An Yedhewon yn-dann Arwask

1Ny veu pell wosa hemma, y tannvonas an myghtern den koth a Athenys6:1 den koth a Athenys: po den a Athenys henwys Geron, po senedher a Athenys. dhe gonstryna an Yedhewon mayth eskassens laghow aga thasow ha na fella bewa war-lergh laghow Duw. 2Ynwedh ev a dheuth dhe dhefola an tempel yn Yerusalem ha dh'y henwel tempel Zeus Olympius, ha dhe henwel an sentri yn Gerizim tempel Zeus Koweth Estrenyon, kepar dell wre an bobel esa trigys y'n tyller na.

3Asper hag ankensi fest o dallethvos an drogedh. 4Rag an tempel o lenwys a harlotri ha kevewiow gwyls gans an Jentilys. I a drufla gans horys ha growedh gans benynes a-ji dhe oryon an sentri, ha dres hemma dri a-ji pythow anwiw rag sakrifis. 5An alter o kudhys gans offrynnow kasadow hag o difennys gans an laghow. 6Ny ylli den gwitha an sabot, na solempnya goelyow y dasow, na hwath avowa y vos Yedhow.

7Yn solempnyans misyek penn-bloedh an myghtern, i a veu kemmerys yn-dann gonstrynans hwerow dhe dhybri a'n sakrifisow; ha pan vedha solempnys goel Dionysus kompellys vons gwiska tergh idhyow ha mos yn keskerdh dhe enora Dionysus. 8Orth profyans tus Ptolemais arghadow a veu dyllys dhe sitys grek kevogas mayth holyens an keth gisyow ha gul dhedha dybri a'n sakrifisow, 9ha may hworrens dhe'n mernans an re na dhewisas treylya dhe vanerow grek. Y hyllys gweles ytho, an anken o devedhys warnedha. 10Rag ensampel, diw venyn a veu dres dhe'n vreuslys drefenn trodreghi aga fleghes. I a gerdhas gansa a-dro dhe'n sita, aga babanes kregys orth aga bronnow, hag ena aga deghesi yn-nans a-dhiworth an fos. 11Re erell omguntellys y'n fowys yn ogas, rag merkya an seythves dydh yn kevrinek, a veu traytys dhe Felip hag a veu leskys war-barth, drefenn aga sansoleth dh'aga gwitha a omdhefendya, herwydh aga revrons dhe'n jydh a'n moyha sans.

Kessydhyans rag Dyskybla an Yedhewon

12Lemmyn my a bys an re a red an lyver ma, ma na vons digolonnek drefenn an terroesow ma, mes aswonn bos an kessydhyansow ma reknys a-der dhe dhistrui agan kenedhel mes dh'y dyskybla. 13Yn hwir yth yw tokyn a guvder meur ma nag yw gesys an re ansans aga honan termyn hir, mes aga hessydhyans a dheu warnedha a-dhiwhans. 14Rag gans kenedhlow erell an Arloedh a worta gans perthyans dh'aga hessydhya bys pan dhrehedhons dhe leunder aga feghosow; mes ny dhyght genen ni y'n fordh ma, 15rag na dallo dial warnan a-wosa, pan dhrehedhas agan peghosow dh'aga ughboynt. 16Yndellma ny dhaskemmer nevra y dregeredh a-dhiworthyn. Kyn y'gan dyskybel gans terroesow, ny eskas y bobel y honan. 17Bedhes an pyth re leversyn kovadh; res yw pesya gans an hwedhel war verr lavarow.

Mertherynsi Eleazar

18Yth esa Eleazar, onan a'n skribys a'n brassa bri, gour lemmyn avonsys yn y vlydhynyow, ha bryntin y semlans, ow pos konstrynys dhe igeri y anow dhe dhybri kig mogh. 19Mes ev, ow tewis mernans gans enor dres bewnans gans defolans, a drewas an kig yn-mes ha mos dhe'n rastell a'y vodh, 20dell goedh dhe beub a's teves an kolonnekter dhe nagha taklow nag yw ewn aga blasa, yn despit dhe kerensa enesik dhe sawya aga bewnans.

21An re charjys gans an sakrifis anlaghel na a gemmeras an den a-denewen drefenn aga aswonnvos hir anodho, hag ynnia warnodho yn privedh dri kig a'y brovians y honan, laghel dhodho y usya, hag omwul y vos ow tybri kig an boes sakrifisek re bia erghys gans an myghtern, 22may fo sawys yndella a'n mernans, ha bos dyghtys yn kuv drefenn y gowethyans hir gansa. 23Mes ow kul ervirans ughel dell o gwiw dh'y vlydhynyow ha reowta y henys ha'n vlew loes re dhothya dhedha gans bri ha'y fara bryntin hwath a-dhia flogholeth, ha dres henna herwydh lagha sans res gans Duw, ev a worthybis dison orth aga leverel dh'y dhannvon distowgh dhe'n bedh.

24‘Nyns yw gwiw fugyans a'n par ma yn agan bloedh ni’, yn-medh ev, ‘rag lies a'n bobel yowynk dhe dybi bos Eleazar yn y dhegves blydhen ha peswar-ugens gyllys dhe gryjyans estren, 25ha der ow fugyans, rag bewa pols berr pella, i a via ledys yn sowdhan dredhov, ha my ow tefola ha disenora ow hothni. 26Rag hwath y'n termyn ma mar kohelav kessydhyans denel, hwath mar pewiv po mar merwiv, ny dhiankav a dhiwleuv an Arloedh. 27Ytho dre hepkorr ow bewnans yn hardh lemmyn, my a omdhiskwedh gwiw dhe'm kothni 28ha kemmynna dhe'n bobel yowynk ensampel nobyl dhe verwel gans mernans da bolonjedhek ha nobyl rag an laghow enorys ha sans.’

Wosa leverel hemma ev eth dison dhe'n rastell. 29An re re dhiskwedhsa bodh da dhodho termyn berr kyns a dreylyas lemmyn dhe dhrogvrys, drefenn an geryow kewsys ganso o muskogneth pur dell dybsons. 30Pan o ogas dhe verwel yn-dann an strokosow, ev a hanasas yn ughel ha leverel: ‘Hewel yw dhe'n Arloedh yn y skentoleth sans, kyn fen livrys a'n mernans, y porthav duwon euthyk yn-dann an kastik ma, mes y'm enev yn lowen my a wodhev an taklow ma, drefenn y'm beus own anodho.’

31Ytho yndellma ev a verwis, ow kasa yn y vernans ensampel a golonnekter, ha kovadh a vertu, na dhe'n re yowynk yn unnik mes dh'y genedhel oll.