Profoesans Nathan erbynn Davydh

1An Arloedh a dhannvonas Nathan dhe Davydh. Ev a dheuth dhodho, ha leverel dhodho, ‘Yth esa dew wour yn neb unn sita, an eyl rych ha'y gila boghosek. 2Yth esa dhe'n golusek niver bras a flokkys ha chatel; 3mes nyns esa dhe'n boghosek travyth marnas unn oenes vyghan, re brensa. Ev a's magas, ha hi a devis ganso ha gans y fleghes; hi a dhybri a'y bastell, hag eva a'y hanaf, ha growedha yn y askra, ha hi o kepar ha myrgh dhodho. 4Hag y teuth tremenyas dhe'n golusek, mes ny'n jevo an golonn dhe gemmeres a'y flokkys y honan na'y jatel dhe bareusi rag an tremenyas neb re dhothya dhodho, mes ev a gemmeras oenes an boghosek, ha'y fareusi rag an gour re dhothya dhodho.’ 5Ena sorr Davydh a dhewis yn toemm erbynn an gour. Ev a leveris dhe Nathan, ‘Dell vew an Arloedh, an gour neb re wrug hemma a dhervynn an mernans; 6res yw ev dhe dhaskorra an oenes pedergweyth, drefenn ev dhe wul hemma, ha drefenn nag esa dhodho truedh vyth.’

7Ena yn-medh Nathan dhe Davydh, ‘Ty yw an gour. Yndellma y lever an Arloedh, Duw Ysrael: My a'th untyas myghtern war Ysrael, ha my a'th telivras yn-mes a leuv Sowl. 8My a ros dhis chi dha vester, ha gwragedh dha vester yn dha askra, ha ri dhis chi Ysrael ha Yuda; ha mar pe henna re vyghan, my a rosa dhis kemmys moy. 9Prag y tispressys ger an Arloedh, dhe wul an drog yn y wolok? Ty re weskis Uria an Hittyas gans an kledha, ha kemmeres y wreg dhe vos dha wreg, ha'y ladha gans kledha an Ammonysi. 10Rakhenna ny dreyl an kledha nevra dhiworth dha ji, rag ty re'm dispresyas, ha kemmeres gwreg Uria an Hittyas dhe vos dha wreg. 11Yndellma y lever an Arloedh: Awotta, my a dhrehav drog warnas yn-mes a'th chi; ha my a gemmer dha wragedh dherag dha dhewlagas, ha'ga ri dhe'th kentrevek, hag ev a wrowedh gans dha wragedh yn golok an howl ma. 12Rag ty a'n gwrug yn-dann gel; mes my a wra hemma a-rag oll Ysrael, hag a-rag an howl.’ 13Hag yn-medh Davydh dhe Nathan, ‘My re beghas erbynn an Arloedh.’ Ha Nathan a leveris dhe Davydh, ‘Lemmyn an Arloedh re worras dhe-ves dha begh; ny verwydh. 14Byttegyns, drefenn ty dhe skornya glan an Arloedh der an ober ma, an mab yw genys dhis a verow.’

Mab Bathsheba a Verow

15Ena Nathan eth dh'y ji. Ha'n Arloedh a weskis an mab a dhineythis gwreg Uria dhe Davydh, hag ev o pur glav. 16Ytho Davydh a bysis war Dhuw rag an mab; Davydh a benysas, ha mones a-ji ha growedha dres nos war an dor. 17Henavogyon y ji a sevis a-ughto, dh'y dhrehevel dhiworth an dor; mes ny vynnas, na ny dhybris boes gansa. 18Y'n seythves dydh an mab a verwis. Ha gwesyon Davydh a borthas own a dherivas orto bos y vab marow; rag i a leveris, ‘Awotta, pan o an mab yn few, ni a gewsis dhodho, ha ny woslowas orthyn; ytho fatell yllyn derivas orto bos y vab marow? Ev a wra neppyth drog dhodho y honan.’ 19Mes pan welas Davydh bos y wesyon ow hwystra war-barth, ev a wodhva bos y vab marow; ha Davydh a leveris dh'y wesyon, ‘Yw an flogh marow?’ Hag i a worthybis, ‘Marow yw.’

20Ena Davydh a sevis a'n dor, hag omwolghi, hag ura y honan, ha chanjya y dhillas. Ev eth a-ji dhe ji an Arloedh, ha gordhya; ena ev eth dh'y ji y honan; ha pan wovynnas, i a settyas boes dheragdho hag ev a dhybris. 21Ena y wesyon a leveris dhodho, ‘Pandr'yw hemma re wruss'ta? Ty a benysas hag oela rag an flogh pan o ev yn few; mes pan verwis an flogh, ty a sevis ha dybri boes.’ 22Yn-medh ev, ‘Pan o an flogh hwath yn few, my a benysas hag oela; rag my a leveris, “Piw a woer mara pydh an Arloedh grassyes dhymm, may fewo an flogh?” 23Mes lemmyn ev yw marow; prag y tegoedh dhymm penys? A allav vy y dhri dhe-dre dhymm arta? Yth av vy dhodho, mes ny dhehwel ev dhymm.’

Dineythyans Solomon

24Ena Davydh a gonfortyas Bathsheba y wreg, ha mones dhedhi, ha growedha gensi; ha hi a dhineythis mab, ha'y henwel Solomon. Drefenn an Arloedh dh'y gara, 25ev a dhannvonas ger dre leuv Nathan an profoes, ev dhe vos henwys Yedidia,12:25 Yedidia: Styr an hanow yw an ARLOEDH a'n karas. a-barth an Arloedh.

Davydh a Gemmer Rabba

26Lemmyn Yoab a vatalyas orth Rabba an Ammonysi, ha kemmeres an sita ryel. 27Yoab a dhannvonas kannasow dhe Davydh, ha leverel. ‘My re vatalyas orth Rabba; ynwedh my re gemmeras kastell an dowrow. 28Lemmyn kuntell remenant an bobel war-barth, ha kamp erbynn an sita, ha kemmer hi; poken my a gemmer an sita, ha hi a vydh henwys war-lergh ow hanow vy.’ 29Ytho Davydh a guntellas oll an bobel war-barth ha mones dhe Rabba, ha batalyas orti ha'y hemmeres. 30Ev a gemmeras kurun aga myghtern dhiworth y benn; ha'y foes o talent a owr, hag yth esa ynni men drudh; ha hi a veu gorrys war benn Davydh. Ynwedh ev a dhros yn-mes preydh an sita, kals bras. 31Ev a dhros yn-mes an bobel esa ynni, ha'ga settya dhe lavur gans heskennow, ha pigellow a horn, ha boelyow a horn, hag ev a's gorras dhe lavur orth an kowynnow-brykk. Yndella y hwrug dhe oll sitys an Ammonysi. Ena Davydh hag oll an bobel a dhehwelis dhe Yerusalem.