Davydh a Dhre an Argh dhe Yerusalem

1Davydh a guntellas arta oll gwer dhewisys Ysrael, deg mil warn ugens. 2Davydh a sevis, ha mos gans oll an bobel esa ganso dhiworth Baala yn Yuda, dhe dhri yn-bann alena argh Duw, yw henwys war-lergh hanow Arloedh an luyow neb a esedh war an cherubim. 3I a worras argh Duw war gert nowydh, ha'y dri dhiworth chi Abinadab, esa yn Gibea. Yth esa Uzza hag Ahio, mebyon Abinadab, ow ledya an kert nowydh. 4I a's dros dhiworth chi Abinadab esa yn Gibea hag argh Duw warnodho; hag yth esa Ahio ow kerdhes a-rag an argh. 5Davydh hag oll chi Ysrael a lowenhas dherag an Arloedh gans oll aga nerth, gans kanow,6:5 gans oll aga nerth, gans kanow: Amendys ow siwya an Septuagint. Ebrow gans oll prennyer a veryw. ha sowtris, telynnow, tabourigow, sistrennow, ha gans symbalys.

6Pan dheuthons dhe leur-drushya Nakon, Uzza a ystynnas y leuv war-tu hag argh Duw, ha settya dalghenn ynni, rag an oghen dh'y shakya. 7Sorr Duw a dhewis erbynn Uzza; ha Duw a'n gweskis dhe'n dor ena drefenn y volder; hag ev a verwis ena ryb argh Duw. 8Davydh a veu serrys drefenn an Arloedh dhe dardha yn-mes erbynn Uzza; hag ev a elwis an tyller na Peres-uzza, dell yw bys y'n jydh hedhyw. 9Davydh a borthas own a'n Arloedh y'n jydh na, ha leverel, ‘Fatell yll argh an Arloedh dos dhymm?’ 10Ytho ny vynna Davydh kemmeres argh an Arloedh ganso a-ji dhe sita Davydh; mes Davydh a's dug a-denewen dhe ji Obed-edom an Gittyas. 11Hag yth esa argh an Arloedh trigys yn chi Obed-edom an Gittyas tri mis; ha'n Arloedh a vennigas Obed-edom hag oll y vayni.

12Y feu derivys orth Davydh, ‘An Arloedh re vennigas chi Obed-edom ha pup-tra eus dhodho, drefenn argh Duw.’ Ytho Davydh eth ha dri yn-bann argh Duw a-dhiworth chi Obed-edom a-ji dhe sita Davydh gans lowena, 13ha pan alsa an re esa ow toen an argh hwegh kamm, ev a sakrifias ojyon ha bualyon peskys. 14Ha Davydh a dhonsyas dherag an Arloedh gans oll y nerth; ha Davydh o grogysys gans efod a lien. 15Ytho Davydh hag oll chi Ysrael a dhros yn-bann argh an Arloedh gans garmow, ha gans son an hirgorn.

16Pan dheuth argh an Arloedh a-ji dhe sita Davydh, Mikal myrgh Sowl a viras war-woeles der an fenester, ha gweles myghtern Davydh ow lamma hag ow tonsya dherag an Arloedh; ha hi a'n dispresyas yn hy holonn.

17I a dhros argh an Arloedh a-ji, ha'y settya yn hy le, yn kres an tylda re dhrehavsa Davydh rygdhi; ha Davydh a offrynnas offrynnow leskys hag offrynnow kres dherag an Arloedh. 18Wosa Davydh dhe worfenna offrynna an offrynnow leskys ha'n offrynnow kres, ev a vennigas an bobel yn hanow Arloedh an luyow. 19Hag ev a lesrannas dhe oll an bobel, dhe oll routh Ysrael, dhe bub gour ha benyn, unn torth-vara, unn rann a gig, hag unn desenn-rappys. Ena oll an bobel a dhibarthas, pubonan dh'y ji.

20Ena Davydh a dhehwelis dhe venniga y vayni. Mes Mikal myrgh Sowl a dheuth yn-mes dhe vetya Davydh, ha leverel, ‘Assa wrug myghtern Ysrael enora y honan hedhyw, ow tiskudha y honan dherag dewlagas maghtethyon y wesyon, kepar dell dhiskudh den isel y honan!’ 21Hag yn-medh Davydh dhe Mikal, ‘Yth o dherag an Arloedh, neb a'm dewisas yn le dha das, hag oll y ji, dhe'm settya avel rewler war bobel an Arloedh, war Ysrael. Ha my a lowenha dherag an Arloedh. 22Ha my a vydh hwath isella es hemma, ha my a vydh uvelhes y'm dewlagas ow honan; mes gans an maghtethyon may kewssys anedha, gansa my a vydh synsys yn enor.’ 23Ha nyns esa dhe Mikal myrgh Sowl flogh vyth bys dydh hy mernans.