Gwelesigeth Peder

1Lemmyn an abesteli ha'n vreder esa yn Yudi a glewas an Jentilys ynwedh dhe dhegemmeres ger Duw. 2Ha pan eth Peder yn-bann dhe Yerusalem, an re a'n trodreghyans a dhisputyas orto, 3ow leverel, ‘Ty eth a-ji gans gwer antrodreghys ha dybri gansa.’ 4Ytho Peder a dhallathas hag igeri dhedha yn kempenn, ow leverel, 5‘Yn sita Yoppa yth esen vy ow pysi, hag yn transyek my a welas gwelesigeth, lester ow tiyskynna kepar ha lien bras ow pos iselhes er peswar korn mes a nev, hag ev a dheuth ogas dhymm. 6Ow mires stark ynno my a welas enyvales peswar-troesek an nor, ha'n goedhviles ha'n kramviles hag ydhyn an ayr. 7Hag ynwedh my a glewas lev ow leverel dhymm, “Sav yn-bann, Peder, ladh ha deber.” 8Mes yn-medhav, “Kamm na yll bos, Arloedh, drefenn na entras bythkweth y'm ganow travyth kemmyn nag avlan.” 9Ha nessa gweyth an lev a worthybis mes a nev, “An taklow re lanhas Duw, na's galw kemmyn.” 10Hemma a hwarva teyrgweyth, ha pup-tra a veu tennys yn-bann arta dhe nev. 11Hag otta, hware, tri gour a sevis a-rag an chi mayth esen vy, dannvenys dhymm dhiworth Sesarea. 12Ha'n Spyrys a leveris dhymm mos gansa heb hokya. An hwegh broder ma a dheuth genev ynwedh, ha ni a entras yn chi an gour. 13Ev a dherivas dhyn fatell welas an el ow sevel yn y ji hag ow leverel, “Dannvon dhe Yoppa ha galw Simon henwys Peder, 14neb a gews dhis geryow may fo ty ha'th vayni oll selwys.” 15Ha my ow talleth kewsel, an Spyrys Sans a goedhas warnedha kepar dell wrug warnan ni y'n dalleth. 16Ha my a borthas kov a er an Arloedh, pan leveris, “Yn tevri Yowann a vesydhyas gans dowr, mes besydhys vydhowgh hwi y'n Spyrys Sans.” 17Rakhenna mar ros Duw dhedha an keth ro kepar dell ros dhyn ni pan gryssyn y'n Arloedh Yesu Krist, piw en vy may hallen lettya Duw?’ 18Pan glewsons an taklow ma, i a dewis ha gordhya Duw, ow leverel, ‘Ytho dhe'n Jentilys ynwedh Duw re ros edrek a led dhe vewnans.’

An Eglos yn Antiogh

19Lemmyn an re a veu skattrys der an anken a hwarva a-dro dhe Stefan a vyajyas bys yn Fenikia ha Kyprus hag Antiogh, heb kewsel an ger marnas unnsel dhe Yedhewon. 20Mes rann anedha o gwer Kyprus ha Kyrene neb a dheuth dhe Antiogh ha kewsel orth an Hellenistyon ynwedh, ow pregoth an Arloedh Yesu. 21Hag yth esa leuv an Arloedh gansa, ha niver meur a grysis ha treylya dhe'n Arloedh. 22Nowodhow a henna a dheuth dhe skovornow an eglos yn Yerusalem, hag i a dhannvonas Barnabas dhe Antiogh. 23Pan dheuth ha gweles gras Duw ev a lowenhas, hag ev a ynnias war bubonan anedha bos lel dhe'n Arloedh, furv aga holonn, 24rag gour da o, leun a'n Spyrys Sans hag a fydh. Ha niver meur a dus a veu keworrys dhe'n Arloedh. 25Ytho Barnabas eth dhe Tarsus rag hwilas Sowl, 26ha pan y'n kavas ev a'n dros dhe Antiogh. Dell hwarva ynwedh i a omguntellas gans an eglos dres blydhen dhien, ha dyski niver meur a dus. Hag yn Antiogh yn kynsa an dhyskyblon a veu henwys Kristonyon.

27Y'n dydhyow ma profoesi a dheuth yn-nans dhiworth Yerusalem dhe Antiogh; 28hag onan anedha henwys Agabus a sevis yn-bann, ha dargana der an Spyrys y fedha divoetter meur dres oll an norvys; hemma a hwarva yn termyn Klawdius. 29Rakhenna an dhyskyblon a erviras, pub huni herwydh y bygans, dannvon sokor dhe'n vreder trigys yn Yudi. 30Hag yndella i a'n gwrug, ow tannvon dhe'n henavogyon dre leuv Barnabas ha Sowl.