Salusyans

1Powl, abostol Krist Yesu dre vynnas Duw war-lergh ambos bewnans yn Krist Yesu,

2Dhe Timothi flogh karadow:

Gras, tregeredh, kres dhiworth Duw an Tas ha Krist Yesu agan Arloedh.

Lelduri dhe'n Aweyl

3Gras a wonn dhe Dhuw a wordhyav dell wrug ow thasow, divlam ow howses, ow perthi kov ahanas heb hedhi y'm pysadow dydh ha nos, 4hwansek dhe'th weles, hag ow perthi kov a'th dagrow, may fiv lenwys a lowena, 5ow perthi kov a'th fydh heb toell na gil a re beu kyns y'th vamm-wynn Lois hag y'th vamm Ewnike hag a drig ynnos jy, sur ov vy. 6Rakhenna, y kovhav dhis may hwytthi flamm ro Duw, usi ynnos dre worra ow diwla. 7Rag ny ros Duw dhyn spyrys ownek mes spyrys a alloes, a gerensa hag a omrewl.

8Ytho, na gemmer meth a dhustuni agan Arloedh, nag ahanav vy, y brisner, mes bydh kevrenner yn godhevyans rag an aweyl war-lergh galloes Duw, 9a wrug agan selwel ha gelwel gans galow sans, a-der herwydh agan gwriansow agan honan, mes war-lergh y dowl ha'y ras ev a veu res dhyn yn Krist Yesu kyns termyn heb worfenn, 10mes diskwedhys lemmyn der omdhiskwedhyans agan Selwador Krist Yesu a wrug diswul ankow ha dri dhe wolow bewnans hag anvarwoleth der an aweyl, 11rygdhi may feuv vy gwrys herot hag abostol ha dyskador.1:11 ha dyskador: War-lergh re a'n dornskrifow ha dyskador dhe'n Jentilys. 12Rakhenna y hwodhavav an taklow ma; mes ny borthav meth, rag my a woer neb re grysis ynno ha sur ov vy ev dhe alloes gwitha an pyth re beu gorrys y'm charj, bys y'n jydh na. 13Gwith an patron a lavarow yagh a glewsys dhiworthiv y'n fydh ha'n kerensa esa yn Krist Yesu. 14Gwith an charj teg der an Spyrys Sans a drig ynnon.

15Ty a woer an re oll yn Asia dhe dreylya dhiworthiv, Fygelus ha Hermojenes yn aga mysk. 16Re dhiskwettho an Arloedh tregeredh dhe deylu Onesiforus rag ev a'm cheryas yn fenowgh ha ny borthas meth a'm kargharow, 17mes pan dheuth dhe Rom ev a'm hwilas yn tiwysyk ha'm kavoes. 18Re wrontyo an Arloedh dhodho may kaffo tregeredh dhiworth an Arloedh y'n jydh na. Ty a woer yn ta an gonis a wrug yn Efesus.