Absalom a Gemmer an Tron

1Wosa hemma Absalom a gavas ragdho y honan charett ha mergh, ha hanter-kans korfwithyas dhe boenya a-ragdho. 2Absalom a sevi a-varr ha sevel ryb fordh an yet; ha peskweyth may to nebonan a'n jeva ken dhe vos gorrys a-rag an myghtern rag breus, Absalom a elwi dhodho, ha leverel, ‘A by sita osta?’ Hag ev a worthybi, ‘Dha was yw dhiworth onan a loethow Ysrael.’ 3Ena Absalom a leveri dhodho, ‘Otta, dha vaterow yw da ha gwir; mes nyns eus kannas vyth a'n myghtern dhe'th klewes.’ 4Hag ynwedh Absalom a leveri, ‘Ogh mar pen vy apoyntys breusyas y'n pow! Ena peub a's teva ken po kas a dho dhymm, ha my a wre dhodho gwirvreus.’ 5Hag yndella yth o, peskweyth may to nebonan nes dhodho dhe omblegya a-ragdho, ev a ystynna y leuv, ha kavoes dalghenn ynno hag amma dhodho. 6Absalom a wre hemma dhe oll tus Ysrael a dho dhe'n myghtern rag breus; yndellma Absalom a ladras kolonnow gwer Ysrael.

7Yn diwedh peder blydhen Absalom a leveris dhe'n myghtern, ‘My a'th pys, gas vy dhe vones dhe Hebron ha kollenwel ow ambos re ambosis dhe'n Arloedh. 8Rag dha was a ambosas ambos pan esen trigys yn Geshur yn Aram, ha leverel. “Mara'm dre an Arloedh arta dhe Yerusalem, ena my a wordh an Arloedh.” ’ 9Hag yn-medh an myghtern dhodho, ‘Ke yn kres.’ Ytho ev a sevis, ha mones dhe Hebron. 10Mes Absalom a dhannvonas aspioryon der oll loethow Ysrael, ha leverel, ‘Kettell glewowgh son an hirgorn, ena germewgh, “Absalom a reyn yn Hebron.” ’ 11Gans Absalom yth eth dewkans gour a Yerusalem. I re bia gelwys, hag i eth yn aga sempledh, ha ny wodhyens travyth. 12Pan esa Absalom owth offrynna sakrifisow, ev a dhannvonas war-lergh Ahithofel an Gilonyas, kusulyer Davydh, dhiworth y sita Gilo. Ha'n bras o krev; rag an bobel a gressyas prest gans Absalom.

Davydh a Fi Dhiworth Yerusalem.

13Kannas a dheuth dhe Davydh, ha leverel, ‘Yma kolonn gwer Ysrael war-lergh Absalom.’ 14Ena Davydh a leveris dhe oll y wesyon esa ganso yn Yerusalem, ‘Sevewgh, ha fiyn; poken ny dhienkyn dhiworth Absalom. Fistenewgh, po ev a dremen dreson a-dhesempis, ha dri drog warnan, ha gweskel an sita gans min an kledha.’ 15Yn-medh gwesyon an myghtern dhe'n myghtern, ‘Awotta, parys yw dha wesyon dhe wul pypynag a dhewisso agan arloedh an myghtern.’ 16Ytho an myghtern eth yn-rag, hag oll y vayni war y lergh. Ha'n myghtern a asas deg iswragedh dhe witha an chi. 17An myghtern eth yn-rag, gans oll an bobel war y lergh, hag i a hedhis orth an diwettha chi. 18Oll y wesyon a dremenas dresto; hag oll an Kerethysi, hag oll an Pelethysi, hag oll an hwegh kans Gittyas re dhothya war y lergh dhiworth Gath, a dremenas a-rag an myghtern.

