Yudas a Feth Lysias

1Termyn berr wosa hemma, Lysias, gwithyas ha neskar an myghtern, gwalader an governans, ow pos serrys orth an pyth re hwarvia, 2a guntellas a-dro dhe beswar-ugens troeslu hag oll y varghogyon ha dos erbynn an Yedhewon. Ev a vynna gul dhe'n sita bos tre dhe'n Grekys, 3ha tolli trubyt war an tempel par dell wre war dylleryow sans an kenedhlow erell, ha dhe brofya an arghoferyaseth dhe vos gwerthys pub blydhen. 4Ny wrug vri bynag a alloes Duw mes ughelhes veu gans y dhegow a vilyow a droeslu, ha'y beswar-ugens olifans. 5Ytho ev a dheuth bys yn Yudi ha dos nes dhe Beth-sur, hag o tyller kerys a-dro dhe bymp stadion a-dhiworth Yerusalem, hag ev a worras esedhva gales warnedhi.

6Pan gonvedhas Makkabeus ha'y dus Lysias dhe worra esedhva war an keryow, i hag oll an bobel, gans kynvannow ha dagrow, a bysis war an Arloedh a dhannvon el da dhe sawya Ysrael. 7Makkabeus y honan o an kynsa a gemmeras arvow yn-bann, hag ev a ynnias war an re erell argelli aga bewnans war-barth ganso dhe weres aga neshevin. Ena i a fistenas war-barth yn tiwysyk. 8Hag ena, pan esens hwath ogas dhe Yerusalem, marghek a omdhiskwedhas orth aga ledya, gwiskys yn gwynn hag ow swaysya arvow a owr. 9Hag oll war-barth i a wormolas an Duw tregeredhus, ha krevhes vons yn aga holonn, parys dhe omsettya na war dus hepken mes war an gwylsa bestes po fosow a horn. 10I a geskerdhas yn-rag yn aray batel, gansa aga gwereser nevek, rag an Arloedh a dhiskwedhas tregeredh dhedha. 11I a omdheghesas avel lewyon erbynn an eskerens, ha ladha unnek mil anedha ha hwetek kans marghek, ha gorra oll an re erell dh'aga fo. 12An brassa rann anedha a dhienkas destryppys ha goliys, ha Lysias y honan a fias yn meth ha diank.

Lysias a Wra Kres gans an Yedhewon

13Dell nag o den heb poell, ev a ombrederi a-dro dhe'n fethans re hwarvia dhodho, hag aswonn bos an Ebrowyon antryghadow drefenn an Arloedh galloesek dhe omladh war aga thu. Ytho ev a dhannvonas dhedha 14ha'ga ferswadya dhe wul akord a-dro dhe bup-tra war ambosow ewn, owth ambos ev dhe berswadya an myghtern, orth y gonstryna dhe vos aga howetha. 15Makkabeus, ow kul vri a'n les kemmyn, a akordyas gans pup-tra a ynnias Lysias. Rag an myghtern a wrontyas pub gorholedh a-barth an Yedhewon a dhelivras Makkabeus dhe Lysias yn skrif.

16An lyther skrifys dhe'n Yedhewon gans Lysias o dell siw:

‘Lysias dhe bobel an Yedhewon, salusyans. 17Yowann hag Absalom, a veu dannvenys genowgh, re dhelivras agas gorthyp skrifys hag i re wovynnas a-dro dhe'n materyow kampoellys ynno. 18My re dherivas dhe'n myghtern pup-tra o res bos dres a-ragdho, ha'n taklow erell usi y'm awtorita vy unnver ov gansa. 19Mar mynnowgh mentena agas bodh da war-tu ha'n governans, my ow honan a assay alemma dhe avonsya agas sewena. 20Hag a-dro dhe vateryow a'n par ma ha'ga manylyon, my re erghis an dus ma ha'm kannasow omgusulya genowgh. 21Farwell. An peswora warn ugens a vis Dioskorus, y'n vlydhen kans eth ha dew-ugens.’11:21: 164 kyns Krist.

22Lyther an myghtern o yndellma:

‘Myghtern Antioghus dh'y vroder Lysias, salusyans. 23Rag agan tas lemmyn dhe vos gyllys dhe'n duwow, agan hwans yw bos an re usi yn agan gwlaskor gesys yn kres owth attendya dh'aga negys aga honan. 24Ni re glewas na vynn an Yedhewon chanjya dhe usadow grek, dell vynnas agan tas, mes bos gwell gansa aga maner a vewnans aga honan hag i a wovynn bos gesys dhedha aga usadow aga honan. 25Yndellma, a-ban dhewisyn bos an genedhel ma rydh a ankresyans, agan ervirans yw bos daskorrys dhedha aga thempel hag i dhe vewa herwydh usadow aga hendasow. 26Da vydh ytho ty dhe dhannvon ger dhedha ha ri dhedha ambosow kowethyans may hwodhvons agan breus ha may fons da aga cher ha pesya yn lowen ow kul aga negysyow aga honan.’

27Lyther an myghtern dhe'n genedhel o yndellma:

‘Myghtern Antioghus dhe senedh an Yedhewon ha dhe'n Yedhewon erell, salusyans. 28Mars owgh yagh, yth yw dell hwensyn. Yth on ni ynwedh yn yeghes da. 29Menelaus re dherivas dhyn bos hwans dhywgh dehweles dhe dre ha siwya agas negys agas honan. 30Ytho an re yw gyllys dhe dre kyns an degves warn ugens a vis Ksanthikus a's tevydh agan ambos a gowethyans gans kummyas leun 31rag an Yedhewon dhe dhevnydhya aga boes ha'ga laghow aga honan, poran kepar ha kyns, na ny vydh nagonan anedha troblys yn fordh bynag drefenn an pyth a ve gwrys yn diskians. 32Ha my re dhannvonas Menelaus ynwedh dh'agas kennertha. 33Farwell. An pymthegves a vis Ksanthikus, y'n vlydhen kans, eth ha dew-ugens.’11:33: 164 kyns Krist.

34An Romanyon a dhannvonas lyther dhedha ynwedh, gans an geryow ma:

‘Kwintus Memmius ha Titus Manius, kannasow an Romanyon, dhe bobel an Yedhewon, salusyans. 35A-dro dhe'n pyth re wrontyas dhywgh Lysias, neskar an myghtern, ni ynwedh a assent. 36Mes a-dro dhe'n taklow a ervirys aga kampoella dhe'n myghtern, kettell ombredersowgh anedha, dannvenewgh nebonan a-boynt, may hwryllyn profyansow delledhek ragowgh. Rag yth esen ow mos lemmyn dhe Antiogh. 37Ytho fistenewgh ha dannvon kannasow ma'gan bydh agas breus. 38Farwell. An pymthegves a vis Ksanthikus y'n vlydhen kans, eth ha dew-ugens.’