Absalom a Dhehwel dhe Yerusalem

1Lemmyn Yoab mab Seruya a welas bos kolonn an myghtern war Absalom. 2Ytho Yoab a dhannvonas dhe Tekoa ha kyrghes alena benyn fur, ha leverel dhedhi, ‘My a'th pys, omwra kynores, ha gwisk yn dillas kynvann, ha na wra untya dha honan gans oyl, ha bydh avel benyn re beu ow kyni lies dydh rag den marow: 3ha ke dhe'n myghtern ha kows yndellma dhodho.’ Ytho Yoab a worras an geryow yn hy ganow.

4Pan dheuth an Tekoyades dhe'n myghtern, hi a goedhas war hy fas dhe'n dor hag omblegya, ha leverel, ‘Gweres dhymm, A vyghtern!’ 5An myghtern a wovynnas orti, ‘Pandr'yw dhis?’ Hi a worthybis, ‘Ellas, gwedhwes ov; ow gour yw marow. 6Yth esa dhe'th vaghteth dew vab, hag i a omladhas an eyl erbynn y gila y'n gwel, ha nyns esa denvyth dh'aga diberth, ha'n eyl a weskis y gila ha'y ladha. 7Hag, otta, an teylu oll re dhrehevis erbynn dha vaghteth, hag i re leveris, “Delirv yn-bann ev neb a weskis y vroder, may hyllyn y worra dhe'n mernans rag bewnans y vroder a ladhas; ha ni a dhistru an her ynwedh.” Yndella y tifeudhons ow holenn vew yw gesys, ha ny as dhe'm gour naneyl hanow na remenant war enep an norvys.’

8Ena yn-medh an myghtern dhe'n venyn, ‘Ke dhe'th chi, ha my a re gorhemmynnow a-dro dhis.’ 9Ha'n Tekoyades a leveris dhe'n myghtern, ‘A arloedh ow myghtern, bedhes an kabel warnav, ha war ji ow thas; bedhes an myghtern ha'y dron ankablus.’ 10Yn-medh an myghtern, ‘Piwpynag a lavarro neppyth dhis, ro ev dhymm, ha ny wra dha dochya arta.’ 11Ena yn-medh hi, ‘My a'th pys, perthes an myghtern kov a'n Arloedh dha Dhuw, ma na allo dialoryon an goes ladha arta, ha ny dhistruons ow mab.’ Yn-medh ev, ‘Dell vew an Arloedh, ny goedh blewenn vyth a'th vab dhe'n dor.’

12Ena an venyn a leveris, ‘Gas dha vaghteth, my a'th pys, dhe gewsel ger dhe'm arloedh an myghtern.’ Hag yn-medh ev, ‘Kows.’ 13Ha'n venyn a leveris, ‘Ytho prag y tevisys yndella erbynn pobel Duw? Rag ow kewsel yndella, an myghtern a dhampen y honan, drefenn na dhre an myghtern dhe-dre arta an den a dhivroas. 14Yn sur ni oll a verow, kepar ha dowr skoellys war an dor, na yll bos kuntellys. Mes Duw ny gemmer bewnans dhe-ves; yn le henna ev a dhevis fordhow 15Lemmyn my re dheuth dhe leverel hemma dhe'm arloedh an myghtern drefenn an bobel dhe wul dhymm berthi own; ha'th vaghteth a leveris, “My a gews dhe'n myghtern; martesen an myghtern a wront govynnadow y vaghteth. 16Rag an myghtern a vynn klewes, ha delivra y vaghteth dhiworth dorn an gour neb a vynn ow distrui vy ha'm mab war-barth dhiworth eretons Duw.” 17Lemmyn dha vaghteth a lever, “Re rollo ger ow arloedh an myghtern powesva dhymm, rag avel el Duw, yndella yw ow arloedh an myghtern ow tissernya yntra da ha drog. Re bo an Arloedh dha Dhuw genes.” ’