19Ena yn-medh an myghtern dhe Ittay an Gittyas, ‘Prag yth esos ow tos genen? Dehwel, ha trig gans an myghtern; rag ty yw estren, hag ynwedh divres dhiworth dha vammvro. 20De y teuthys, ha hedhyw, a wrav vy ty dhe wandra a-dro genen, pan wrav vy mos plepynag mayth ylliv? Dehwel, ha kemmer dha vreder genes; ha re bo tregeredh ha lelder genowgh.’ 21Mes Ittay a worthybis dhe'n myghtern, ha leverel, ‘Dell vew an Arloedh, ha dell vew ow arloedh an myghtern, plepynag may fo an myghtern, kyn fo yn mernans po yn bewnans, ena ynwedh y fydh dha was.’ 22Yn-medh Davydh dhe Ittay, ‘Ke ha tremen yn-rag.’ Ytho Ittay an Gittyas a dremenas yn-rag, gans oll y wer hag oll an re vyghan esa ganso. 23Hag oll an vro a oelas gans lev ughel, hag oll an bobel a dremenas yn-rag; an myghtern ynwedh a dremenas dres nans Kidron, hag oll an bobel a dremenas yn-rag, troha fordh an gwylvos.

24Hag otta, y feu Sadok ena ynwedh, hag oll an Levysi ganso, ow toen argh kevambos Duw. I a settyas argh Duw yn-nans, hag Abiathar eth yn-bann dhe sakrifia bys pan worfennsa oll an bobel tremena mes a'n sita. 25Ena yn-medh an myghtern dhe Sadok, ‘Kemmer argh Duw a-ji dhe'n sita arta. Mar kavav gras yn golok an Arloedh, ev a'm dre arta, ha gasa my dh'y gweles, hi hy honan ha'y thrigva. 26Mes mar lever yndella, “Ny gemmerav plesour vyth ynnos”, ottavy, gwres ev dhymm kepar dell hevel da dhodho.’ 27Yn-medh an myghtern ynwedh dhe Sadok an oferyas, ‘Mir, dehwel a-ji dhe'n sita yn kres, ha'th tew vab genes, Ahimaas dha vab, ha Yonathan mab Abiathar. 28Mir, my a worta yn rysyow an gwylvos erna dheffo ger dhiworthis dhe dherivas dhymm.’ 29Ytho Sadok hag Abiathar a gemmeras argh Duw arta dhe Yerusalem, hag i a drigas ena.

30Mes Davydh eth yn-bann dre leder menydh Oliv, hag ev a oelas hag ev ow mos yn-bann, gans y benn kudhys, hag ev eth dieskis; hag oll an bobel esa ganso a gudhas aga fenn ynwedh, hag i a oelas hag i ow mos yn-bann. 31Lemmyn y feu derivys dhe Davydh bos Ahithofel yn mysk an vrasoryon gans Absalom. Ytho Davydh a leveris, ‘A Arloedh, my a'th pys, treyl kusul Ahithofel dhe follneth.’

Hushay a Dheu ha Bos Aspier Davydh

32Pan dheuth Davydh dhe wartha an menydh, tyller mayth esa Duw gordhys, awotta, Hushay an Arkyas a dheuth dh'y vetya gans y gota skwardys ha dor war y benn. 33Yn-medh Davydh dhodho, ‘Mar tremenydh yn-rag genev, ena, ty a vydh begh dhymm. 34Mes mar tehwelydh dhe'n sita, ha leverel dhe Absalom, “My a vydh dha was, A vyghtern; kepar dell en vy gwas dha das yn termyn passys, lemmyn my a vydh dha was”, ena ty a yll lesta ragov kusul Ahithofel. 35A ny vydh an oferysi Sadok hag Abiathar genes ena? Ytho pypynag a glewydh dhiworth chi an myghtern, ty a'n deriv dhe Sadok hag Abiathar an oferysi. 36Yma gansa ena aga dew vab, Ahimaas mab, ha Yonathan mab Abiathar; ha dresta ty a wra derivas dhymm pup-tra a glewydh.’ 37Ytho Hushay koweth Davydh a dheuth a-ji dhe'n sita, y'n keth termyn mayth esa Absalom owth entra Yerusalem.