Davydh Untys avel Myghtern Yuda

1Wosa hemma Davydh a wovynnas orth an Arloedh, ‘A wrav vy mos yn-bann a-ji dhe onan a sitys Yuda?’ Ha'n Arloedh a leveris dhodho, ‘Ke yn-bann.’ Davydh a wovynnas, ‘Ple'th av yn-bann?’ Hag yn-medh ev, ‘Dhe Hebron.’ 2Ytho Davydh eth yn-bann di, war-barth gans y dhiw wreg, Ahinoam an Yezreelyades, hag Abigayl gwreg Nabal an Karmelyas. 3Davydh a dhros yn-bann y wer esa ganso, pub gour gans y deylu; hag i a drigas yn sitys Hebron. 4Ena gwer Yuda a dheuth, hag eno i a untyas Davydh myghtern war ji Yuda.

Pan dherivsons orth Davydh, ‘An re a ynkleudhyas Sowl o gwer Yabesh-gilead’, 5Davydh a dhannvonas kannasow dhe wer Yabesh-gilead ha leverel dhedha, ‘Bennigys owgh gans an Arloedh drefenn hwi dhe wul an tregeredh ma dh'agas arloedh, dhe Sowl, ha'y ynkleudhyas. 6Lemmyn re dhiskwettho an Arloedh tregeredh ha lelder dhywgh, ha my ynwedh a dhiskwa an kuvder ma dhywgh, drefenn hwi dhe wul hemma. 7Lemmyn bedhes krev agas diwleuv, ha bedhewgh kolonnek; rag Sowl agas arloedh yw marow, ha chi Yuda re'm untyas myghtern warnedha.’

Bresel yntra chiow Davydh ha Sowl

8Lemmyn ytho Abner mab Ner, kaslewydh lu Sowl, re gemmersa Ish-bosheth mab Sowl, ha'y dhri dhe Mahanaym. 9Ev a'n gwrug myghtern war Gilead, ha war an Asherysi2:9 Asherysi: Ow siwya an Targum. War-lergh an Vulgat Geshurysi. Tekst masoretek Ashurysi. , ha war Yezreel, ha war Efraym, ha war Benyamin, ha war oll Ysrael. 10Ish-bosheth mab Sowl o dewgens bloedh pan dheuth ha bos myghtern war Ysrael, hag ev a reynyas diw vlydhen. Mes chi Yuda a holyas Davydh. 11An termyn mayth esa Davydh myghtern yn Hebron war ji Yuda o seyth blydhen ha hwegh mis.

Kas Gibeon

12Abner mab Ner, ha gwesyon Ish-bosheth mab Sowl, eth yn-mes a Mahanaym dhe Gibeon. 13Yoab mab Seruya, ha gwesyon Davydh, ynwedh eth yn-mes hag i a vetyas war-barth ryb poll Gibeon. I a esedhas, an eyl bagas unn tu a'n poll ha'n bagas arall a'n tu arall dhe'n poll. 14Yn-medh Abner dhe Yoab, ‘Seves an wer yowynk hag omladhens a-dheragon.’ Hag yn-medh Yoab, ‘Sevens.’ 15Ena i a sevis ha tremena orth niver, dewdhek a Benyamin hag Ish-bosheth mab Sowl, ha dewdhek a wesyon Davydh. 16Pubonan a settyas dalghenn yn penn y gila, ha gwana y gledha yn tenewen y erbynner may koedhsons war-barth. Rakhenna an tyller yw henwys Helkath-hassurim, usi yn Gibeon. 17An gas o fest kales an jydh na; hag Abner ha gwer Ysrael a veu fethys a-dherag gwesyon Davydh.

18Yth esa tri mab Seruya ena, Yoab, Abishay, hag Asahel. Lemmyn maga skav war y droes avel ewik y'n gwel o Asahel; 19hag Asahel a jasyas war-lergh Abner, ha ny dreylyas na dhe'n dyghow na dhe'n kledh hag ev orth y holya. 20Ena Abner a dreylyas a-dro ha govynn, ‘Osta Asahel?’ Hag ev a worthybis, ‘Ov.’ 21Hag Abner a armas dhodho, ‘Treyl a-denewen dhe'th kledh po dhe'th tyghow, ha dalghenn onan a'n wer yowynk ha dhestrypp y arvow ragos dha honan.’ Mes ny vynnas treylya a-denewen dhiworto. 22Hag Abner a armas arta dhe Asahel, ‘Treyl a-denewen dhiworthiv. Prag y koedh dhymm dha weskel dhe'n leur? Fatell allsen ytho diskwedhes ow fas dhe Yoab dha vroder?’ 23Mes ev a naghas treylya a-denewen. Ytho Abner a'n gweskis gans penn-goeles sheft y wuw yn y dorr may teuth an guw mes a'y geyn. Ev a goedhas ena, ha merwel poran y'n tyller na. Ha peub neb a dho dhe'n tyller may koedhas Asahel ha merwel a sevis stag.

24Mes Yoab hag Abishay a helghyas war-lergh Abner. Ha pan sedhis an howl, i a dheuth dhe vre Amma, usi a-rag Giagh war an fordh dhe wylvos Gibeon. 25Mebyon Benyamin a omguntellas a-dro dhe Abner, hag i a dheuth ha bos unn bagas, hag i a sevis war wartha bre. 26Ena Abner a armas dhe Yoab ha leverel, ‘A wra an kledha devorya bys vykken? A ny wodhes y fydh an diwedh hwerow? Pes termyn y fydh kyns ty dhe leverel dhe'n bobel may treyllyons dhiworth helghya aga breder?’ 27Yoab a worthybis, ‘Dell vew Duw, mar ny gowsses, yn sur y fia myttin kyns pub gour dhe asa helghya y vroder.’ 28Ytho Yoab a hwythas an korn, hag oll an bobel a hedhis; ny helghsons war-lergh Ysrael namoy na breseli na fella.

29Abner ha'y wer a gerdhas oll an nos na dres an Araba; i a dreusis an Yordan, ha mos der oll an myttin, hag i a dheuth dhe Mahanaym. 30Yoab a dhehwelis dhiworth helghya Abner; hag ev a guntellas oll an bobel. Yth esa kellys dhiworth gwesyon Davydh nownsek gour hag ynwedh Asahel. 31Mes gwesyon Davydh re ladhsa trihans gour ha tri-ugens a vebyon Benyamin ha gwer Abner. 32I a gemmeras Asahel yn-bann, ha'y ynkleudhyas yn bedh y das, esa yn Bethlehem. Yoab ha'y wer a gerdhas der oll an nos na, hag i a dheuth dhe Hebron orth tardh an jydh.