Salusyans

1Powl, Silvanus ha Timothi,

Dhe eglos tus Thessalonika yn Duw agan Tas ha'n Arloedh Yesu Krist:

2Gras dhywgh hwi ha kres dhiworth Duw agan Tas ha'n Arloedh Yesu Krist.

3Y koedh dhyn grassa dhe Dhuw pup-prys yn agas kever, a vreder, dell yw gwiw, rag agas fydh a wra tevi yn fras ha'gas kerensa pubonan dh'y gila a wra palshe, 4may hwren ni bostya ahanowgh yn eglosyow Duw, a'gas perthyans ha'gas fydh yn oll an helghyans ha'n galar a wodhevowgh.

An Vreus yn Devedhyans Krist

5Tokyn diblans yw a vreus gwiryon Duw, may hyllowgh bos degemmerys gwiw dhe wlaskor Duw, mayth esowgh ow kodhevel ragdho. 6Rag gwiryon yw dhe Dhuw dhe attyli galar dhe'n re a wra agas duwenhe, 7ha ri powes genen ni dhywgh hwi yw duwenhes, orth diskwedhyans an Arloedh Yesu dhiworth nev gans y eledh nerthek, 8yn tan ow flammya, ow kul dial war an re na aswonn Duw ha'n re nag yw gostydh dhe aweyl agan Arloedh Yesu. 9I a wra godhevel kessydhyans diswrians heb worfenn dhiworth fas an Arloedh ha dhiworth splannder y nerth, 10pan dheffo y'n jydh na dhe vos glorifiys yn y syns ha ri marth dhe oll an re a grys, rag bos krysys agan dustuni dhywgh hwi. 11Rakhenna ynwedh ni a bys ragowgh pup-prys, may hwrello agan Duw agas gul gwiw dhe'n galow, hag yn nerth kollenwel pub hwans a dhader hag ober fydh, 12may fo gordhys hanow agan Arloedh Yesu ynnowgh hwi, ha hwi ynno ev, war-lergh gras agan Duw ha'n Arloedh Yesu Krist.