Simon a Guhudh Onias

1An Simon ragleverys, neb re rossa derivadow a-dro dhe'n arghans erbynn y wlas y honan, a sklandras Onias, ow leverel ev dhe vos ev neb re ynnisa war Heliodorus ha bos gwir gaws an drogow. 2Ev a vedhas henwel avel braser erbynn an governans an gour o masoberer a'n sita, difresyas y geswlasoryon, ha diwysyk rag an laghow. 3An kas a dheuth ha bos mar vras may feu gwrys moldransow gans onan a holyoryon len Simon, 4Onias a welas peryll a'n kenkians ma, ha bos Apollonius mab Menestheus, governour Kelesyria ha Fenikia, ow kluwhe atti Simon. 5Ytho ev eth dhe'n myghtern, heb kuhudha y geswlasoryon mes ow mires orth les oll an bobel, ha poblek ha privedh. 6Rag ev a welas na dheffa dhe studh hebask arta negysyow an stat heb ragbreder an myghtern, ha na hettha Simon y follenep.

Yason an Arghoferyas, a Dhre Devosow Grek

7Pan verwis Selewkus, hag Antioghus, gelwys Epifanes, a gemmeras an vyghterneth, Yason broder Onias a gavas an arghoferyaseth dre legras, 8owth ambosa dhe'n myghtern yn petishyon tri hans ha tri-ugens talent a arghans ha peswar-ugens talent a fenten arall. 9Dres hemma ev a ambosas pe kans ha hanter-kans moy mar pe res kummyas dhe fondya yn-dann y awtorita gymnasium rag adhyskans gwer yowynk, ha dhe govskrifa tus Yerusalem avel Antioghysi. 10Pan assentyas an myghtern ha Yason a dheuth yn y soedh, ev a dreylyas y geswlasoryon dhe fordh a vewnans grek.

11Ev a worras a-denewen an gwiryow ryel rag Yedhewon, grontys dre Yowann tas Ewpolemus, neb eth avel lyskannas rag selya kowethyans ha keffrysyans gans an Romanyon. Ev a dhistruis an fordhow laghel a vewnans ha kommendya devosow nowydh konter dhe'n lagha. 12Toeth da ev a fastyas gymnasium poran orth troes tour an sita, hag ev dhynyas bryntinna an wer yowynk gwiska an petasus.4:12 petasus: Hatt arbennik an athletys grek, tokyn aga bos eseli palaestra, skol rag omdowl. 13Hellenieth a dheuth dhe'n pella prykk dre gressyans fordhow estren, drefenn drogedh outrayus Yason didhuw, na veu gwir arghoferyas vytholl, 14ma na veu an oferysi na fella lel dh'aga servis orth an alter. Ow tispresya an sentri ha logh a-dro dhe'n sakrifisow, i a fistenas dhe gemmeres rann yn gweythresow anlaghel an palaestra wosa klewes an sinell rag tewlel an diskus, 15heb gul vri a'n enors settys gans aga thasow mes ow synsi enorys grek gwella oll. 16Drefenn hemma anfeusi poes a dheuth warnedha, ha'n re a garens hag a vynnens gul war aga lergh yn tien a dheuth ha bos aga eskerens ha'ga hessydhya. 17Nyns yw tra skav kammdremena erbynn lagha Duw – dell vydh klerhes gans hwarvosow a-wosa.

Yerusalem yn-dann Dhelanwes Syria

18Pan esa an gwariow pympblydhenyek ow pos synsys yn Tyr yn lok an myghtern, 19an Yason vil a dhannvonas kannasow, dewisys avel burjysi Antiogh dhiworth Yerusalem, dhe dhoen tri hans draghma arghans rag sakrifis dhe Herkules. Hwath degoryon an arghans a grysi nag o gwiw y dhevnydhya rag sakrifis, mes gwell via y spena rag porpos arall. 20Ytho kyn fynnas an dannvoner an arghans ma dhe vos devnydhys rag sakrifis dhe Herkules, dre ervirans an dhegoryon y feu devnydhys rag drehevel gorholyon roevel teyr-res.

21Pan veu Apollonius mab Menestheus dannvenys dhe Ejyp rag kurunans Filometor avel myghtern, Antioghus a dhyskas Filometor dhe vos ha bos eskarek dh'y les. Ytho ev a ombareusis rag y sawder y honan, ha mos dhe Yoppa, hag ena ev a besyas dhe Yerusalem. 22Ev a veu wolkommys gans ryelder meur gans Yason ha'n sita, ha degemmerys a-ji gans faglennow ha garmow. Ena ev a geskerdhas gans y lu bys yn Fenikia.

