Glanheans an Tempel

1Lemmyn Makkabeus ha'y holyoryon, an Arloedh orth aga hembronk, a dhaskavas an tempel ha'n sita; 2i a dennas dhe'n dor an alteryow re bia drehevys y'n varghasva gans an estrenyon. 3Wosa glanhe an sentri, i a wrug alter nowydh; ena ow kweskel gwrygh a'n kellester, i a offrynnas sakrifisow wosa bolgh a dhiw vlydhen, hag i a offrynnas ynkys hag enowi lugern ha settya bara an wolok. 4Wosa gul hemma, i a goedhas dhe'n leur ha pysi an Arloedh ma na dheffens arta yn anfeus a'n par ma, mes may fiens dyskyblys ganso gans kuvder mar pegghens arta er y bynn, a-der bos delivrys dhe genedhlow kablus ha barbarus. 5Dell hwarva y'n keth jydh may fia defolys an sentri gans an estrenyon, an sentri a veu glanhes arta, henn yw y'n pympes dydh warn ugens a'n keth mis, henn yw Kislev. 6I a'n solempnyas eth dydh gans heudhder, kepar hag yn goel an skovvaow, ow kevenna fatell esens ow kwandra nans yw prys byghan, yn goel an skovvaow, y'n menydhyow ha mogowyow avel goedhviles. 7Ytho, ow toen gwelynni terghys gans idhyow ha skorr teg ha delyow palmwydh ynwedh, i a ganas hymnys dhodho neb a ros sewena dhedha ow klanhe y dyller sans y honan. 8I a ordenas dre ordenans kemmyn, fastys dre raglev, an genedhel Yedhowek oll dhe woelya an dydhyow ma pub blydhen.

9Yndellma ytho y feu diwedh Antioghus, gelwys Epifanes.

Antioghus Ewpator

10Lemmyn ni a dheriv an pyth a hwarva yn-dann Antioghus Ewpator, neb o mab an den didhuw na, ha ri berrskrif a benn-terroesow an breselyow. 11An den ma, pan eritas an ruvaneth, a ordenas neb unn Lysias dhe vos gwalader an governans ha dhe vos penn-governour a Kelesyria ha Fenikia. 12Ptolemi, henwys Makron, a ledyas ow tiskwedhes gwirvreus dhe'n Yedhewon drefenn an kammhynseth re bia gwrys dhedha, hag assaya mentena kres gansa. 13Yn siwyans a henna, ev a veu kuhudhys a-rag Ewpator gans kowetha an myghtern. Ev a glewo ev y honan dhe vos gelwys traytour orth pub torn drefenn ev dhe asa Kyprus, a via fydhys dhodho gans Filometer, ha kila dhe Antioghus Epifanes. Rag ny allas na fella mentena an reowta dervynnys gans y soedh,10:13 Styr an Greka yw ankler. ev a gemmeras gwenon ha diwedha y vewnans.

Kaskyrgh yn Idumea

14Gorgias, pan dheuth ha bos governour an ranndir, a ventenas lu a soudoryon arvethys, hag orth pub torn ev a besyas gwerrya erbynn an Yedhewon. 15Dres hemma, an Idumeanys, neb a gavas maystri war geryow lesus, a arvedha an Yedhewon; i a dhegemmeras an dhivresow a-dhiworth Yerusalem, hag assaya pesya an vresel. 16Mes Makkabeus ha'y luyow, wosa aspysadow solem, ha pysi war Dhuw omladh war aga thu, a fistenas dhe geryow an Idumeanys. 17Orth aga assaltya gans meur a gris, i a waynyas perghennogeth a'n tylleryow, ha fesya oll an re esa owth omladh war an fosow, ha ladha an re a dheuth er aga fynn, ow ladha na le ages ugens mil.

