Diwettha Kaskyrgh Antioghus

1A-dro dhe'n termyn na, dell hwarva, Antioghus re gildennsa yn disenor a bow Persia. 2Ev re dhothya a-ji dhe sita henwys Persepolis hag assaya pylla an templow ha gul maystri war an sita. Ytho an bobel a fistenas dhe omdhefendya gans arvow, hag Antioghus ha'y lu a veu fethys, may feu Antioghus gorrys dhe'n fo gans an annedhysi ha kila gans meth. 3Pan esa ogas dhe Ekbatana nowodhow a dheuth dhodho a'n pyth a hwarva dhe Nikanor ha luyow Timothi. 4Kwoffys gans konnar, ev a dybi diella war an Yedhewon an pystik gwrys gans an re a'n gorras dhe'n fo; ytho ev a worhemmynnis dh'y jaretter lewya heb hedhi bys pan worfenna an vyaj. Mes barn nev a'n siwyas! Rag yn y valghder ev a leveris, ‘Pan dhov di my a wra Yerusalem ynkleudhva gemmyn dhe'n Yedhewon.’

5Mes an Arloedh neb a wel pup-tra, Duw Ysrael, a'n gweskis gans pla anwelys, na yllys y yaghhe. Kettell astelas y gows gloes a'n kemmeras y'n kolodhyon heb difresyans dhodho, ha gans torment gluw pervedhel; 6ha pur ewn o henna, rag ev dhe dormentya kolodhyon tus erell gans lies torment ankoth. 7Byttegyns ny astelas y donteth kammenn vyth, mes hwath moy lenwys veu a valghder, owth anella tan yn y sorr erbynn an Yedhewon, hag ow ri arghadow dhe lewya hwath uskissa. Hag yndella y hwarva ev dhe goedha yn-mes a'y jaret dell esa ow fyski yn-rag, hag a feu an koedh mar gales may paynyas pub esel a'y gorf. 8Ytho ev, neb a grysi termyn berr kyns yn y valghder a-ugh studh mab-den ev dhe alloes gorhemmynna dhe donnow an mor, hag a dybi ev dhe alloes poesa an menydhyow ughel yn mantol, a veu tewlys dhe'n dor ha degys yn gravath, ow kul galloes Duw hewel dhe beub. 9Hag yndellma pryves a hesyas war gorf an gour ansans, hag ev hwath yn few yn angoes ha gloes y gig a bedras, ha drefenn an fler oll an lu a dhivlasas orth y besogeth. 10Drefenn an fler anporthadow ny ylli denvyth doen an gour re gryssa termyn berr kyns y hylli tochya ster an nev. 11Ena ytho, terrys y spyrys, ev a dhallathas gasa y valghder ha dos dh'y skians yn-dann skorja Duw, rag y vos tormentys gans payn pub pols. 12Ha pan na allas perthi y fler y honan, ev a leveris an geryow ma, ‘Ewn yw bos gostydh dhe Dhuw; ny dal dhe dhensys marwel tybi y vos par dhe Dhuw.’

Antioghus a Wra Ambos dhe Dhuw

13Ena an gwas kasadow a wrug ambos orth an Arloedh, neb na vynnas kemmeres truedh warnodho na fella, ow leverel, 14ev dhe livra an sita sans may fia ow fistena dhedhi dh'y levna dhe'n leur ha gul ynkleudhva gemmyn; 15ha'n Yedhewon, na vreusi gwiw dhe vos ynkleudhys, mes dhe vos tewlys yn-mes gans aga fleghes rag an goedhviles ha'n ydhyn dh'aga dybri, ev a's gwre oll par dhe vurjysi Athenys; 16ha'n sentri sans a byllsa seulabrys, ev a vedha orth hy afina gans offrynnow a'n tekka; ha daskorra oll an lestri sans, gans lies moy; ha provia an kostow rag an sakrifisow a'y arghasow y honan; 17ha keffrys ha hemma ev a vedha ow tos ha bos Yedhow y honan, ha mos dhe bub tyller annedhys dhe dheklarya galloes an Arloedh. 18Mes pan na lehas y wodhevyansow yn fordh vytholl, rag barn Duw re dhothya yn ewn warnodho, ev a hepkorras pub govenek ragdho ev y honan ha skrifa dhe'n Yedhewon an lyther a siw, yn furv aspysadow, war-lergh an vaner ma.

Lyther Antioghus dhe'n Yedhewon

19‘Dh'y vurjysi wiw Yedhowek, Antioghus aga myghtern ha kaslewydh a dhannvon gorhemmynnadow kolonnek ha bolonjedh da rag aga yeghes ha sewena. 20Re bo hwi ha'gas fleghes yn poynt da, ha'gas negysyow par dell vynnowgh. Dell usi ow govenek y'n nev, 21my a berth kov gans hegaredh a'gas enor dhymm ha'gas bodh da. Pan dhehwelis a ranndir Persia, my a wodhevis kleves ankensi, ha barna bos edhomm prederi orth sawder kemmyn pubonan. 22Nyns ov digolonnek y'm yeghes, rag govenek bras a'm beus diank a'm kleves, 23mes owth ombrederi ow thas ynwedh, pan esa owth hembronk lu y'n tiryow ughel dhe apoyntya her, 24ma na ve troblys tus an wlaskor, mar hwarva neppyth anwaytys po mar teuth nowodhow anfeusik, rag i dhe wodhvos dhe biw y fedha gesys an governans. 25Keffrys my a gonvedh fatell wra an bennsevigyon y'n ordiryow ha kentrevogyon ow gwlaskor pesya hwilas chonsyow ha gortos dhe weles pandr'a hwer. Ytho my re apoyntyas ow mab Antioghus dhe vos myghtern, neb a fydhis ynno ha'y gommendya dhe'n brassa rann ahanowgh pan fyskas dhe'n rannvroyow ughella; ha my re skrifas dhodho an pyth yw skrifys omma. 26My a ynni warnowgh ytho ha'gas pysi perthi kov a'n difresow re wrug vy dhywgh yn kemmyn, hag onan hag onan, ha may pessyo pub den lel dhymmo vy ha dhe'm mab. 27Rag my yw sur ev dhe holya ow brys ha'gas dyghtya gans temprans ha kuvder.’

28Ytho an moldrer ha blasfemer, wosa godhevel duwon a'n moyha tynn, par dell dhyghtsa re erell, a dheuth dhe dhiwedh y vewnans dre denkys truedhek, yn mysk an menydhyow yn tir estren. 29Ha Felip, onan a'y lyswesyon, a dhug y gorf dhe dre; ena, ow perthi own a vab Antioghus, ev a gildennas dhe Ptolemi Filometor yn Ejyp.