Devedhyans Heliodorus dhe Yerusalem

1Pan o an sita sans annedhys yn kres perfydh, ha'n laghow gwithys fest yn ta, drefenn sansoleth an arghoferyas Onias ha'y gas a dhrog, 2an vyghternedh aga honan a enoras an tyller hag afina an tempel gans rohow a'n gwella; 3hwath bys may porthas Selewkus myghtern Asia a'y dalasow y honan oll an kostow rag servis an sakrifisow.

4Mes unn Simon, a loeth Benyamin, neb re bia apoyntys kapten an tempel, a dhadhlas gans an arghoferyas a-dro dhe venystrans marghas an sita. 5A-ban na ylli gwarthevya war Onias, ev eth dhe Apollonius mab Tarsus, neb o governour Kelesyria ha Fenikia y'n termyn na, 6ha derivas dhodho bos an dresorva yn Yerusalem leun a sommow mona diniver, ma na yllys bos reknys myns an arghasow, ha nag ens ow tesedha gans akont an sakrifisow; mes y hyllys aga doen yn-dann awtorita an myghtern. 7Pan vetyas Apollonius gans an myghtern, ev a dhiskudhas dhodho an pyth a glewsa a-dro dhe'n arghans. An myghtern a dhewisas Heliodorus y bennvenyster, ha'y dhannvon gans gorhemmynnow dhe dhri dhodho an arghans ragleverys. 8Heliodorus eth yn-kerdh distowgh war y vyaj gans an ragskeus a wul tro hwithrans a'n sitys a Kelesyria ha Fenikia, mes yn gwiryonedh dhe gowlwul towl an myghtern.

9Pan dheuth dhe Yerusalem, ha wosa bos wolkommys yn kuv gans arghoferyas an sita, ev a gewsis a-dro dhe'n disklosyans re bia gwrys, ha derivas prag y tothya, ha govynn mars o an traow ma gwir. 10An arghoferyas a leveris dhodho bos nebes arghasow gorrys a-denewen rag gwedhwesow hag omdhivasow, 11hag ynwedh pythow Hyrkanus mab Tobias, gour a reowta meur. Ny veu an mater par dell lavarsa Simon didhuw; an sommenn gowal o peswar kans talent a arghans, ha dew gans talent a owr. 12Hag yn-medh ev nag o possybyl mann dregynn dhe vos gwrys dhe'n dus re goelsa yn sansoleth an tyller, hag yn meneghi antorradow an tempel, enorys der an bys oll.

13Mes Heliodorus, drefenn gorhemmynnow an myghtern dhodho, a leveris bos res dri an arghans yn neb kas yn tresorva an myghtern. 14Ytho ev a apoyntyas dydh ha mos a-ji dhe gevarwoedha hwithrans an arghasow ma. Y feu ahwer nag o byghan der an sita oll.

15An oferysi a goedhas dhe'n dor a-rag an alter yn aga dillas oferyasek ha gelwel war-tu ha nev, war ev neb re wrug lagha a-dro dhe taklow gorrys yn arghow, ma's gwittho saw rag an re a's gorras ena. 16Seul a welas semlans an arghoferyas o trogh y golonn, rag y fas ha treylyans y liw a dhiskwedhas angoes y enev. 17Rag euth ha kren an korf re dhothya war an gour, hag apert o an dolor a'n jevo yn y golonn dhe'n re a viras orto. 18Ynwedh tus a fistenas yn-mes a'ga chiow yn routhow rag gul pysadow kemmyn drefenn bos an tyller sans dhe vos dres yn disenor. 19Benynes, grogysys gans yskar yn-dann aga bronnow lomm, a dheuth y'n stretow yn routhow. Re a'n benynes yowynk gwithys a-ji a boenyas dhe'n darasow, ha re anedha dhe'n tohow, ha re erell a gykis yn-mes a'n fenestri. 20Hag owth ystynn aga diwleuv tu ha nev, peub a wrug aspysadow. 21Truedhek o gweles an routh a bub eghenn koedhys dhe'n dor, ha gweles own an arghoferyas yn y angoes meur.

