Kuvder Davydh troha Mefibosheth

1Davydh a wovynnas, ‘Eus hwath nebonan yw gesys a ji Sowl, may hallav diskwedhes dhodho tregeredh drefenn Yonathan?’ 2Lemmyn yth esa gwas a ji Sowl, ha'y hanow Siba, hag ev a veu gelwys dhe Davydh, ha'n myghtern a leveris dhodho, ‘Osta Siba?’ Hag ev a worthybis, ‘Dha was!’ 3Yn-medh an myghtern, ‘A nyns eus hwath gour gesys a ji Sowl, may hallav diskwedhes tregeredh Duw dhodho?’ Ha Siba a worthybis, ‘Yma hwath gesys mab Yonathan; evredhek yw yn y dhewdroes.’ 4An myghtern a leveris dhodho, ‘Ple'ma ev?’ Siba a worthybis dhe'n myghtern, ‘Yma ev yn chi Makir mab Ammiel, yn Lo-debar.’ 5Ena myghtern Davydh a dhannvonas ha'y dhri dhiworth chi Makir mab Ammiel, yn Lo-debar.

6Mefibosheth mab Yonathan mab Sowl a dheuth dhe Davydh, hag ev a goedhas war y fas, hag omblegya. Ha Davydh a leveris, ‘Mefibosheth!’ Ev a worthybis, ‘Ottavy, dha was!’ 7Davydh a leveris dhodho, ‘Na borth own, rag my a dhiskwa tregeredh dhis rag Yonathan dha das; ha my a dhaskorr dhis oll tir a Sowl dha das, ha ty a dheber boes orth ow moes pup-prys.’ 8Ev a omblegyas ha gorthybi, ‘Pandr'yw dha was, may firsys war gi marow kepar ha my?’

9Ena an myghtern a elwis Siba, gwas Sowl, ha leverel dhodho, ‘Pup-tra esa dhe Sowl ha dhe oll y ji my re ros dhe vab dha vester.’ 10Ty ha'th vebyon ha'th wesyon a wonedh an dor ragdho, ha ty a dhre an askorr, may hyll mab dha vester kavoes boes dhe dhybri; mes Mefibosheth mab dha vester a dheber boes pup-prys orth ow moes. Lemmyn yth esa dhe Siba pymthek mab hag ugens gwas. 11Ena Siba a leveris dhe'n myghtern, ‘War-lergh pup-tra a wra ow arloedh an myghtern y erghi dh'y was, yndella y hwra dha was.’ Ha Mefibosheth a dhybri orth moes Davydh, avel onan a vebyon an myghtern. 12Yth esa dhe Mefibosheth mab yowynk, ha'y hanow Mika. Hag oll an re trigys yn chi Siba eth ha bos gwesyon Mefibosheth. 13Ytho yth esa Mefibosheth trigys yn Yerusalem, rag ev a dhybri pup-prys orth moes an myghtern. Evredhek o yn y dhewdroes.