18Ena an myghtern a worthybis ha leverel dhe'n venyn, ‘Na with dhiworthiv, my a'th pys, travyth a wovynnav orthis.’ Hag yn-medh an venyn, ‘Gwres ow arloedh an myghtern kewsel.’ 19Ha'n myghtern a leveris, ‘A nyns usi leuv Yoab genes yn oll hemma?’ Ha'n venyn a worthybis ha leverel, ‘Kepar dell vewydh, ow arloedh an myghtern, ny yllir treylya dhe'n dyghow na dhe'n kledh dhiworth travyth re leveris ow arloedh an myghtern. Rag dha was Yoab, ev a erghis dhymm, hag ev a worras oll an geryow ma yn ganow dha vaghteth. 20Rag settya an mater a-ragos yn fordh dihaval y hwrug dha was Yoab hemma. Mes ow arloedh yw fur, war-lergh furneth el Duw dhe wodhvos pup-tra eus y'n pow.’

21Ena an myghtern a leveris dhe Yoab, ‘Otta lemmyn, my a wront hemma; ke ha dro dhe-dre an gour yowynk Absalom.’ 22Yoab a goedhas war y fas dhe'n dor hag omblegya, ha benniga an myghtern; hag yn-medh Yoab, ‘Hedhyw dha was a woer my dhe gavoes gras y'th wolok, ow arloedh, A vyghtern, drefenn an myghtern dhe wrontya govynnadow y was.’ 23Ytho Yoab a sevis ha mones dhe Geshur, ha dri Absalom dhe Yerusalem. 24Mes yn-medh an myghtern, ‘Gwres ev treylya dh'y ji y honan; ny wel ow fas.’ Ytho, Absalom eth dh'y ji y honan, ha ny wrug ev gweles fas an myghtern.

Davydh a Av dhe Absalom

25Mes yn oll Ysrael nyns esa denvyth moy kanmelys rag y dekter ages Absalom; dhiworth godhen y droes bys yn gwartha y benn nyns esa namm vyth ynno. 26Pan dreghi blew y benn (rag orth penn pub blydhen ev a'n treghi; pan esa y vlew poes warnodho, ev a'n treghi), ev a'n poesa, ha'y boester o dewkans shekel war-lergh poes an myghtern. 27Tri mab a veu dineythys dhe Absalom, hag unn vyrgh, ha'y hanow Tamar; hi o benyn deg hy semlans.

28Ytho yth esa Absalom trigys diw vlydhen yn Yerusalem, ha ny welis fas an myghtern. 29Ena Absalom a dhannvonas war-lergh Yoab dh'y dhannvon dhe'n myghtern, mes ny vynnas dos dhodho. Hag ev a dhannvonas nessa gweyth, mes ny vynnas dos. 30Ena yn-medh dh'y wesyon, ‘Gwelewgh, yma park Yoab ryb ow park vy, hag ev a'n jeves heydh ena; kewgh ha gorrewgh tan ynno.’ Ytho gwesyon Absalom a worras tan y'n park. 31Ena Yoab a sevis ha mones dhe Absalom dh'y ji, ha leverel dhodho, ‘Prag y loskas dha wesyon ow gwel gans tan?’ 32Absalom a worthybis dhe Yoab, ‘Otta, my a dhannvonas dhis ha leverel. “Deus omma, may hallav dha dhannvon dhe'n myghtern, dhe leverel, ‘Prag y teuth vy dhiworth Geshur? Gwella via ragov bos ena hwath.’ Lemmyn gas vy dhe weles fas an myghtern; ha mars eus kabel ynnov, gwres ev ow ladha!” ’ 33Ytho Yoab a dheuth dhe'n myghtern ha derivas orto; hag ev a elwis Absalom. Hag ev a dheuth dhe'n myghtern hag omblegya war y fas dhe'n dor a-rag an myghtern; ha'n myghtern a ammas dhe Absalom.