Diwettha Geryow Davydh

1An re ma yw diwettha geryow Davydh:

Dargan Davydh mab Yesse,

dargan an gour a veu drehevys yn ughel,

an den untys a Dhuw Yakob

ha'n kanor hweg a Ysrael:

2Spyrys an Arloedh a gews dredhov,

yma y lavar war ow thaves.

3Duw Ysrael a gewsis,

Karrek Ysrael a leveris dhymm:

Ev neb a rewl tus yn ewnder,

hag a rewl yn own Duw,

4ev a vydh avel golow an bora, pan sev an howl,

yn myttin heb kommol,

avel golewder wosa glaw a dhre gwels dhiworth an dor.

5A nyns yw ow chi yndella gans Duw?

Rag ev a wrug genev kevambos bys vykken,

ordenys yn pup-tra ha sur.

A ny wra ev gul dhe skylla

oll ow selwyans, ha'm desir?

6Mes an vilens a vydh oll avel dreyn yw tewlys dhe-ves,

rag ny yllir aga hemmeres y'n leuv;

7ha'n gour a's toch a arv y honan gans horn

po sheft guw;

hag y'n tan i a vydh leskys glan y'n keth tyller na.

Kasoryon Davydh

8An re ma yw henwyn an gasoryon esa dhe Davydh: Yeshbaal23:8 Yeshbaal: Amendys; po Yosheb-bassheba, po Yashobeam, po Ishbaal, po Ishbosheth. an Hakmonyas;23:8 Hakmonyas: Amendys. Ebrow an Tahkemonyas. ev o chyf an Tri; ev a dhrehevis y wuw erbynn eth kans neb a ladhas war unn dro.

9Nessa dhodho o Eleazar mab Dodo an Aghoghyas, onan a'n tri hasor gans Davydh pan dhefisons an Filistysi esa kuntellys ena rag batel, ha gwer Ysrael a gildennas. 10Ev a sevis ha gweskel an Filistysi bys pan veu y dhorn skwithys ha glena orth an kledha. An Arloedh a dhros trygh meur y'n jydh na. Ha ny dhehwelis an bobel war y lergh marnas dhe breydha.

11Nessa dhodho o Shamma mab Age an Hararyas. Ha'n Filistysi a omguntellas yn Lehi, mayth esa splatt leun a lentilow; ha'n bobel a fias a-dherag an Filistysi. 12Mes ev a sevis ena yn kres an splatt, ha'y dhefendya, ha ladha an Filistysi; ha'n Arloedh a dhros trygh meur.

13Tri a'n deg chyf warn ugens eth yn-nans, ha dos dhe Davydh yn termyn trevas bys kav Adullam, hag yth esa bagas a Filistysi ow kampya yn nans Refaim. 14Y'n termyn na, yth esa Davydh y'n ger, hag yth esa savla-goelyadoryon an Filistysi yn Bethlehem. 15Davydh a yeunis ha leverel, ‘Unnweyth a rolla nebonan dhymm diwes a'n dowr dhiworth puth Bethlehem usi ryb an yet!’ 16Ena an tri hasor a herdhyas a-ji dhe gamp an Filistysi ha tenna dowr yn-mes a buth Bethlehem usi ryb an yet, ha'y dhri dhe Davydh. Mes ny vynnas y eva; hag ev a'n dinewis yn-mes dhe'n Arloedh. 17Hag ev a leveris, ‘An Arloedh difenn, my dhe wul hemma. A nyns yw hemma goes an wer neb eth orth peryll aga bewnans?’ Ha ny vynnas Davydh y eva. An traow ma a wrug an tri hasor.

18Abishay broder Yoab mab Seruya o chyf an Tri. Ev a dhrehevis y wuw erbynn tri hans ha'ga ladha, ha gwaynya hanow gans an Tri. 19A nyns o ev an moyha enorys a'n Tri? Ev a dheuth ha bos aga haslewydh, kyn na veu reknys yn mysk an Tri.

20Benaya mab Yehoyada, kasor galloesek dhiworth Kasbeel, oberer a lies gweythres; ev a weskis dew vab Ariel a Moab.23:20 ev a weskis dew vab Ariel a Moab. Ow siwya an Septuagint. An tekst Ebrow yw ansertan. Ev eth yn-nans ynwedh ha ladha lew a-ji dhe bytt yn dydh erghek. 21Hag ev a ladhas gour a Ejyp, teg y semlans. Hag yth esa guw yn leuv gour Ejyp; mes ev eth yn-nans dhodho gans lorgh, ha kachya an guw yn-mes a leuv gour Ejyp, ha'y ladha gans y wuw y honan. 22An traow ma a wrug Benaya mab Yehoyada, ha gwaynya hanow gans an Tri hasor. 23Ev o gerys-da yn mysk an Deg warn ugens, mes ny veu reknys yn mysk an Tri. Ha Davydh a'n settyas war y withysi.

24Yn mysk an Deg warn ugens a veu Asahel broder Yoab, Elhanan mab Dodo a Bethlehem, 25Shamma an Harodyas, Elika an Harodyas, 26Heles an Paltyas, Ira mab Ikkesh an Tekoyas, 27Abiezer an Anathothyas, Mebunnay an Hushathyas, 28Salmon an Aghoghyas, Maharay an Netofathyas, 29Heleb mab Baana an Netofathyas, Ittay mab Ribay dhiworth Gibea a vebyon Benyamin, 30Benaya an Pirathonyas, Hidday dhiworth goverow Gaash, 31Abi-albon an Arbathyas, Azmaveth an Barhumyas, 32Eliaghba an Shaalbonyas, a vebyon Yashen, Yonathan, 33Shamma an Hararyas, Ahiam mab Sharar an Hararyas, 34Elifelet mab Ahasbay, mab an Maakathyas, Eliam mab Ahithofel an Gilonyas, 35Hesro an Karmelyas, Paray an Arbyas, 36Ygal mab Nathan a Soba, Bani an Gadyas, 37Selek an Ammonyas, Naharay an Beerothyas, deger arvow Yoab mab Seruya, 38Ira an Ithryas, Gareb an Ithryas, 39Uria an Hittyas: i oll seytek warn ugens.