Breselyow Davydh

1Wosa hemma Davydh a weskis an Filistysi, ha'ga fetha; ha Davydh a gemmeras Metheg-amma yn-mes a leuv an Filistysi.

2Ev a fethas Moab ynwedh, hag ev a's gwrug dhe wrowedha war an leur ha'ga musura der an gordenn-vusura; ev a vusuras diw gordenn dhe worra dhe'n mernans, hag unn kordenn leun dhe witha yn few. Hag yndellma Moab eth ha bos gostydh dhe Davydh, ow tri trubyt dhodho.

3Davydh ynwedh a weskis Hadadezer mab Rehob, myghtern Soba, pan esa ow mos dhe dhaskavoes y vaystri ryb an avon Ewfrates. 4Davydh a gemmeras dhiworto mil varghek ha seyth kans, hag ugens mil droesek. Davydh a evredhis oll mergh an charettow, mes ev a asas lowr anedha rag kans charett.

5Pan dheuth Aramysi Damaskus dhe weres Hadadezer myghtern Soba, Davydh a ladhas dew vil wour warn ugens a Aram. 6Ena Davydh a settyas savleow-goelyadoryon yn Aram Damaskus; hag Aram eth ha bos gostydh dhe Davydh, or tri trubyt. Yth esa an Arloedh ow ri trygh dhe Davydh plepynag yth e. 7Davydh a gemmeras an skoesow a owr esa gans gwesyon Hadadezer, ha'ga dri dhe Yerusalem. 8Dhiworth Betagh ha dhiworth Berothay, sitys Hadadezer, myghtern Davydh a gemmeras shour a vrons.

9Pan glewas Toi myghtern Hamath Davydh dhe fetha oll lu Hadadezer, 10Toi a dhannvonas y vab Yoram dhe Davydh, dh'y salusi ha'y venniga, drefenn ev dhe omladh erbynn Hadadezer ha'y fetha; rag Hadadezer re werrsa gans Toi. Yoram a dhros ganso lestri a arghans, ha lestri a owr, ha lestri a vrons; 11ha'n re ma ynwedh myghtern Davydh a sakras dhe'n Arloedh, war-barth gans an arghans hag owr a sakras dhiworth oll an kenedhlow re fethsa, 12dhiworth Aram,8:12 Aram: Amendys, ow siwya an Septuagint ha'n Syriek. Ebrow Edom. ha Moab, ha dhiworth Ammon, ha'n Filistysi, hag Amalek, ha dhiworth preydh Hadadezer mab Rehob, myghtern Soba.

13Davydh a waynyas ger-da pan dhehwelis, wosa ladha hwetek mil Edomyas yn nans an Hoelan.8:13 Amendys war-lergh an Septuagint. 14Ev a settyas savleow-gwithysi yn Edom; der oll Edom ev a settyas savleow-gwithysi, hag oll Edom eth ha bos gwesyon dhe Davydh. Ha'n Arloedh a ros trygh dhe Davydh plepynag yth e.

Soedhogyon Davydh

15Davydh a reynyas war oll Ysrael; ha Davydh a wrug gwirvreus hag ewnder rag oll y bobel. 16Yth esa Yoab mab Seruya war an lu; ha Yehoshafat mab Ahilud o kovadhor; 17Sadok mab Ahitub hag Ahimelek mab Abiathar, o oferysi; ha Seraya o skrifennyas; 18hag yth esa Benaya mab Yehoyada war an Kerethysi ha'n Pelethysi; ha mebyon Davydh o oferysi.