Jamys Ledhys ha Peder Gorrys yn Prison

1Lemmyn y'n termyn na Herod an myghtern a dewlis diwla war rann a'n re a'n eglos rag aga thebeldhyghtya. 2Ev a ladhas Jamys broder Yowann gans kledha; 3ha pan welas bos henna plegadow dhe'n Yedhewon, ev eth yn-rag dhe dhalghenna Peder ynwedh; yth esa hemma yn dydhyow an bara heb goell. 4Wosa y dhalghenna, ev a'n gorras yn prison, orth y ri dhe beswar para a soudoryon rag y witha, owth mynnes y dhri a-dherag an bobel wosa an pask. 5Rakhenna Peder a veu gwithys yn prison; mes pysadow diwysyk a'y wovis a veu gwrys gans an eglos dhe Dhuw.

Peder Livrys mes a'n Prison

6Pan o Herod parys dh'y dhri yn-rag, y'n nos na yth esa Peder ow koska yntra dew souder, kelmys gans dew jayn, hag yth esa gwithysi dherag an daras ow kwitha an prison. 7Hag otta, el an Arloedh a sevis ogas dhodho, ha golow a splannas y'n vagh; hag ow kweskel tenewen Peder ev a'n drehevis yn-bann, ow leverel, ‘Sav yn-bann, fisten.’ Ha'n chaynys a goedhas dhiworth y dhiwla. 8Ena an el a leveris dhodho, ‘Omgweth, ha gwisk dha sandalyow.’ Hag ev a wrug henna. Hag ev a erghis dhodho, ‘Towl dha vantell y'th kyrghynn ha hol vy.’ 9Ytho ev eth yn-mes ha'y holya; ny wodhva bos gwir an pyth esa ow hwarvos der an el, mes ev a dybis ev dhe weles gwelesigeth. 10Wosa tremena an kynsa gwithyas ha'n nessa, i a dheuth dhe'n yet a horn hag a ledyas dhe'n sita; hi a igoras hy honan dhedha, hag ow mos yn-mes i eth yn-rag der unn stret ynn, hag a-dhesempis an el a dhibarthas dhiworto. 11Ena Peder a dheuth dh'y ewn rewl ha leverel, ‘Lemmyn my a woer yn hwir y tannvonas Duw y el ha'm livra mes a leuv Herod ha mes a oll gwaytyans an bobel yedhowek.’

12Hag ev ow konvedhes hemma, ev a dheuth dhe ji Maria, mamm Yowann henwys Mark mayth esa lies kuntellys war-barth, hag ow pysi. 13Ha pan gnoukyas ev orth daras an porth, maghteth henwys Rhoda a nesas rag gorthybi. 14Owth aswonn lev Peder, yn joy ny igoras hi an porth, mes hi a boenyas a-ji ha leverel bos Peder ow sevel a-rag an porth. 15Mes yn-medhons i dhedhi, ‘Mes a'th rewl osta.’ Mes yth esa hi ow synsi yn ter bos henna gwir. Ytho yn-medhons i, ‘Y el yw.’ 16Mes Peder a besyas knoukya; ha pan igorsens, i a'n gwelas ha marth bras a's teva. 17Ev a wrug sin dhedha gans y leuv may tawens, ha derivas dhedha fatell wrug an Arloedh y hembronk mes a'n prison, ha leverel, ‘Derivewgh an taklow ma dhe Jamys ha dhe'n vreder.’ Ena ev a omdennas ha mos dhe gen tyller.

18Ha pan dheuth an jydh, yth esa ankres na veu byghan yn mysk an soudoryon, a-dro dhe'n pyth a hwarvia dhe Peder. 19Ha pan y'n hwilas Herod heb y gavoes, ev a hwithras an withysi ha gorhemmynna may fens gorrys dhe'n mernans; hag ev eth yn-nans dhiworth Yudi dhe Sesarea ha gortos ena.

Mernans Herod

20Lemmyn ev o fest serrys orth Tus Tyr ha Sidon; ha gans unn akord i a dheuth dhodho, ha wosa i dhe dhendil skoedhyans Blastus, chambourlen an myghtern, i a bysis kres, drefenn bos aga fow sostenys dhiworth gwlas an myghtern. 21Hag yn dydh ordenys, Herod taklys yn y dhillas ryel a esedhas yn y vreusva hag arethya dhedha; 22ha'n routh a armas, ‘Lev duw, a-der den.’ 23Hware el an Arloedh a'n gweskis, drefenn na ros ev an gordhyans dhe Dhuw, ha devorys gans pryves ev a verwis.

24Mes ger Duw a devi ha kressya. 25Ha Barnabas ha Sowl a dhehwelis dhe Yerusalem, wosa kowlwul aga negys,12:25 a dhehwelis dhe Yerusalem: Greka a dhehwelis a Yerusalem dhe Antiogh. ow tri gansa Yowann henwys Mark.