An Arloedh a With y Dempel

22Pan esens ow kelwel war an Arloedh Ollgalloesek rag gwitha saw ha sur an arghasow rag an re a's gorras ena, 23Heliodorus a besyas gul an pyth re bia ervirys. 24Mes pan dheuth dhe'n dresorva gans y withysi, poran y'n termyn na Rewler an spyrysyon ha pub galloes a wrug diskwedhyans meur may feu sowdhenys gans nerth Duw oll an re re bia hardh lowr dhe dhos ganso, hag i a glamderas gans euth. 25Rag yth omdhiskwedhas dhedha margh, splann y herness, ha marghek grysel y wedh war y geyn; ev a fyskas yn konneryek erbynn Heliodorus ha gweskel orto gans y garnow a-rag. Marghek an welesigeth o wiskys yn leun-arvwisk a owr. 26Dew wour yowynk a omdhiskwedhas dhodho ynwedh, marthys krev, a dekter gloryus, ha gwiskys yn splann. I a sevi a bub tenewen anodho ha'y gastiga heb lett, ow ri lies skwatt warnodho. 27Heliodorus a goedhas a-dhesempis dhe'n leur ha tewlder down a dheuth warnodho. I a'n kemmeras yn-bann, ha'y worra war ravath, 28ha'y dhoen dhe-ves – an den ma re entersa nammnygen an dresorva ragleverys gans koskordh meur ha'y withysi oll mes lemmyn heb galloes omweres. I a aswonnis yn kler sovraneth Duw.

Onias a Bys rag Heliodorus

29Ev a wrowedhas ena dilavar, drefenn an gwrians duwel ha heb govenek vytholl a dhelivrans. 30Yth esen ow kormel an Arloedh rag an ober barthusek a wrug yn y dyller sans y honan. Ha'n tempel, o lenwys a own hag ankres termyn berr kyns, a veu lenwys gans heudh ha lowender, drefenn an Arloedh Ollgalloesek lemmyn dhe omdhiskwedhes.

31Hag yn skon re a gowetha Heliodorus a bysis Onias dhe elwel war an Ughella may hwrontya bewnans dhe'n gour a'y wrowedh orth y dhiwettha anall. 32Ytho an arghoferyas, ow perthi own an myghtern dhe gammdybi bos trayson gwrys dhe Heliodorus gans an Yedhewon, a offrynnas sakrifis rag yeghes an gour. 33Pan esa an arghoferyas ow kul dehwelyans, an keth dew wour yowynk a omdhiskwedhas arta dhe Heliodorus gwiskys y'n keth dillas, hag i a sevis ha leverel, ‘Bydh synsys meur dhe Onias an arghoferyas, a-ban wrontyas an Arloedh dhis dha vewnans a'y wovis. 34Ha ty, neb re beu kastigys gans nev, gwayt derivas dhe beub nerth meuredhek Duw.’ Wosa leverel hemma i eth mes a wel.

Kedreylyans Heliodorus

35Ena Heliodorus a offrynnas sakrifis dhe'n Arloedh ha gul ambosow meur dhe Selwyas y vewnans, ha wosa leverel farwell dhe Onias, ev a geskerdhas gans y soudoryon dhe'n myghtern. 36Ev a dhustunias dhe beub a-dro dhe wriansow an Duw ughella, hag a welas gans y lagas y honan. 37Pan wovynnas an myghtern orth Heliodorus py par den a vedha gwiw dhe dhannvon war negys arall dhe Yerusalem, ev a worthybis, 38‘Mara'th eus eskar po braser erbynn dha wovernans, dannvon ev ena, rag ty a'n daskemmer kastigys yn leun, mar tienk gans y vewnans; rag y'n tyller na, heb dout, yma neb nerth arbennik a Dhuw. 39Rag ev neb a'n jeves y drigva yn nev a woel war an tyller na y honan, ha dri gweres dhodho, hag ev a wysk ha distrui an re a dheu dh'y bystiga.’ 40Hemm o siwyans hwedhel Heliodorus ha gwithyans an dresorva.