1Ynwedh Ahithofel a leveris dhe Absalom, ‘Gas vy dhe dhewis dewdhek mil wour, ha my a sev ha helghya war-lergh Davydh an nos ma. 2My a dheu warnodho hag ev skwith ha'y dhiwleuv gwannhes, ha my a'n gwra dhe berthi own; hag oll an bobel usi ganso a fi; ha ny waskav nagonan saw unnsel an myghtern, 3ha my a dhre oll an bobel arta dhis, kepar dell dhehwelis oll an bobel dhe'n gour a hwilydh, hag oll an bobel a vydh yn kres.’ 4Ha'n gusul o da yn dewlagas Absalom, hag oll henavogyon Ysrael.

Kusul Hushay

5Ena yn-medh Absalom, ‘Galw lemmyn Hushay an Arkyas, ha klewyn ynwedh an pyth a lever.’ 6Pan dheuth Hushay dhe Absalom, Absalom a leveris dhodho, ‘Ahithofel re gewsis war-lergh an gusul ma; a wren ni war-lergh y gusul? Mar ny'n gwren, kows.’ 7Ena Hushay a leveris dhe Absalom, ‘An gusul re ros Ahithofel, nyns yw da an weyth ma. 8Rag ty a woer bos dha das ha'y wer kasoryon, ha'ga sorr dhe dhewi, kepar hag orses ledrys hy orsigow y'n gwel. Ynwedh dha das yw gour konnyk yn bresel, ha ny vynn tremena an nos gans y wer. 9Awotta lemmyn, ev re omgudhas yn onan an pyttow, po yn onan an tylleryow erell. Ha pan goedh nebes anedha y'n kynsa omsettyans, piwpynag a'n klew a lever, “Yth esa ladhva yn mysk an bobel a hol Absalom.” 10Ha'n gour ynwedh neb yw kolonnek, gans kolonn kepar ha lew, a deudh glan dhe-ves gans own, rag oll Ysrael a woer bos dha das kasor, ha'n re usi ganso yw kasoryon alloesek. 11Rakhenna, my a gusul, bedhes oll Ysrael kuntellys dhis, dhiworth Dan bys yn Beer-sheba, kepar ha'n tewes usi ryb an mor yn niver, ha ty dha honan ow mos y'n vatel. 12Ena ni a dheu warnodho plepynag may fo kevys, ha ni a goedh warnodho kepar dell goedh an gluth war an dor; ha ny vydh ev gesys, nag onan a'n wer usi ganso. 13Ha mar omdenn a-ji dhe neb sita, ena oll Ysrael a dhre lovonow dhe'n sita na, ha ni a's tenn y'n nans, bys ma na vydh kevys ena unn vilienn anedhi.’ 14Hag Absalom hag oll gwer Ysrael a leveris, ‘Kusul Hushay an Arkyas yw gwell ages kusul Ahithofel.’ Rag an Arloedh re worhemmynnsa dhe lesta kusul dha Ahithofel, may halla an Arloedh dri drog war Absalom.

Hushay a Warn Davydh

15Ena yn-medh Hushay dhe Sadok hag Abiathar an oferysi, ‘Yndellma Ahithofel re gusulyas Absalom ha henavogyon Ysrael; hag yndellma my re gusulyas. 16Lemmyn dannvenewgh hware, ha derivewgh dhe Davydh, “Na dremen an nos na yn rysyow an gwylvos, mes tremen yn-rag; poken an myghtern hag oll an bobel usi ganso a vydh kollenkys.” ’ 17Y fedha Yonathan hag Ahimaas ow kortos yn En-rogel, ha maghteth e ha derivas orta, hag i e ha derivas orth myghtern Davydh, rag ny yllens bos gwelys owth entra an sita. 18Mes gour yowynk a's gwelas, ha derivas orth Absalom; ytho aga dew a asas yn uskis ha dos dhe ji gour yn Bahurim a'n jeva puth yn y glos; hag i eth yn-nans ynno. 19Y wreg a gemmeras kudhans ha'y ystynn dres anow an puth, ha lesa brunyon barlys warnodho; ha nyns esa travyth godhvedhys anodho. 20Pan dheuth gwesyon Absalom dhe ji an venyn, i a leveris, ‘Ple'ma Ahimaas ha Yonathan?’ Ha'n venyn a worthybis dhedha, ‘I re dremenas dres gover an dowr.’ Ha pan hwilsons ha ny allsons aga havoes, i a dhehwelis dhe Yerusalem.

21Wosa i dhe vos dhe-ves, i a dheuth yn-bann yn-mes a'n puth, ha mones ha derivas orth myghtern Davydh. Yn-medhons dhe Davydh, ‘Sav ha tremen dres an dowr hware; rag re gusulyas Ahithofel er dha bynn kepar dell wrug.’ 22Ena Davydh a sevis, hag oll an bobel esa ganso, hag i a dremenas dres an Yordan. Hag orth tardh an jydh, ny veu gesys denvyth anedha neb na dremensa dres an Yordan.

23Pan welas Ahithofel na veu y gusul holys, ev a dhibras y asen ha sevel ha mones dh'y ji, dh'y sita, hag ordena y vayni, hag omgregi ha merwel, hag ev a veu ynkleudhys yn bedh y das.

24Ena Davydh a dheuth dhe Mahanaym. Hag Absalom a dremenas dres an Yordan, ev hag oll gwer Ysrael ganso. 25Lemmyn Absalom re settsa Amasa yn le Yoab war an lu. Amasa o mab gour henwys Yether an Yshmaelyas17:25 an Yshmaelyas: Amendys war-lergh an Septuagint. Ebrow an Ysraelyas. Gwel 1 Kroniklys 2:17. neb a alsa a-ji dhe Abigayl, myrgh Nahash myrgh Seruya mamm Yoab. 26Ysrael hag Absalom a gampyas yn pow Gilead.

27Pan dheuth Davydh dhe Mahanaym, Shobi mab Nahash a Rabba an Ammonysi, ha Makir mab Ammiel a Lo-debar, ha Barzillay an Gileadyas a Rogelim 28a dhros gweliow, basonyow, ha lestri a bri; ynwedh gwaneth, heydh, bleus, ys rostys, fav, ha lentilow, 29mel hag amanynn, ha deves, ha keus bughes, rag Davydh ha'n bobel ganso dhe dhybri. Rag i a leveris, ‘Yma dhe'n bobel nown ha skwithter ha syghes y'n gwylvos.’