Davydh a Gyn rag Sowl ha Yonathan

1Wosa mernans Sowl, pan dhehwelis Davydh dhiworth ladhva an Amalekysi, Davydh a wortas dew dhydh yn Siklag. 2Y'n tressa dydh, gour a dheuth yn-mes a gamp Sowl gans y dhillas skwardys, ha gans dor war y benn. Pan dheuth dhe Davydh, ev a goedhas dhe'n leur hag omblegya. 3Yn-medh Davydh dhodho, ‘A-ble osta devedhys?’ Ev a worthybis, ‘My re dhienkas yn-mes a gamp Ysrael.’ 4Ha Davydh a wovynnas orto, ‘Pandr'a hwarva? My a'th pys, lavar dhymm.’ Ev a worthybis, ‘An bobel a fias dhiworth an vatel, hag ynwedh lies anedha a goedhas ha merwel; ha Sowl ha'y vab Yonathan ynwedh a verwis.’ 5Ena Davydh a wovynnas orth an gour yowynk neb a dherivas orto, ‘Fatell wodhes Sowl ha'y vab Yonathan dhe verwel?’ 6Ha'n gour yowynk neb a dherivas orto a leveris, ‘Par happ yth esen war venydh Gilboa, hag ottena Sowl ow poesa war y wuw, ha'n charettow ha'n varghogyon ow tos nes dhodho. 7Pan dreylyas a-dro, ev a'm gwelas, ha gelwel dhymm, ha my a worthybis, “Ottavy syrra.” 8Yn-medh ev dhymm, “Piw osta?” Ha my a worthybis dhodho, “Amalekyas ov.” 9Hag ev a leveris dhymm, “Sav a-ughov my a'th pys, ha ladh vy; rag penn-dro re'm dalghennas, kynth usi ow bewnans hwath ynnov.” 10Ytho my a sevis a-ughto, ha'y ladha, drefenn ow bos sur na ylli bewa wosa ev dhe goedha. My a gemmeras an gurun esa war y benn, ha'n breghellik esa war y vregh, ha my re's dros omma dhe'm arloedh.’

11Ena Davydh a settyas dalghenn yn y dhillas, ha'ga skwardya; hag oll an wer esa ganso a wrug yn kettella. 12I a gynis hag oela ha penys bys gorthugher rag Sowl ha rag y vab Yonathan, ha rag pobel an Arloedh, ha rag chi Ysrael, drefenn i dhe goedha dre an kledha. 13Davydh a leveris dhe'n gour yowynk a dherivas orto, ‘A-ble os?’ Hag ev a worthybis, ‘My yw mab alyon, Amalekyas.’ 14Ha Davydh a leveris dhodho, ‘A ny berthsys own a ystynn dha dhorn dhe dhistrui untys an Arloedh?’ 15Ena Davydh a elwis dhe onan a'n wer yowynk ha leverel, ‘Deus omma ha koedh warnodho.’ Ytho ev a'n gweskis dhe'n leur hag ev a verwis. 16Yn-medh Davydh dhodho, ‘Bedhes dha woes war dha benn dha honan; rag dha anow re dhustunias er dha bynn, ow leverel, “My re ladhas untys an Arloedh.” ’

17Ha Davydh a gynis gans an kynvann ma war Sowl ha war y vab Yonathan. 18Ev a worhemmynnis may fo dyskys dhe vebyon Yuda;1:18 Ow siwya an Septuagint. War-lergh an tekst ebrow yma omma an geryow an warak. awotta, skrifys yw yn lyver Yashar:

19Dha splannder, a Ysrael yw ledhys war dha dylleryow ughel:

ass yw an gasoryon koedhys!

20Na wrewgh y leverel yn Gath,

na wra y dhyllo yn stretow Ashkelon;

ma na lowenhaho myrghes an Filistysi,

ma na heudhhaho myrghes an re antrodreghys.

21A venydhyow Gilboa,

na vedhes naneyl gluth na glaw warnowgh,

na gwelyow a offrynnow!1:21 na gwelyow a offrynnow: Po amendyans hwythfians an downderyow.

rag ena skoes an gasoryon a veu defolys,

skoes Sowl – nyns yw untys gans oyl namoy.

22Dhiworth goes an re ledhys,

dhiworth blonek an gasoryon,

ny wrug gwarak Yonathan treylya dhe-ves,

na ny dhehwelis kledha Sowl gwag.

23Sowl ha Yonathan, yn aga bewnans meurgerys ha jentyl,

hag yn mernans nyns ens rynnys;

skaffa es eryon ens,

kreffa es lewyon ens.

24A vyrghes Ysrael, oelewgh rag Sowl,

neb a'gas dillesas gans pann kogh, gans taklow fethus,

hag a worras tegennow a owr war agas dillas.

25Ass yw dha gasoryon koedhys

yn kres an vatel!

Yonathan yw koedhys war dha dylleryow ughel, ledhys.

26Grevys ov ragos, ow broder Yonathan;

meurgerys genev es'ta;

marthys o dha gerensa dhymm,

moy es kerensa benynes.

27Ass yw dha gasoryon koedhys,

hag arvow bresel distruys!