Peder ha Kornelius

1Lemmyn yth esa unn gour yn Sesarea henwys Kornelius, penn-kangour an kohort Italek, dell o henwys, 2gour kryjyk, neb a'n jeva own a Dhuw gans y vayni oll, ow ri alusenow yn hel dhe'n bobel ha prest ow pysi war Dhuw. 3A-dro dhe nawves eur an jydh ev a welas diblans yn hunros el Duw ow mos dhodho hag ow leverel dhodho, ‘Kornelius.’ 4Ev a viras stark orto, ha kemmerys gans own ev a leveris, ‘Pandra, ytho, Arloedh?’ Hag ev a leveris dhodho, ‘Dha bysadow ha'th alusenow re yskynnas avel kovadh dherag Duw. 5Lemmyn dannvon gwer dhe Yoppa, rag gelwel unn Simon henwys Peder; 6ymava owth ostya gans Simon, dyghtyer kreghyn, neb a'n jeves chi ryb an mor.’ 7Pan alsa dhe-ves an el neb a gewsis orto, ev a elwis dew a wesyon an mayni ha souder kryjyk a'n re a'n servya prest, 8ha pan igorsa pup-tra dhedha, ev a's dannvonas dhe Yoppa.

9Ternos, hag i ow vyajya hag ow nesa dhe'n sita, Peder a yskynnas dhe'n to rag pysi, a-dro dhe'n hweghves eur. 10Ev a dheuth ha bos nownek ha mynnes dybri; hag i ow tarbari, transyek a dheuth warnodho, 11hag ev a welas an nev igerys, ha lester kepar ha lien bras ow tiyskynna, ow pos iselhes er peswar korn dhe'n dor, 12hag ynno pub enyval peswar-troesek ha pub kramvil a'n nor ha pub edhen a'n ayr. 13Ha lev a dheuth dhodho, ‘Sav yn-bann, Peder; ladh ha deber.’ 14Mes yn-medh Peder, ‘Kamm na yll bos, Arloedh, drefenn na dhybris vy bythkweth travyth kemmyn nag avlan.’ 15Ha'n lev a dheuth dhodho arta, nessa gweyth, ‘An taklow re lanhas Duw, na's galw avlan.’ 16Hemma a hwarva teyrgweyth, hag a-dhistowgh an lester a veu kemmerys yn-bann dhe nev.

17Lemmyn, ha Peder penndegys a-dro dhe styr an welesigeth a welsa, otta, an wer re bia dannvenys gans Kornelius a wovynnas ple'th esa chi Simon, hag a dheuth dhe'n porth, 18ha gelwel rag govynn mars esa Simon henwys Peder owth ostya ena. 19Ha Peder owth ombrederi a-dro dhe'n welesigeth, an Spyrys a leveris, ‘Otta, yma gwer orth dha hwilas; 20sav yn-bann, ha diyskynn, ha ke gansa, heb dout vyth, rag my re's dannvonas i.’ 21Ha Peder a dhiyskynnas ha leverel dhe'n wer, ‘Otta, my yw neb a hwilowgh; pyth yw skila agas bos omma?’ 22I a leveris, ‘Kornelius, penn-kangour, gour ewnhynsek neb a berth own a Dhuw ha neb yw gerys-da gans oll an genedhel yedhowek, dhodhheb o y feu erghys gans el sans may halwa dh'y ji ev ha goslowes orth an pyth a vynnydh y leverel.’ 23Ytho ev a's gelwis a-ji ha dhe vos y westoryon.

