Souder Da a Grist Yesu

1Ty, ow flogh, bydh nerthek gans y'n gras usi yn Krist Yesu; 2ha'n taklow a glewsys dhiworthiv dre lies test, gwra aga gorra yn charj dhe dus lel a vydh gwiw dhe dhyski tus erell ynwedh. 3Gwra godhevel drog, avel souder da dhe Grist Yesu. 4Souder ny wra omvagla gans negys bewnans kemmyn, may hallo plegya dhe neb re wrug y worra war rol y soudoryon. 5Ha den mar mynn kesstrivya, nyns yw kurunys mar ny gesstriv war-lergh an rewlys. 6Dhe'n tiek ow lavurya y koedh dhodho kavoes an kynsa rann a'n drevas. 7Preder a'n pyth a lavarav; rag an Arloedh a re dhis konvedhes yn pup-tra.

8Porth kov a Yesu Krist drehevys dhiworth an re varow, a has Davydh, war-lergh ow aweyl, 9may hwodhavav drog rygdhi, bys may fiv yn kolmow kepar ha drogoberer; mes nyns yw lavar Duw kelmys. 10Rakhenna, pup-tra a borthav rag an re yw dewisys, may kaffons i ynwedh an selwyans usi yn Krist Yesu, gans splannder heb worfenn. 11Lel yw an ger:

Mar merwsyn ganso, ni a wra bewa ganso ynwedh.

12Mar kwren ni durya, kesreynya ynwedh ganso a wren;

mar skonyn, ev ynwedh a wra agan skonya ni.

13Mar ny grysyn, ev a worta lel,

rag ny yll ev omskonya y honan.

Gweythor Kommendys

14Gwra aga hovhe a'n taklow ma, ha'ga charjya a-dherag Duw2:14 a-dherag Duw: War-lergh re a'n dornskrifow a-dherag an Arloedh. na omlatthons a-dro dhe eryow. Nyns yw dhe les, ha ny wra marnas diswul an woslowysi. 15Bydh freth dhe omdhiskwedhes kemmeradow dhe Dhuw, gonisyas heb meth, ow styrya yn ewn an ger a wiryonedh, 16Mes skon lavarow gwag hag ansans, rag yma tus a'n par na ow mos yn-rag moy ha moy dhe ansansoleth, 17ha'ga ger a wra lesa kepar ha kanker. Yn aga mysk yma Hymeneus ha Filetus; 18i re swarvyas dhiworth an gwiryonedh, ow leverel bos an dasserghyans diwedhys seulabrys, hag yth esons ow tomhwel fydh rann a'n bobel. 19Byttegyns selven fyrv Duw a sev, ha warnodho an skrif ma: ‘An Arloedh a aswonn an re usi dhodho’, ha, ‘Pubonan a henow hanow an Arloedh, treylys ev dhiworth kammhynseth.’

20Yn chi bras nyns eus lestri unnsel yn owr hag arghans, mes yn prenn ha pri ynwedh, an re na rag enor ha'n re ma rag disenor. 21Ytho, mar kwra nebonan purjya y honan dhiworth an taklow ma, lester rag enor vydh, sakrys, servabyl dhe'n mester, parys rag pub ober da. 22Gwra goheles ytho an drokhwansow a yowynkneth, mes siw ewnder, fydh, kerensa, kres gans an re a elow war an Arloedh yn-mes a golonn lan. 23Mes skon govynnadow gokki ha diskians, ow kodhvos i dhe dhineythi kedrynna. 24Ny goedh dhe was an Arloedh kedrynna, mes bos kuv orth pub den, yn dyskador da, meur y berthyans, 25yn klorder ow tyski an re a sev er y bynn. Y hyll bos, Duw dhe ri edrek dhedha rag godhvos an gwir, 26ha rag may tehwellons dhe dhivedhowder yn-mes a vaglenn an jowl, maglennys ganso dhe wul y vodh.