1A-dherag Duw ha Krist Yesu neb a wra breusi an re yw bew ha'n re yw marow, my a re charj dhis, ha der y omdhiskwedhyans ha'y wlaskor: 2pregoth an ger; bydh ter, da po drog kyn fo an seson; gwra keredhi, keski hag ynnia gans pub hirwodhevyans ha dyskas. 3Rag an termyn a dheu ma na berthons dyskas yagh, mes war-lergh aga hwansow, kuntell dyskadoryon ragdha aga honan a wrons i, ow kosa aga diwskovarn, 4hag i a dreyl aga diwskovarn dhe-ves dhiworth an gwir hag i a dreyl war-tu ha hwedhlow. 5Mes ty bydh sad yn pup-tra, godhav drog, gwra ober aweyler, kollanw dha venystri.

6Rag yth esov vy ow pos diverys seulabrys avel offrynn diwes, ha devedhys yw termyn ow dibarth. 7My re strivyas an strivyans da ha kowlwul an resegva. My re withas an fydh. 8Alemma rag, ragov vy parys yw an gurun a ewnder a re an Arloedh, an breusydh ewn, dhymmo vy y'n jydh na, ha nyns yw ragov vy yn unnsel, mes rag pubonan re garas y omdhiskwedhyans.

Arghadowyow Personel

9Gwra assaya dhe dhos dhymmo yn skon; 10rag Demas a'm gasas, ow kara an bys ma, ha mos dhe Thessalonika, Kreskens dhe Galatia, Titus dhe Dalmatia. 11Yma Luk yn unnsel genev. Kemmer Mark ha doroy ev genes, rag ev yw dhe les dhymmo rag gonis. 12Tyghikus re dhannvenis dhe Efesus. 13An klok a esis yn Troas gans Karpus, doro ev pan dhyffi, ha'n rol-skrifow, ha dres oll an parcheminennow. 14Aleksander an gweythor kober a wrug meur dhrog dhymmo; an Arloedh a re dhodho war-lergh y wriansow. 15Ty ynwedh bydh war anodho, rag ev a sevis yn feur erbynn agan lavarow.

16Pan wrugavy defens yn kynsa, nyns esa denvyth ow sevel rybov, mes pub den a'm gasas; na vedhes gorrys dh'aga reken. 17Mes an Arloedh a sevis rybov ha ri nerth dhymmo, may fe an pregoth kowlwrys dredhov ha ma'n klewva oll an Jentilys. Ha sawys veuv yn-mes a anow an lew. 18An Arloedh a wra ow delivra dhiworth pub drogober hag ow sawya rag y wlaskor nevek. Dhodho ev re bo gordhyans trank heb worfenn. Amen.

Salusyans Diwettha

19Salus Priska hag Akwila ha teylu Onesiforus. 20Erastus a wortas yn Korinth mes my a asas Trofimus klav yn Miletus. 21Gwra assaya dhe dhos kyns gwav. Ewbulus ha Pudens ha Linus ha Klawdia ha'n vreder oll a'th tynnergh.

22An Arloedh4:22 An Arloedh: War-lergh re a'n dornskrifow An Arloedh Yesu Krist. re bo gans dha spyrys. Gras genowgh hwi.4:22 War-lergh re a'n dornskrifow yma dhe dhiwedh an wers Amen.