mes nyns usi ow tehweles. An lewyans yw kepar ha lewyans Yehu mab Nimshi, drefenn ev dhe lewya yn hworboellek.’

21Yoram a leveris, ‘Herness ow charett.’ Ha'y charett a veu pareusys. Ena Yoram myghtern Ysrael hag Ahazia myghtern Yuda eth yn-mes, kettep onan yn y jarett, hag i eth yn-mes erbynn Yehu ha metya orto yn splatt Naboth an Yezreelyas. 22Pan welas Yoram Yehu, ev a leveris, ‘Eus kres, Yehu?’ Hag ev a worthybis, ‘Py kres, ha kemmys horyansow dha vamm Yezebel ha'y fystriow pals?’ 23Ena Yoram a dreylyas a-dro ha fia, ha leverel dhe Ahazia, ‘Trayturi, A Ahazia!’ 24Yehu a dennas y warak gans oll y nerth ha gweskel Yoram ynter y dhiwskoedh ha'n seth a wanas y golonn hag ev a sedhis yn y jarett. 25Ena Yehu a leveris dhe Bidkar y gapten, ‘Kemmer e yn-mes ha tewl e y'n splatt a dir dhe Naboth an Yezreelyas; rag porth kov fatell worras an Arloedh an dargan ma warnodho ha ty ha my ow marghogeth an eyl ryb y gila war-lergh y das Ahab, 26“Yn sur, my a welas goes Naboth, ha goes y vebyon de, a lever an Arloedh; ha my a attal dhis war an splatt ma.” Ytho lemmyn kemmer e yn-mes ha tewl e y'n splatt a dir, herwydh ger an Arloedh.’

Ledhys Yw Ahazia Myghtern Yuda

27Mes pan welas Ahazia myghtern Yuda hemma ev a fias war an fordh dhe Beth-haggan. Yehu a'n siwyas, ow leverel, ‘Tennewgh orto ynwedh!’ Hag i a dennas orto y'n charett war an fordh a yskynn dhe Gur hag usi ryb Ybleam. Hag ev a fias dhe Megiddo ha merwel ena. 28Ha'y wesyon a'n dug yn charett dhe Yerusalem, ha'y ynkleudhyas yn y vedh gans y dasow yn sita Davydh.

29Y'n unnegves blydhen Yoram mab Ahab y tallathas Ahazia reynya war Yuda.

Mernans Freudhek Yezebel

30Pan dheuth Yehu dhe Yezreel, Yezebel a glewas anodho, ha hi a liwas hy dewlagas gans antimoni, afina hy fenn ha mires yn-mes a fenester. 31Pan esa Yehu owth entra der an fos, hi a leveris, ‘Eus kres, ty Zimri, moldrer dha vester?’ 32Ev a dhrehevis y fas dhe'n fenester ha leverel, ‘Piw eus a-barth dhymm? Piw?’ Ha dew po tri spadhesik a viras yn-nans orto. 33Ev a leveris, ‘Tewlewgh hi yn-nans.’ Ytho i a's tewlis yn-nans; nebes a'y goes a lagennas war an fos, ha war an vergh, hag i a stankyas warnedhi. 34Pan dheuth ev a-ji ev a dhybris hag eva, ha leverel, ‘Kewgh, dyghtyewgh an venyn vollothek ma hag ynkleudhyewgh hi; drefenn hy bos myrgh myghtern.’ 35I eth dh'y ynkleudhyas, mes ny gavsons travyth marnas an glopenn, ha'n dhewdroes, ha palvow hy diwleuv. 36Ytho i a dheuth arta ha derivas dhodho, hag ev a leveris, ‘Ger an Arloedh yw hemma, a gewsis der y was Elias an Tishbeyas, ow leverel, “Yn tiredh Yezreel an keun a dheber kig Yezebel; 37korf Yezebel a vydh kepar ha kawgh war enep an gwel yn tiredh Yezreel, ma na yllir leverel, Yezebel yw homma.” ’