An Gibeonysi a Dal Dial war Ji Sowl

1Lemmyn yth esa divoetter yn dydhyow Davydh teyr blydhen, blydhen wosa blydhen; ytho Davydh a hwilas fas an Arloedh. Ha'n Arloedh a worthybis, ‘Yth yw drefenn Sowl, ha'y ji goesek, rag ev dhe worra an Gibeonysi dhe'n mernans.’ 2Ytho an myghtern a elwis an Gibeonysi ha kewsel orta. (Lemmyn nyns esa an Gibeonysi mebyon Ysrael, mes dhiworth remenant an Amorysi; mebyon Ysrael re dosa dhedha dh'aga sparya, mes Sowl a hwilas aga distrui, drefenn y vos diwysyk rag mebyon Ysrael ha Yuda.) 3Davydh a leveris dhe'n Gibeonysi, ‘Pandr'a wrav ragowgh? Fatell wrav vy dehwelyans, may fennigowgh eretons an Arloedh?’ 4An Gibeonysi a worthybis dhodho, ‘Ny vynnyn kavoes arghans nag owr dhiworth Sowl, na dhiworth y ji; na ny vynnyn gorra dhe'n mernans denvyth yn Ysrael.’ Yn-medh ev, ‘Pandr'a vynnowgh, my dhe wul ragowgh?’ 5I a worthybis dhe'n myghtern, ‘An gour neb a'gan diswrug, hag a dewlis towl dh'agan distrui ma na gyffyn tyller yn oll pow Ysrael, 6bedhes seyth a'y vebyon res dhyn, ha ni a's kreg yn-bann a-rag an Arloedh yn Gibea a Sowl, dewisys an Arloedh.’ Ha'n myghtern a leveris, ‘My a's re dhywgh.’

7Mes an myghtern a sparyas Mefibosheth mab Yonathan mab Sowl, drefenn an ti a-rag an Arloedh esa yntredha, yntra Davydh ha Yonathan mab Sowl. 8Mes an myghtern a gemmeras dew vab Rispa myrgh Aya a dhineythis dhe Sowl, Armoni ha Mefibosheth; ha pymp mab Merab myrgh Sowl, a dhineythis dhe Adriel mab Barzillay an Meholathyas, 9hag ev a's ros yn leuv an Gibeonysi, hag i a's krogas yn-bann war an menydh a-rag an Arloedh. Oll seyth anedha a goedhas war-barth; I a veu gorrys dhe'n mernans yn kynsa dydhyow an drevas, yn dalleth trevas an heydh.

10Ena Rispa myrgh Aya a gemmeras yskar ha'y lesa rygdhi hy honan war an garrek, dhiworth dalleth an drevas bys pan goedhas dowr war an korfow dhiworth an nevow; ha ny asas dhe bowes warnedha naneyl ydhyn an ayr dres dydh, na bestes gwyls dres nos. 11Pan veu derivys dhe Davydh an pyth a wrug Rispa myrgh Aya, iswreg Sowl, 12Davydh eth ha kemmeres eskern Sowl ha Yonathan y vab dhiworth gwer Yabesh-gilead, neb a's ladras dhiworth plen Beth-shan, le ma's krogas an Filistysi, wosa an Filistysi dhe weskel Sowl yn Gilboa. 13Ev a dhros eskern Sowl ha Yonathan y vab alena; hag i a guntellas eskern an re a veu kregys. 14Hag i a ynkleudhyas eskern Sowl ha Yonathan y vab yn tir Benyamin yn Sela, yn bedh Kish y das; hag i a wrug pup-tra a wrug an myghtern y erghi dhedha. Wosa henna, Duw a glewas pysadow rag an tir.

Breselyow Erbynn an Filistysi

15Yth esa bresel arta ynter an Filistysi hag Ysrael. Davydh eth yn-nans, ha'y wesyon ganso, hag i a werryas erbynn an Filistysi, ha Davydh a dheuth ha bos skwith. 16Hag Yshbi-benob, onan a vebyon an gewri, may feu poes y wuw trihans shekel a vrons, hag ev grogysys gans kledha nowydh, a brederis ev dhe ladha Davydh. 17Mes Abishay mab Seruya a'n gweresas ha gweskel an Filistyas ha'y ladha. Ena gwer Davydh a dos dhodho ha leverel, ‘Ny wre'ta mos yn-mes yn batel genen arta, ma na vydh lugarn Ysrael difeudhys.’

18Wosa hemma, yth esa batel arta gans an Filistysi yn Gob; ena Sibbekay an Hushathyas a ladhas Saf, neb o onan a vebyon an gewri. 19Yth esa batel arta yn Gob gans an Filistysi; hag Elhanan mab Yaare-oregim an Bethlehemyas a ladhas Goliath an Gittyas, ha sheft y wuw o kepar ha gwelenn gwiader. 20Hag yth esa batel arall yn Gath, mayth esa gour pur vras a'n jevo war bub leuv hwegh bys, ha war bub droes hwegh bys-troes, peswar warn ugens yn niver; hag ev ynwedh a veu dineythys dhe'n gewri. 21Pan dhefias Ysrael, Yonathan mab Shimea broder Davydh a'n ladhas. 22An peswar ma a veu dineythys dhe'n gewri yn Gath, hag i a goedhas dre leuv Davydh, ha dre leuv y wesyon.