Ambos Devedhyans Krist

1Hemm yw an nessa lyther, lemmyn, a skrifav dhywgh, karadowyon, hag y'n dhew anedha my a dhifun agas brys lel yn unn govhe, 2dhe remembra an lavarow a veu kewsys kyns gans an brofoesi sans, hag a worhemmynn agas Arloedh ha Selwyas der agas abesteli. 3Godhvydhewgh hemma kyns oll: y'n dydhyow diwettha y hwra dos gesyoryon ow kul ges, ow kerdhes war-lergh aga drokhwansow i, 4hag ow leverel, ‘Ple'ma ambos y dhevedhyans? Rag a-dhiworth an jydh may koedhas yn kosk an tasow, pup-tra a bys yndella dhiworth dalleth kreasyon.’ 5Rag i a ankev a borpos bos an nevow ow pos nans yw pell, ha nor dhe vos synsys war-barth dre dhowr ha gans dowr dre lavar Duw; 6dredha an bys a'n termyn na a veu beudhys gans dowr ha distruys. 7Mes an nevow ha'n nor a'n termyn ma re beu gwithys der an keth ger rag tan, synsys bys dydh breus, ha diswrians an re dhidhuw.

8Mes na vedhes an unn dra ma kudhys dhiworthowgh, karadowyon: unn jydh gans an Arloedh yw kepar ha mil vlydhen, ha mil vlydhen kepar hag unn jydh. 9Nyns yw syger an Arloedh a-dro dh'y ambos, dell syns nebes tus sygerneth dhe vos, mes yma ganso hirwodhevyans yn agas kever, heb mynnes denvyth dhe vos diswrys, mes pub den dhe dhos dhe edrek. 10Mes dydh an Arloedh a dheu kepar ha lader,3:10 lader: War-lergh re a'n dornskrifow lader y'n nos. hag ynno an nevow a wra tremena gans tros ughel hwyflyn, ha'n elvennow ow leski a vydh teudhys, ha'n norvys ha'n gwriansow usi ynno a vydh diskudhys.3:10 diskudhys: War-lergh re a'n dornskrifow leskys, po distruys.

11Ha'n taklow ma oll diswrys yndella, py par tus y koedh dhywgh hwi bos yn bewedh sans ha duwek, 12ow kortos ha spedya devedhyans dydh Duw, dredho may fydh nevow diswrys gans tan, ha'n elvennow ow leski a wra teudhi? 13Mes ni a wra gortos nev nowydh ha nor nowydh war-lergh y ambos, may trig ewnder ynna.

14Ytho, karadowyon, a-ban esowgh ow kortos an taklow ma, bedhewgh diwysyk, dhe vos kevys ganso dinamm ha divlam, yn kres. 15Ha synsewgh hirwodhevyans agan Arloedh dhe vos selwyans, kepar dell skrifas dhywgh agan broder karadow Powl, war-lergh an furneth a veu res dhodho, 16kepar dell skrif ynwedh yn oll y lytherow, ow kewsel ynna a-dro dhe'n taklow ma. Ynna yma taklow yw kales dhe gonvedhes, may ma an re dhidhysk ha'n re heb faster orth aga stumma, ha'n skryptors erell ynwedh, dh'aga diswrians aga honan. 17Ytho hwi, karadowyon, ow kodhvos kyns, bedhewgh war na vowgh dres yn tebelgryjyans an re dhilagha, na koedha dhiworth agas faster hwi. 18Mes tevewgh yn gras ha godhvos agan Arloedh ha Selwyas Yesu Krist. Dhodho ev re bo gordhyans hag y'n eur ma, ha bys y'n jydh heb worfenn. Amen.