18Pan fias naw mil dhe'n lyha dhe dhew dour fest krev darbarys dhe sevel orth esedhva, 19Makkabeus a asas Simon ha Yosep, keffrys ha Zakkeus ha'y dus, lu niverus lowr rag gorra esedhva warnedha; hag ev y honan a dhibarthas dhe'n tylleryow le mayth o brassa edhomm anodho. 20Mes an re gans Simon ow hwansa arghans, a veu falswobrys gans re a'n dus y'n touryow, ha wosa degemmeres seyth mil dhraghma i a asas nebes anedha dhe dhiank. 21Pan dheuth ger a'n pyth re hwarvia dhe Makkabeus, ev a guntellas ledyoryon an bobel, ha kuhudha an wer ma a wertha aga neshevin rag arghans ow livra aga eskerens dhe omladh er aga fynn. 22Ena ev a ladhas an wer ma re dreylyas dhe drayson, hag a gemmeras dihwans an dhew dour. 23Wosa sewena gans y arvow yn pup-tra a omgemmeras, ev a dhistruis moy ages ugens mil y'n dhew ger.

Yudas a Feth Timothi

24Lemmyn Timothi, re bia fethys gans an Yedhewon kyns, a guntellas routh veur a soudoryon arvethys ha marghoglu na veu byghan y niver a-dhiworth Asia. Ev a dheuth yn-rag, ow mynnas kemmeres Yudi dre nell arvow. 25Dell dheuth an eskar nes, Makkabeus ha'y dus a skoellyas pri war aga fennow ha grogysa aga diwglun gans yskar, yn pysadow dhe Dhuw. 26Ow koedha war radhow an alter, i a bysis dhiworto bos grassyes dhedha ha bos eskar dh'aga eskerens hag erbynner dh'aga erbynnoryon, dell dhiskler an lagha. 27Hag ow sevel dhiworth aga fysadow i a gemmeras aga arvow yn-bann hag avonsya neb pellder a'n sita; ha pan dheuthons ogas dhe'n eskerens i a hedhis. 28Poran dell esa an bora ow tardha, an dhew lu a junyas yn batel, an eyl gans ambos sewena ha budhogoleth, drefenn aga vertu mes keffrys drefenn aga fydhyans y'n Arloedh, ha'y gila a wrug dhe gonnar bos aga hembrenkyas y'n vatel.

29Pan dheuth ha bos fers an vatel, yth omdhiskwedhas dhe'n eskerens a-dhiworth nev pymp den splann war vergh gans fronnow a owr, hag yth esens owth hembronk an Yedhewon. 30I a wrug kylgh a-dro dhe Makkabeus ha'y gudha a bub tu gans aga leun-arvow aga honan, ha'y witha rag bos pystigys. I a dennas sethow ha tardhow taran war aga eskerens, may fons tewlys yn deray, penndegys ha dallhes, ha treghys dhe demmyn. 31Ugens mil ha pymp kans a veu ledhys, ha hwegh mil marghek.

32Timothi y honan a fias dhe dhinas pur grev gelwys Gazara, le mayth esa y vroder Kereas an kaslewydh. 33Ena Makkabeus ha'y dus o lowen, hag i a worras esedhva war an dinas peswar dydh. 34An re esa a-ji, ow fydhya yn krevder an tyller, a vlasfemias yn euthyk, ha leva geryow treus. 35Mes orth bora an pympes dydh, ugens den yowynk a lu Makkabeus, enowys gans sorr drefenn an blasfemiow, a omsettyas yn hardh war an fos ha gans konnar gwyls i a ladhas pubonan a vetsons. 36Pan esa an dhefendyoryon distennys, re erell a yskynnas an fosow ha gorra tan y'n touryow; i a enowis tanyow ha leski an vlasfemoryon yn few. Re erell a dorras an yetow yn igor ha gasa remenant an lu dhe entra, hag i a gemmeras an sita. 37I a ladhas Timothi esa owth omgudha yn dowrargh, ha'y vroder Kereas, hag Apollofanes. 38Wosa kowlwul an taklow ma, gans hymnys ha grasyans i a vennigas an Arloedh a dhiskwedh kuvder meur dhe Ysrael ha ri dhedha an vudhogoleth.