Menelaus a Dheu ha Bos Arghoferyas

23Teyr blydhen a-wosa Yason a dhannvonas Menelaus broder an Simon ragleverys dhe dhoen mona dhe'n myghtern ha dhe gollenwel erviransow war negysyow a res. 24Mes ev, pan veu dres yn lok an myghtern, a'n gormolas gans semlans a awtorita, ha kavoes an arghoferyaseth ragdho y honan, ow profya tri hans talent a arghans moy es Yason. 25Wosa degemmeres gorhemmynn an myghtern ev a dhehwelis heb dri teythi gwiw dhe'n arghoferyaseth, mes ganso temper poeth a durant fell ha konnar goedhvil gwyls. 26Ytho Yason, wosa diswul y vroder y honan, a veu diswrys gans gour arall, hag ev a veu fesys avel fowesik bys yn pow Ammon. 27Kyn pesyas Menelaus yn y soedh, ny beas bythkweyth an arghans ambosys dhe'n myghtern. 28Pan besyas Sostratus, kapten an tour, govynn talas – rag kuntell an doll o y dhever – an dhew a veu gelwys a-rag an myghtern drefenn an dra ma. 29Menelaus a asas Lysimaghus y vroder y honan avel isarghoferyas, ha Sostratus a asas Krates, kapten soudoryon Kyprus.

Moldrans Onias

30Y'n tor' ma, tus Tarsus ha Mallus a rebellyas, drefenn bos res aga sitys dhe Antioghis, iswreg an myghtern. 31Ytho an myghtern eth yn unn fyski dhe dhiserri an ahwer, ow kasa yn y le Andronikus, onan a'n soedhogyon ughel. 32Mes Menelaus, ow tybi bos ganso chons gwiw, a ladras re a lestri owr an tempel ha'ga ri dhe Andronikus; lestri erell, dell hwarva, ev re werthsa dhe Tyr ha sitys kevogas. 33Pan dhyskas Onias yn leun an taklow ma, ev a omdennas dhe dyller a veneghi yn Dafne, ogas dhe Antiogh, ha'y guhudha. 34Rakhenna Menelaus, ow kemmeres Andronikus dhe denewen, a ynnias warnodho ladha Onias. Andronikus a dheuth dhe Onias, ha porposys dhe wul toell, ev a dhos tiow ow ri dhodho y leuv dhyghow; hag yn spit dh'y wogrys ev a'n dynyas dhe dhos yn-mes a'n meneghi; ena, heb gul vri a wirvreus, ev a'n ladhas dison.

Andronikus yw Kessydhys

35Rakhenna nyns o duwenys ha displesys an Yedhewon hepken, mes ynwedh lies a genedhlow erell, drefenn moldrans anewn an gour. 36Pan dhehwelis an myghtern a-dhiworth ranndir Kilikia, Yedhewon an sita a elwis warnodho a-dro dhe voldrans anresnadow Onias, ha'n Grekys ynwedh o kevrennek gansa yn aga has a'n hager-ober. 37Ytho Antioghus o duwenys yn y golonn ha lenwys a druedh, hag a oelas drefenn temprans ha fara da an den marow. 38Y gonnar a dhewis, ha distowgh ev a dhestryppyas goen purpur Andronikus, ha terri y dhillas a-dhiwarno; ena ev a'n hembronkas a-dro dhe oll an sita dhe'n keth tyller may hwrug an outray erbynn Onias, hag ena ev a ladhas an moldrer. Yndellma an Arloedh a attylis dhodho gans an kessydhyans a dhendilas.

Lysimaghus yw Ledhys

39Pan via gwrys lies disakrans y'n sita gans Lysimaghus, skoedhys gans Menelaus, ha pan veu lesys an derivas a-dro, an bobel a omguntellas erbynn Lysimaghus, drefenn bos meur a'n lestri a owr ledrys seulabrys. 40Rag bos routhow an werin amovys lemmyn ha lenwys a sorr, Lysimaghus a ervys a-dro dhe dri mil dhen ha lonchya omsettyans anewn, hembrenkys gans neb unn Awranus, den avonsys yn y vlydhynyow, ha nag o le avonsys yn follenep. 41Mes pan welas an Yedhewon bos Lysimaghus owth omsettya er aga fynn, re anedha a gemmeras meyn, re a gemmeras fustow a brenn, ha re erell dornasow lusu, ha'ga thewlel oll war-barth yn hwyls orth Lysimaghus ha'y dus. 42Yndellma i a bystigas meur anedha, ha ladha re, ha fesya oll an remenant; lader an tempel y honan i a ladhas ogas dhe'n dresorva.

43Kuhudhansow a veu dres erbynn Menelaus a-dro dhe'n hwarvos ma. 44Pan dheuth an myghtern dhe Tyr, tri den dannvenys gans an senedh a bledyas an ken a-ragdho. 45Mes Menelaus, fethys dell o lemmyn, a ambosas falswober meur dhe Ptolemeus mab Dorymenes dhe dhynya an myghtern. 46Ytho Ptolemeus, ow kemmeres an myghtern a-denewen yn portal, par dell o rag ayr yagh, a wrug dhe'n myghtern treylya y vrys. 47Menelaus, kaws an ahwer oll, ev a livras a bub charj er y bynn, mes ev a dhannvonas dhe'n mernans an wer anfeusik neb a via rydhhes andhampnys mar pledsens hwath a-rag Skythysi. 48Ha'n re re gewssa rag an sita ha'n bobel ha'n lestri sans a wodhevis hware kessydhyans anewn. 49Ytho hwath an Tyrysi, ow tiskwedhes aga has a'n drogober, a brovias ragdha ynkleudhyans splann. 50Mes Menelaus, drefenn krefni an re yn galloes, a besyas bos yn y soedh, owth ynkressya yn atti, wosa dos ha bos an arghvraser erbynn y geswlasoryon.