Gnas Tus y'n Dydhyow Diwettha

1Ha godhvydh hemma, y'n diwettha dydhyow y teu termynyow kales, 2rag tus a vydh omgaroryon, karoryon mona, goethus, ughel aga fenn, ow tespitya tus erell, diwostydh orth kerens, heb godhvos gras, ansans, 3dinatur, avleythys, kammguhudhoryon, direwl, gwyls, ow kasa dader, 4traytours, dibreder, omhwythys, karoryon plesour moy es karoryon Duw, 5gans semlans sansoleth mes ow nagha y alloes. Treyl dhiworth an re ma. 6Rag yn mysk an re ma, yma an re a dheu a-bervedh yn chiow yn unn slynkya ha kemmeres benynes foll yw beghys gans peghadow ha hembrenkys dre hwansow a lies eghenn, 7ow tyski pup-prys, heb galloes kavoes bythkweth godhvos a'n gwir. 8Kepar dell settyas Yannes ha Yambres orth Moyses, y'n keth vaner an re ma a sett orth an gwir, shyndys aga brys, anwiw a-dro dhe'n fydh. 9Mes nyns ons i yn-rag na fella, rag aga follneth a vydh diblans orth pub den, kepar dell o follneth an dhew na.

Arghadowyow Diwettha dhe Timothi

10Mes ty re siwyas yn tiwysyk ow dyskas, ow fara, ow thowl, ow fydh, ow hirwodhevyans, ow herensa, ow ferthyans, 11ow helghyans, ow galarow a goedhas warnav yn Antiogh, yn Ikonium, yn Lystra, an helghyans a berthis; ha'n Arloedh re wrug ow delivra yn-mes anedha oll. 12Dhe wir, pub den a vynno bewa bewnans sansel yn Krist Yesu a vydh helghys. 13Mes tus dhrog ha faytours a wra mos yn-rag gweth ha gweth ow toella, hag ow pos toellys. 14Mes ty, gwra pesya y'n taklow re wrussys dyski ha krysi yn fast, ow kodhvos gans neb y hwruss'ta aga dyski, 15ha ty dhe wodhvos a-ban es flogh an skrifow sans, a yll dha wul fur bys yn selwyans dre fydh yn Krist Yesu. 16Pub skryptor yw ynspirys gans Duw. Dhe les yw rag dyski, rag keski, rag ewnans ha rag dyskans yn ewnder, 17may fo den Duw gwiw ha parys yn leun rag pub ober da.