Davydh a Niver Ysrael ha Yuda

1Arta sorr an Arloedh a dhewis erbynn Ysrael, hag ev a vovyas Davydh er aga fynn ha leverel, ‘Ke ha nivera Ysrael ha Yuda.’ 2Ytho an myghtern a leveris dhe Yoab kaslewydh an lu esa ganso ‘Ke der oll loethow Ysrael, dhiworth Dan bys yn Beer-sheba ha niver an bobel, may hwodhviv niver an bobel.’ 3Hag yn-medh Yoab dhe'n myghtern, ‘Re ynkressyo an Arloedh dha Dhuw an bobel kanskweyth, ha re'n gwello dhewlagas ow arloedh an myghtern. Mes prag y fynn ow arloedh an myghtern gul an dra ma?’ 4Mes ger an myghtern o krev erbynn Yoab hag erbynn kaptenyon an lu. Ytho Yoab ha kaptenyon an lu eth yn-mes dhiworth lok an myghtern dhe nivera pobel Ysrael. 5Hag i a dremenas dres an Yordan, ha dalleth dhiworth Aroer, ha dhiworth an sita usi yn kres an nans, dre Gad hag yn-rag dhe Yazer. 6I a dheuth dhe Gilead, ha dhe Kadesh yn tir an Hittysi; hag i a dheuth dhe Dan, ha tremena a-dro dhe Sidon, 7ha dos dhe sita grev Tyr, ha dhe oll sitys an Hivysi, ha'n Kananysi; hag i eth yn-mes dhiworth dyghowbarth Yuda dhe Beer-sheba. 8Wosa i dhe dremena der oll an dir, i a dheuth dhe Yerusalem dhe benn naw mis hag ugens dydh. 9Ha Yoab a dherivas niver an bobel dhe'n myghtern: hag yth esa yn Ysrael neb eth kans mil souder a ylli handla an kledha; hag yn Yuda yth esa pymp kans mil souder.

Breus Peghosow Davydh

10Ha kolonn Davydh a veu gweskys wosa ev dhe nivera an bobel. Hag yn-medh Davydh dhe'n Arloedh, ‘My re beghas yn feur y'n pyth re wrugavy. Mes lemmyn, A Arloedh, my a'th pys, gav kammweyth dha was; rag my re wrug yn foll.’ 11Ha pan sevis Davydh ternos, ger an Arloedh a dheuth dhe'n profoes Gad, gwelesydh Davydh, ow leverel, 12‘Ke ha lavar dhe Davydh, “Yndellma y lever an Arloedh, My a brof dhis tri thra; dewis onan anedha, ha my a'n gwra dhis.” ’ 13Ytho Gad a dheuth dhe Davydh, ha leverel dhodho, ‘A wra seyth blydhen a dhivoetter dos dhis y'th tir? Po a vynn'ta fia tri mis a-rag dha eskerens, hag i orth dha helghya? Po a vydh tri dydh a bla y'th tir? Lemmyn preder hag ervir py gorthyp y rov dhodho ev neb a'm dannvonas.’ 14Ha Davydh a leveris dhe Gad, ‘Yth esov yn ahwer meur; koedhyn yn leuv an Arloedh, rag y druedh yw bras; mes na'm gas dhe goedh yn leuv mab-den.’

15Ytho an Arloedh a dhannvonas pla war Ysrael dhiworth an myttin na bys y'n termyn apoyntys, hag y ferwis ena a'n bobel dhiworth Dan bys yn Beer-sheba deg ha tri-ugens mil dhen. 16Ha pan ystynnas an el y dhorn war Yerusalem dh'y distrui, an Arloedh a'n jevo edrek a'n drog, ha leverel dhe'n el, an distruer usi yn kres an bobel, ‘Henn yw lowr, hedh dha dhorn.’ Hag ena yth esa el an Arloedh ryb leur-drushya Arawna an Yebusyas. 17Ha pan welas Davydh an el esa ow kweskel an bobel, ev a leveris dhe'n Arloedh, ‘Otta, my ow honan re beghas, ha my re wrug drog; mes an deves ma, pyth a wrussons? Hedh dha dhorn, my a'th pys, bydh er ow fynn, hag erbynn chi ow thas.’

Alter Davydh war an Leur-drushya

18Hag y'n jydh na Gad a dheuth dhe Davydh, ha leverel dhodho, ‘Ke yn-bann ha drehav alter dhe'n Arloedh war leur-drushya Arawna an Yebusyas.’ 19Ytho Davydh eth yn-bann, herwydh ger Gad, kepar dell worhemmynnis an Arloedh. 20Hag Arawna a viras yn-nans ha gweles an myghtern ha'y wesyon ow tos yn-rag trohag ev; hag Arawna eth yn-rag hag omblegya gans y fas dhe'n dor a-rag an myghtern. 21Hag yn-medh Arawna, ‘Prag y teuth ow arloedh an myghtern dh'y was?’ Davydh a worthybis, ‘Rag prena an leur-drushya ahanas ha drehevel alter dhe'n Arloedh, may fo astelys an pla dhiworth an bobel.’ 22Arawna a leveris dhe'n myghtern, ‘Gwres ow arloedh an myghtern kemmeres hag offrynna an pyth a hevel da dhodho. Ottomma, ojyon rag an offrynn leskys, ha draylellow-drushya ha yewow an ojyon rag prenn. 23Oll an taklow ma, A myghtern, Arawna a re dhe'n myghtern.’ Ynwedh yn-medh Arawna dhe'n myghtern, ‘Re'th tegemmerro an Arloedh dha Dhuw.’

24Ha'n myghtern a worthybis dhe Arawna, ‘Nansi, mes my a'n pren dhiworthis rag pris. Ny offrynnav offrynnow leskys dhe'n Arloedh rag travyth.’ Ytho Davydh a brenas an leur-drushya ha'n ojyon rag hanter kans shekel a arghans. 25Davydh a dhrehevis alter ena dhe'n Arloedh ena, hag offrynna offrynnow leskys hag offrynnow kres. Ha'n Arloedh a glewas y bysadow rag an tir, ha'n pla a veu treylys a-dhiwar Ysrael.