Ha ternos ev a sevis yn-bann ha mos dhe-ves gansa, ha niver a'n vreder a Yoppa eth ganso. 24Ternos ev a entras yn Sesarea. Yth esa Kornelius orth aga gortos hag ev re alwsa war-barth y gerens ha'y gowetha nessa. 25Lemmyn y hwarva pan entras Peder, Kornelius a vetyas orto ha koedha orth y dreys, ha'y wordhya. 26Mes Peder a'n drehevis, ow leverel, ‘Sav yn-bann, rag my yw den ynwedh.’ 27Hag ev ow kewsel orto, ev eth a-ji ha kavoes lies kuntellys war-barth, 28ha leverel dhedha, ‘Dell gonvedhowgh, erbynn lagha yw rag Yedhow kowethya gans estren po dos nes dhodho; mes Duw re dhiskudhas dhymm na dhegoedh dhymm gelwel denvyth kemmyn nag avlan; 29rakhenna dhe wir pan veuv gelwys my a dheuth heb hokya. My a wovynn, ytho, prag y tannvensowgh hwi war ow lergh?’

30Hag yn-medh Kornelius, ‘Nans yw peswar dydh, dhe'n keth eur ma, dhe'n nawves eur yth esen ow pysi y'm chi, hag otta, gour a sevis a-dheragov, splann y dhillas, 31ha leverel, “Kornelius, dha bysadow re beu klewys ha'th alusenow re beu kovhes dherag Duw. 32Dannvon, ytho, dhe Yoppa ha dannvon war-lergh Simon henwys Peder; ymava owth ostya yn chi Simon, dyghtyer kreghyn, ryb an mor.” 33Rakhenna my a dhannvonas hware war dha lergh hag a'th kuvder devedhys osta. Lemmyn kuntellys on ni oll dherag Duw rag goslowes orth an taklow oll re beu erghys dhis gans an Arloedh.’

Jentilys a Glew an Nowodhow Da

34Ha Peder a igoras y anow ha leverel, ‘Yn hwir, my a gonvedh na syns Duw denvyth a-ugh y gila, 35mes yn pub kenedhel neb a'n jeves own anodho ha gul ewnder yw plegadow dhodho. 36Hwi a woer an ger a dhannvonas ev dhe vebyon Ysrael, ow pregoth kres dre Yesu Krist neb yw Arloedh peub oll. 37Hwi a woer an pyth a hwarva dres Yudi oll, ow talleth a Alile wosa an besydh a bregowthas Yowann, 38fatell untyas Duw Yesu a Nazareth gans an Spyrys Sans ha nerth; neb eth a-dhedro ow kul dader hag ow yaghhe peub o arweskys gans an jowl, drefenn bos Duw ganso. 39Ha dustunioryon on ni dhe bup-tra a wrug ev, hag yn pow an Yedhewon hag yn Yerusalem; i a'n ladhas, orth y gregi yn gwydhenn. 40Duw a dhrehevis hemma an tressa dydh, ha gul dhodho bos diskwedhys, 41a-der dhe'n bobel oll, mes dhyn ni, dewisys kyns gans Duw dhe vos dustunioryon, neb a dhybris ganso hag a evas ganso wosa ev dhe dhasserghi dhiworth an re varow; 42hag ev a erghis dhyn pregoth dhe'n bobel ha doen dustuni ev dhe vos neb re beu ordenys gans Duw avel breusyas a'n re vew ha'n re varow. 43Dhe hemma, oll an brofoesi a dhustuni, kemmys a grysso ynno dhe dhegemmeres dehwelyans peghosow der y hanow.’

Jentilys a Dhegemmer an Spyrys Sans

44Ha Peder hwath ow kewsel an geryow ma, an Spyrys Sans a goedhas war bub huni esa ow koslowes orth an areth. 45Ha'n gryjygyon a'n trodreghyans neb re dhothya gans Peder a veu sowdhenys, drefenn bos ro an Spyrys Sans dinewys war an Jentilys ynwedh; 46rag i a's klewas ow kewsel yn tavosow hag ow meurhe Duw. Ena Peder a worthybis, 47‘A yll nebonan difenn dowr dhe'n re ma na vons besydhys, neb re dhegemmeras an Spyrys Sans kepar ha ni ynwedh?’ 48Hag ev a erghis may fens i besydhys yn hanow Yesu Krist. Ena i a'n pysis a wortos niver a dhydhyow.