Kan Delivrans Davydh

1Davydh a gewsis geryow an gan ma dhe'n Arloedh y'n jydh ma'n selwis an Arloedh dhiworth leuv y eskerens oll, ha dhiworth leuv Sowl; 2hag ev a gewsis,

An Arloedh yw ow harrek, ha'm kastell, ha'm delivrer,

3Duw ow harrek may hwilav skovva ynno,

ow skoes, ha korn ow selwyans,

ow dinas ha'm skovva,

ow selwador; ty a'm saw dhiworth freudh.

4My a elow war an Arloedh, neb yw gwiw dhe vos gormelys,

ytho my a vydh selwys a'm eskerens.

5Rag yth esa tonnow ankow a-dro dhymm,

frosow sherewynsi a wrug euth dhymm;

6yth esa kerdyn ifarn a-dro dhymm;

antylli ankow esa a-dheragov.

7Y'm anken my a elwis war an Arloedh,

ha dhe'm Duw y helwis vy.

Ev a glewas ow lev yn-mes a'n tempel,

ha'm kri a dheuth bys yn y dhiwskovarn.

8An nor a grenas ha kryghylli;

selyow an nevow a grysyas;

i a grenas, rag y vos serrys.

9Mog a yskynnas mes a'y dhewfrik,

ha tan a'y anow, ow tevorya;

kolennow a dardhas yn flammow a-dhiworto.

10Ev a blegyas an nevow, hag a dheuth yn-nans;

yth esa tewolgow yn-dann y dreys.

11Ev a varghogas war jerub ha nija;

ev a veu gwelys22:11 ev a veu gwelys: Po amendyans ev a nijas yn uskis, ow siwya Salm 18:10. war eskelli an gwyns.

12Ev a wrug tewlder pabellow a-dro dhodho,

kommol tew a dhowr y'n ebron.

13Dhiworth an golewder a-ragdho

kolennow tan a dardhas yn flammow.

14An Arloedh a darennas y'n nevow,

ha'n Ughella22:14 Ughella: Ebrow Elyon. a ros y lev.

15Ev a dhellos sethow ha'ga skattra,

lughes, ha'ga gorra yn deray.

16Ena yth omdhiskwedhas leuryow an mor,

selyow an norvys a veu diskudhys,

orth keredh an Arloedh,

orth hwyth anall y dhewfrik.

17Ev a dhannvonas dhiworth an ughelder ha'm kemmeres,

ev a'm tennas yn-mes a dhowrow pals.

18Ev a'm delivras dhiworth ow eskar galloesek,

dhiworth an re a'm kas;

rag yth ens i re grev ragov.

19I a dheuth er ow fynn yn dydh ow therroes;

mes an Arloedh re beu skoedhyans dhymm.

20Ev a'm dros yn-mes dhe dyller ledan;

ev a'm delivras, drefenn bos dhodho delit ynnov.

21An Arloedh re'm gobras war-lergh ow ewnder;

war-lergh glander ow diwleuv yth attylis ev dhymm.

22Rag my re synsis fordhow an Arloedh,

ha ny dhiberthis yn trog dhiworth ow Duw.

23Rag yth esa oll y vreusow ev a-dheragov,

ha'y ordenansow ny dreylis vy dhiworta.

24Yth en vy divlam a-dheragdho,

ha my a omwithas dhiworth ow hammweyth.

25An Arloedh re attylis dhymm herwydh ow ewnder,

herwydh glander ow diwleuv22:25 herwydh glander ow diwleuv: Ow siwya an Septuagint, an Syriek ha'n Vulgat, ha Salm 18:24. Ebrow herwydh ow glander. yn y wolok ev.

26Gans an den lel ty a vydh lel;

gans an gour divlam ty a vydh divlam.

27Gans an den glan ty a vydh glan;

ha gans an den kamm ty a vydh gorth.

28Ty a selow an bobel uvel;

mes yma dha dhewlagas war an re woethus, dh'aga dri dhe'n dor.

29Rag ty yw ow lugarn, Arloedh,

ha'n Arloedh a wra dhe'm tewlder splanna.

30Rag genes jy my a yll poenya erbynn lu;

gans Duw my a yll lemmel dres fos.

31Duw – y fordh yw perfydh;

lavar an Arloedh yw prevys;

skoes yw dhe seul a hwila skovva ynno.

32Rag piw yw Duw marnas an Arloedh?

Ha piw yw karrek marnas agan Duw ni.

33Duw re'm grogysas gans nerth,

hag ev re wrug ow fordh divlam.

34Ev a wra ow threys kepar ha treys ewigow,

ha'm settya war an tylleryow ughel.

35Ev a dhysk dhe'm diwleuv gwerrya,

ha'm diwvregh a yll plegya gwarak a vrons.

36Ty re ros dhymm skoes dha selwyans,

ha'th weres re'm meurhas.

37Ty a ros spas ledan rag ow hammow yn-dannov,

ha ny drebuchyas ow dewufern.

38My a helgh ow eskerens ha'ga hachya;

ha ny dhehwelav bys pan vons distruys.

39My a's brew ma na allons sevel;

i a goedh yn-dann ow threys.

40Rag ty re worras grogys a nerth a-dro dhymm rag an gas;

ty re worras yn-dannov an re a sevis er ow fynn.

41Ty re ros dhymm gwarrow ow eskerens,

may hallen vy distrui an re a'm kas.

42I a grias, mes nyns esa nagonan dh'aga selwel,

war an Arloedh, mes ny worthybis dhedha.

43My a's brew munys avel doust an dor;

my a's trett yn-dann dreys avel leys an stretys.

44Ty a'm delirv dhiworth strifow ow fobel,

ha'm settya avel penn an kenedhlow;

pobel na aswonnis a wra ow servya.

45Estrenyon a dheu dhymm ow plattya;

kettell glewons ahanav, gostydh yns dhymm.

46Estrenyon a gemmer digolonn,

i a dheu ow krena yn-mes a'ga heryow.

47An Arloedh a vew, ha benniges yw ow harrek,

hag ughelhes vydh Duw, karrek ow selwyans,

48an Duw neb a re dhymm dial

hag a worr poblow yn-dannov,

49neb a'm delirv dhiworth ow eskerens,

ha'm drehevel a-ugh an re a sev er ow fynn;

ty a'm delirv dhiworth an gour garow.

50Rakhenna, my a'th wormel, A Arloedh, yn mysk an kenedhlow,

ha kana gormola dhe'th hanow.

51Ev a re selwyans meur dh'y vyghtern,

ha gul tregeredh dh'y Untys ev,

dhe Davydh ha dh'y has bys vykken.