Yason a Assay Daswaynya Yerusalem

1A-dro dhe'n termyn ma Antioghus a bareusis y nessa kaskyrgh erbynn Ejyp. 2Hag y hwarva, rag ogas ha dew-ugens dydh, yth omdhiskwedhas war oll an sita, marghogyon yn dillas a vrosweyth owr ow poenya der an ayr, yn luyow leun ervys gans guwow ha gans kledhedhyow tennys, 3ha luyow marghogyon arayys yn aga rewyow, owth omladh ha gorthomladh an eyl erbynn y gila, palster a wuwow, ow tenna kledhedhyow, ow tewlel sethow, dewynn tegynnow owr, hag arvwisk a bub eghenn. 4Ytho pubonan a bysis an welesigeth dhe vos koel dha.

5Pan veu kyhwedhlys bos marow Antioghus, Yason a gemmeras na le es mil wour ha gul omsettyans war an sita. Pan veu fesys an soudoryon war an fos ha'n sita wortiwedh ogas daskemmerys, Menelaus a fias arta a-ji dhe'n tour. 6Mes Yason a besyas ladha y geswlasoryon y honan yn tibita, heb aswonn bos sewena orth kost an neshevin an brassa falladow; ev a dhesevas an vudhogoleth dhe vos gwaynys war y eskerens a-der war y geswlasoryon. 7Ny wrug ev, byttegyns, gwaynya maystri a'n governans; y'n diwedh ny'n jeva marnas diras a'y dhroktowl, hag ev a fias arta dhe bow an Ammonysi. 8Wor'tiwedh ev a'n jeva diwedh galarek. Kuhudhys a-rag Aretas rewler an Arabyon, ow fia a sita dhe sita, helghys gans pub den oll, kesys avel negedhys erbynn an laghow, ha kasadow avel eskar dh'y vro ha dh'y geswlasoryon, ev a veu fesys bys yn Ejyp. 9Ena ev neb a fesyas lies a'ga thir aga honan yn divroedh a verwis yn tir estren, wosa mos yn-bann bys yn pow an Lakedemonysi ha govenek dhodho kavoes gweres drefenn aga bos neshevin. 10Ev neb re dowlsa lies yn-mes dhe wrowedha heb bedh ny'n jeva nagonan dhe gyni ragdho; ny'n jeva ynkleudhyans a eghenn vyth na tyller yn bedh y dasow.

11Pan dheuth dhe'n myghtern nowodhow a'n pyth a hwarva, ev a dybis bos Yudi ow rebellya. Ytho konneryek y vrys, ev a asas Ejyp ha kemmeres an sita dre nerth arvow. 12Ev a worhemmynnis dh'y soudoryon treghi dhe'n dor pubonan a vetsons, ha ladha an re a dhienkas dh'aga chiow. 13Ena yth esa ladhva a yowynk ha hen, distruyans mebyon, benynes ha fleghes, ha difeudhans mowesi yowynk ha babanes. 14A-ji dhe dri dydh peswar-ugens mil a veu distruys, dew-ugens mil yn omladh, ha dhe'n lyha kemmys gwerthys yn kethneth dell via ledhys.

Pyllans an Tempel

15Ny veu na hwath lowen, mes Antioghus a vedhas entra y'n sansa tempel y'n bys, gidys gans Menelaus neb re bia traytour dhe'n laghow ha dh'y vro. 16Ev a gemmeras an lestri sans gans y dhiwleuv dhefolys, ha ri dhe-ves gans diwleuv ansans an rohow sakrys gwrys gans myghternedh erell rag moghhe glori hag enor an tyller. 17Antioghus o goethus yn y spyrys, ha ny brederis bos serrys an Arloedh rag pols drefenn peghosow an re esa trigys y'n sita, ha bos hemma an skila na wre vri a'n tyller sans. 18Mes mar ny hwarva aga bos omvyskys yn lies pegh, an den ma a vedha kastigys ha treylys a'y wrians diswar kettell dheuth yn-rag, kepar dell veu Heliodorus, a veu dannvenys gans Selewkus dhe hwithra an dresorva. 19Mes ny dhewisas an Arloedh an genedhel a-barth an tyller sans, mes an tyller a-barth an genedhel. 20Ytho an tyller y honan a gevrennas y'n anfeus a goedhas war an genedhel, hag a-wosa ev a gemmeras rann yn y feus da; ha'n pyth o eskesys yn sorr an Ughella a veu daskorrys arta yn oll y wolewder pan veu unnverhes an Arloedh meur

21Ytho Antioghus a dhug etek kans talent a-dhiworth an tempel, ha fyski bys yn Antiogh, ow tybi yn y valghder y hylli goelya war an tir ha kerdhes war an mor, drefenn y vrys howtyn. 22Ev a asas governours dhe arwaska an bobel: yn Yerusalem, Felip, genesik a Frygia, hag yn gnas moy barbarus es an den a'n apoyntyas; 23hag yn Gerizim, Andronikus; ha keffrys Menelaus, gweth ages an re erell, neb a lordyas war y geswlasoryon. Yn y atti war-tu an Yedhewon, 24Antioghus a dhannvonas Apollonius, kapten an Mysianys, gans lu a dew vil warn ugens, ha gorhemmynn dhodho ladha pub gour tevys dhe oes ha gwertha an benynes ha'n vebyon avel kethyon. 25Pan dheuth an gour ma yn Yerusalem, ev a omwrug bos den a gres ha gortos bys yn dydh sans an sabot; ena ow kavoes nag esa an Yedhewon owth oberi, ev a erghis dh'y soudoryon kemmeres aga arvow yn-bann ha keskerdhes. 26Ev a worras dhe'n kledha pubonan a dheuth yn-mes dh'aga gweles; ena ev a fyskas y'n sita gans y vreselysi ervys ha ladha niverow meur a dus.

27Mes Yudas Makkabeus, gans naw arall po a-dro, a dhienkas dhe'n gwylvos, ha triga y'n menydhyow avel an enyvales gwyls gans y gowetha; i a besyas bewa orth losow hepken, rag omwitha dhiworth defolans.