Lyther dhe'n Yedhewon yn Ejyp

1An Yedhewon yn Yerusalem ha'n re yn pow Yudi, dhe'n vreder, an Yedhewon yn Ejyp, salusyans ha kres da.

2Re wrello Duw da dhywgh ha re govhaho y gevambos gans Abraham hag Ysak ha Yakob, y wesyon lel. 3Re rollo kolonn dhywgh oll dh'y wordhya ha gul y vodh gans kolonn grev ha spyrys bolonjedhek. 4Re igorro agas kolonnow yn y lagha ha'y worhemmynnow, ha re dhrollo kres. 5Re glewvo agas pysadow ha bos unnverhes dhywgh, ha na'gas eskasso yn termyn anken. 6Ha lemmyn yth eson ow pysi ragowgh omma.

7Yn reyn Demetrius, y'n vlydhen kans naw ha tri-ugens,1:7 143 Kyns Krist. ni an Yedhewon a skrifas dhywgh y'n ahwer hag y'n barras a dheuth warnan y'n blydhynyow na wosa Yason ha'y gowetha dhe dreylya war-dhelergh dhiworth an tir sans ha'n ruvaneth 8ha leski an porth ha skoellya goes gwiryon. Ni a bysis war an Arloedh ha ni a veu klewys, ha ni a offrynnas sakrifis hag offrynn greun, ha ni a wolowis an lugern hag araya an torthow. 9Ha lemmyn gwaytyewgh gwitha goel an skovvaow. Skrifys y'n mis Kislev, y'n vlydhen kans peswar ha peswar-ugens.1:9 124 kyns Krist.

Lyther dhe Aristobulus

10Tus Yerusalem ha Yudi, ha'n senedh ha Yudas, dhe Aristobulus, dyskador myghtern Ptolemi, a deylu an oferysi untys, ha dhe'n Yedhewon yn Ejyp, salusyans ha yeghes da.

11Wosa bos delivrys gans Duw a beryllow meur ni a rass dhodho yn feur, avel tus arayys erbynn myghtern, 12rag ev a fesyas an re a omladhas erbynn an sita sans. 13Pan dheuth an hembrenkyas dhe Persia gans lu a heveli antryghadow, i a veu treghys dhe demmyn yn tempel Nanea dre doell devnydhys gans oferysi Nanea. 14Dre ragskeus bos ow mynnes hy demmedhi, Antioghus a dheuth dhe'n tyller ha'y gowetha ganso, dhe gemmeres moyha rann y dresor yn argovrow. 15Wosa oferysi tempel Nanea dhe settya yn-mes an tresoryow, Antioghus a dheuth gans boghes tus a-ji dhe oryon an sentri; kettell dheuth a-ji i a dhegeas an tempel. 16Owth igeri daras kelys y'n nen, i a dewlis meyn ha gweskel an hembrenkyas. I a droghas dhe-ves aga eseli ha'ga fennow ha'ga thewlel dhe'n dus a-ves. 17Benniges yn pub fordh re bo agan Duw re dhug barn war an re dhidhuw.

Tan a Lesk Sakrifis Nehemia

18Rag ni dhe vos ow solempnya purheans an tempel y'n pympes dydh warn ugens a vis Kislev, ni a grysi bos res agas gwarnya, rag may solempnyowgh hwi ynwedh goel an skovvaow, kepar dell solempnyowgh goel an tan a veu res dhyn pan offrynnas Nehemia sakrifisow, neb a dhrehevis an tempel ha'n alter.

19Rag pan veu ledys agan tasow yn keth dhe Persia, oferysi sansel a'n termyn na a gemmeras rann a dan an alter ha'y gudha yn kevrinek yn kow dowrargh sygh, le ma'n gwithsons yn sawder yn tyller anaswonnys dhe dus oll. 20Mes wosa lies blydhen dhe dremena, pan o plegadow dhe Dhuw, Nehemia, wosa bos dannvenys gans myghtern Persia, a dhannvonas diyskynnysi an oferysi re gudhsa an tan dh'y dhaskavoes. Ha pan dherivsons dhyn na gavsons tan marnas lin tew, ev a worhemmynnis ma'n tennens yn-mes ha'y dhri. 21Pan veu pareusys an taklow rag an sakrifisow, Nehemia a worhemmynnis dhe'n oferysi skoellya an lin war an prenn ha war an taklow gorrys warnodho. 22Pan veu hemma gwrys, ha termyn re dremensa, ha pan splannas an howl hag o kudhys kyns gans kommol, tan meur a dhewis, may feu marth dhe beub. 23An oferysi a wrug pysadow, i hag oll esa ena, ha'n sakrifis ow leski, Yonathan a ledyas, ha'n re erell a worthybis, par dell wrug Nehemia. 24An pysadow o herwydh an vaner ma:

‘A Arloedh, Arloedh Duw, Kreador pup-tra, ty yw ownek ha nerthek hag ewn ha tregeredhus, ty unnsel yw an myghtern ha kuv, 25ty unnsel yw hel, ty unnsel yw ewnhynsek hag ollgalloesek ha bythkwethek. Ty a selow Ysrael a bub drog; ty a dhewisas an tasow ha'ga sakra. 26Kemmer an sakrifis ma a-barth dha bobel Ysrael ha gwith dha rann ha'y sakra. 27Kuntell war-barth agan pobel skattrys, rydhha an re yw kethyon yn mysk an Jentilys, mir war an re yw deneghys ha dispresys, ha godhvydhes an Jentilys dha vos agan Duw. 28Kessydh an re a arwask hag yw tont gans balghder. 29Plans dha bobel y'th tyller sans, dell ambosas Moyses.’

30Ena an oferysi a ganas an hymnys. 31Wosa bos kowlleskys taklow an sakrifis, Nehemia a worhemmynnis may fe diverys war veyn meur an lin o gesys. 32Pan veu hemma gwrys, flamm a dhewis; mes pan dhastewynnas golow a-dhiworth an alter, difeudhys veu. 33Pan dheuth an mater ma dhe vos godhvedhys, ha derivys veu dhe vyghtern an Persianys, an lin dhe omdhiskwedhas y'n tyller may kudhas an oferysi dhivres an tan, ganso may losksa Nehemia ha'y geskowetha taklow an sakrifis, 34an myghtern a hwithras an mater, ha keas an tyller ha'y wul tyller sans. 35An myghtern a dhegemmeras gobrow meur dhiworth an tyller ma, hag ev a's rannas gans an dus faverys ganso. 36Nehemia ha'y geskowetha a henwis hemma 'nefthar' hag a styr purheans, mes gans an moyha rann a dus yth yw gelwys naftha.