Salusyans

1An henavek,1:1 henavek: Greka presbyter. dhe Gayus karadow a garav y'n gwirder.

2A garadow, y fynnav may sewenni yn pup-tra ha may fi yn yeghes da; dell sewen dha enev. 3Rag my a lowenhas yn fen pan dheuth re a'n vreder ha dustunia dhe'n gwirder ynnos, dell wredh holya an gwirder. 4Ny allav kavoes lowender brassa es hemma, my dhe wodhvos y kerdh ow fleghes y'n gwirder.

5A garadow, tra lel a wredh pan wonedhydh rag an vreder, kyn fons estrenyon, 6an re re dhustunias dhe'th kerensa a-rag an eglos; ty a wra da orth aga dannvon yn-rag dell dhelledh dhe wonis Duw. 7Rag i res eth war aga fordh a-barth an Hanow, ha ny dhegemmersons travyth a'n Jentilys, 8Ytho ni a dal skoedhya re a'n par na, rag may fyn kesoberoryon y'n gwirder.

Diotrefes ha Demetrius

9My re skrifas neppyth dhe'n eglos; mes Diotrefes, hag a gar bos an kynsa, ev ny'gan degemmeras. 10Ytho mar tov, my a berth kov a'n pyth usi ev ow kul, ow trogleverel er agan pynn gans geryow gwag. Heb bos pes da gans henna, ev y honan a skon wolkomma an vreder, hag a dhifenn an re a'n jeves hwans dh'aga wolkomma hag ev a's tewl yn-mes a'n eglos.

11A garadow, na wra war-lergh an drog mes gwra war-lergh an da. Neb a wra da yma ev a Dhuw; neb a wra an drog ev ny welas Duw. 12Demetrius a'n jeves dustuni gans pubonan ha gans an gwirder y honan; ni a dheg dustuni dhodho ynwedh, ha ty a woer agan dustuni dhe vos gwir.

Diwettha Salusyans

13My a'm beu meur dhe skrifa dhis, mes ny via da genev skrifa gans pluvenn hag ynk. 14My a wayt y'th welliv yn skon, ha ni a gews fas orth fas.

15Kres re bo dhis. An gowetha a'th salus. Salus an gowetha, orth aga hanow.