Yeremia a Gudh an Tabernakel, an Argh ha'n Alter

1Y'n kovadhow y kevir an profoes Yeremia dhe worhemmynna dhe'n re esa ow pos divres kemmeres rann a'n tan, dell veu kampoellys; 2ha'n profoes wosa ri dhedha an lagha, a dhyskas an re esa ow pos divres ma na ankoffens ordenansow an Arloedh, ha na vens ledys yn sowdhan yn aga brys ow kweles delowyow owr hag arghans ha'ga afinans. 3Ha gans geryow kehaval erell ev a ynnias warnedha, na dhibartha an lagha dhiworth aga holonnow.

4Ynwedh y'n keth kovadh yth erghis an profoes, wosa degemmeres dargan, an tabernakel ha'n argh dhe holya ganso, hag ev eth yn-mes dhe'n menydh may hwrussa Moyses mos ha gweles eretons Duw. 5Yeremia a dheuth ha kavoes annedh yn fow, hag ev a dhros di an tabernakel ha'n argh hag alter an ynkys; ena ev a geas an entrans. 6Re anedha hag a dhothya ganso a dhehwelis rag merkya an hyns, mes ny yllens y drovya. 7Pan dheuth Yeremia dhe wodhvos hemma, ev a's keredhis, ow leverel: ‘An tyller ma a worta anaswonnys bys pan guntell Duw y bobel war-barth ha diskwedhes y dregeredh. 8Ena an Arloedh a dhiskudh an taklow ma, ha golewder an Arloedh ha'n gommolenn a omdhiskwedh, par dell veu gwelys yn termyn Moyses, ha dell wovynnas Solomon may fo an tyller sakrys yn arbennik.’

9Disklerys veu ynwedh, Solomon yn y furneth dhe offrynna sakrifis rag sakrans ha kowlwrians an tempel. 10Par dell bysis Moyses dhe'n Arloedh, ha tan a dhiyskynnsa a nev ha kowlleski an sakrifisow, yndella ynwedh Solomon a bysis, ha'n tan a dhiyskynnas ha kowlleski an offrynnow leskys. 11Ha Moyses a leveris, ‘Ny veu an ofrynn pegh dybrys, rag kowlleskys veu.’ 12Yndella Solomon ynwedh a solempnyas an eth dydh.

13An keth taklow ma yw derivys yn kovadhow ha kovyow Nehemia. Par dell fondyas lyverva ha kuntell lyvrow a-dro dhe'n vyghternedh ha'n brofoesi, ha skrifow Davydh, ha lytherow an vyghternedh a-dro dhe rohow sakrys, 14y'n keth vaner ma Yudas ynwedh a guntellas oll an lyvrow re bia kellys drefenn an vresel re dhothya warnan, hag ymons yn agan perghennogeth. 15Ytho mars eus edhomm dhywgh anedha, dannvenewgh tus dh'aga hyrghes ragowgh.

16Ytho, a-ban on parys dhe solempnya an purheans, ni a skrif dhywgh. Da via ytho mar kwitthewgh an dydhyow ma. 17Duw yth yw neb re sawyas oll y bobel ha daskorr an eretons dhyn ni oll, ha'n myghternsys ha'n oferyaseth ha'n sakrans, 18dell ambosas der y lagha. Govenek a'gan beus Duw dhe dhiskwedhes tregeredh warnan skon ha'gan kuntell a bub tyller yn-dann nev dhe'n tyller sans, rag ev a'gan livras a dhrogow meur ha purhe an tyller.

Raglavar an Awtour

19Hwedhel Yudas Makkabeus ha'y vreder, ha purheans an tempel meur, ha sakrans an alter, 20ha'n breselyow erbynn Antioghus Epifanes ha'y vab Ewpator, 21ha'n gwelesigethow a dheuth a nev dhe'n re a omladhas yn hardh rag yedhowieth, kynth o byghan aga niver, neb a gemmeras an tir oll ha helghya an routhow barbarus, 22ha daswaynya perghennogeth a'n tempel, gerys-da dres oll an bys, ha livra an sita, hag asver an laghow esa yn peryll a vos dileys, ha'n Arloedh gans kuvder meur ow tos ha bos grassyes dhedha – 23oll an taklow ma, settys yn-mes gans Yason a Kyrene yn pymp lyver, ni a assay berrhe yn unn lyver. 24Rag my a welas an liv a rivow ynna ha'n kaletter dhe'n re a vynn mires yn derivadow istorek, drefenn myns meur an devnydh. 25Ni re assayas plesya an re a vynn redya, dh'y wul es dhe'n re a vynn kevenna, ha bos dhe les dhe bub redyer. 26An lavur a verrhe re omgemmersyn, nyns yw mater skav, mes onan a hwys ha koll kosk, 27par dell nag yw es dhe neb a bareus gwledh ha hwilas prow re erell. Byttegyns rag surhe grasyans a lies ni a omgemmer an lavur yn lowen, 28ow kasa dhe'n awtour y honan charj a'n manylyon poran, ha lavurya dhe holya elvennow an berrheans. 29Rag dell vydh res dhe'n pennser gul vri a'n drehevyans oll, ny vydh res dhe neb a omgemmer y bayntyans ha'y afinans prederi marnas a'n pyth yw gwiw rag y dekheans; yndellma dhe'm breus vy yw an kas genen ni. 30Yth yw dever an kynsa awtour sevel war an dor, dadhla taklow a bub tenewen, hag omdrobla gans an manylyon, 31mes neb a dhaswra an derivas a dal bos gesys dhe strivya rag berrheans ha goheles dyghtyans hir. 32Omma ytho ni a dhalleth agan derivas, heb keworra namoy dhe'n pyth re beu leverys; rag y fia foll hirhe an raglavar ha treghi berr an istori y honan.