Davydh Untys avel Myghtern war Oll Ysrael

1Ena oll loethow Ysrael a dheuth dhe Davydh yn Hebron ha leverel, ‘Otta, dha askorn ha'th kig on ni. 2Ynwedh yn termyn tremenys, pan o Sowl myghtern warnan, yth o ty neb a hembronka luyow Ysrael yn-mes ha'ga dri a-ji. Ha'n Arloedh a leveris dhis, “Ty a vydh bugel ow fobel Ysrael, ha ty a vydh rewler war Ysrael.” ’ 3Ytho oll henavogyon Ysrael a dheuth dhe'n myghtern yn Hebron; ha myghtern Davydh a wrug kevambos gansa yn Hebron dherag an Arloedh, hag i a untyas Davydh myghtern war Ysrael. 4Davydh o deg bloedh warn ugens pan dhallathas reynya, hag ev a reynyas dewgens blydhen. 5Yn Hebron ev a reynyas war Yuda seyth blydhen ha hwegh mis; hag yn Yerusalem ev a reynyas war oll Ysrael ha Yuda trydhek blydhen warn ugens.

Davydh a Gemmer Yerusalem

6An myghtern ha'y wer eth dhe Yerusalem erbynn an Yebusysi, trigoryon an tir na, hag i a armas dhe Davydh, ‘Ny yllydh entra omma, rag an dhellyon ha'n re glof a yll dha bellhe.’ Rag i a dybi, ‘Ny yll Davydh entra omma.’ 7Mes Davydh a gemmeras dinas Sion, yw lemmyn sita Davydh. 8Davydh a leveris y'n jydh na, ‘Piwpynag a vynno gweskel an Yebusysi, gwres ev mones yn-bann der an gowfordh-dhowr dhe weskel an dhellyon ha'n re glof, yw kesys gans Davydh.’ Rakhenna leverys yw, ‘Ny wra an dhellyon na'n re glof dos a-ji dhe'n chi.’ 9Ena Davydh a dhallathas triga y'n dinas, hag ev a'n henwis sita Davydh. Davydh a dhrehevis a-derdro dhiworth an Millo5:9 Millo: Martesen an styr yw tirlanow, po terrasow. ha war-ji. 10Ha Davydh eth ha bos brassa ha brassa, rag yth esa an Arloedh, Duw an luyow, ganso.

11Myghtern Hiram a Tyr a dhannvonas kannasow dhe Davydh, war-barth gans kederwydh ha seri prenn ha seri men, hag i a dhrehevis chi rag Davydh. 12Ena Davydh a gonvedhi an Arloedh dh'y fastya avel myghtern war Ysrael, hag ev dhe ughelhe y vyghterneth a-barth y bobel Ysrael.

13Ha Davydh a gemmeras ragdho iswragedh ha gwragedh moy yn-mes a Yerusalem, wosa ev dhe dos dhiworth Hebron; ha mebyon ha myrghes moy a veu dineythys dhe Davydh. 14Ha'n re ma yw henwyn a'n re a veu dineythys dhodho yn Yerusalem: Shammua, Shobab, Nathan, Solomon, 15Ybhar, Elishua, Nefeg, Yafia, 16Elishama, Elyada, hag Elifelet.

Davydh a Feth an Filistysi

17Pan glewas an Filistysi Davydh dhe vos untys avel myghtern war Ysrael, oll an Filistysi a dheuth yn-bann dhe hwilas Davydh; mes Davydh a glewas anodho, ha mos yn-nans dhe'n dinas. 18Lemmyn an Filistysi a dheuth hag omlesa y'n nans Refaim. 19Ytho Davydh a wovynnas orth an Arloedh, ha leverel, ‘A wrav vy mones yn-bann erbynn an Filistysi? A vynn'ta aga delivra a-berth y'm leuv?’ Ha'n Arloedh a leveris dhe Davydh, ‘Ke yn-bann; rag my a vynn yn hwir delivra an Filistysi a-berth y'th leuv.’ 20Ytho Davydh a dheuth dhe Baal-perasim, ha Davydh a's fethas ena. Yn-medh ev, ‘An Arloedh re dardhas der ow eskerens der ow leuv, kepar dell dardh dowrow.’ Rakhenna ev a elwis an tyller na Baal-perasim. 21I a asas aga idolys ena, ha Davydh ha'y wer a's dug dhe-ves.

22An Filistysi a dheuth yn-bann unnweyth arta, hag omlesa y'n nans Refaim. 23Ha pan wovynnas Davydh orth an Arloedh, ev a leveris, ‘Ny edh yn-bann; ke a-dro a-dryv dhedha, ha deus warnedha a-dal an gwydh balsam. 24Pan glewydh son avel keskerdh yn penn an gwydh balsam, bydh hewoel; rag ena an Arloedh res eth yn-mes a-dheragos, dhe weskel lu an Filistysi.’ 25Davydh a wrug dell erghis an Arloedh dhodho; hag ev a weskis an Filistysi dhiworth Geba bys yn Gezer.