Powl ha Barnabas yn Ikonium

1Lemmyn dell hwarva yn Ikonium, i a entras war-barth yn synaga an Yedhewon ha kewsel yn maner may krysis routh veur, ha Yedhewon ha Grekys. 2Mes an Yedhewon neb o diskryjygyon a ynnias war an Jentilys, ow treylya aga brys erbynn an vreder. 3Rakhenna hirneth i a wortas, ow kewsel yn hardh rag an Arloedh neb a dhustunias dhe er y ras, ow kul dhe doknys ha marthusyon hwarvos der aga diwla. 4Mes rynnys o pobel an sita hag yth esa rann anedha gans an Yedhewon, mes re erell gans an abesteli. 5Ha pan veu gwrys assay hag a'n Jentilys hag a'n Yedhewon gans aga routers dh'aga thebeldhyghtya ha dh'aga labydha, 6i a glewas anodho ha diank dhe Lystra ha Derbe, sitys a Lykaonia, ha dhe'n pow a-dro, 7hag y'n tylleryow na i a bregowthas an aweyl.

Powl ha Barnabas yn Lystra ha Derbe

8Lemmyn yn Lystra yth esa unn gour dialloes y dhewdroes, evredhek dhiworth torr y vamm, na gerdhsa bythkweth. 9An den ma a woslowas orth Powl ow kewsel; ha Powl, ow hwithra warnodho hag ow kweles y'n jeva fydh may fe yaghhes, 10a leveris, ughel y lev, ‘Sav yn-bann war dha dreys.’ Hag ev a lammas yn-bann ha kerdhes. 11Ha pan welas an routhow an pyth a wrussa Powl, i a dhrehevis aga lev, ow leverel yn Lykaonek, ‘An duwow re dhiyskynnas dhyn yn hevelep denel’, 12ha Barnabas i a henwis Zeus, ha Powl Hermes, drefenn y vos an penn-arethor. 13Hag oferyas Zeus, dhe neb esa y dempel a-rag an sita, a dhros terewi ha garlontow dhe'n porthow ha mynnes sakrifia gans an routhow. 14Mes an abesteli Barnabas ha Powl a glewas, hag ow skwardya aga dillas i a fyskas yn-mes yn mysk an routh, ow karma, 15‘A wer, prag y hwrewgh hwi an taklow ma? Ni ynwedh yw gwer, a'n keth gnas avelowgh, ha ni a bregoth rag agas treylya dhiworth an taklow koeg ma dhe Dhuw bew, neb a wrug an nev ha'n nor ha'n mor ha pup-tra eus ynna. 16Y'n henedhow tremenys ev a asas an kenedhlow oll dhe vos yn aga fordhow aga honan; 17byttegyns ny asas y honan heb dustuni, rag dader ev a wra, ow ri dhywgh glaw a nev ha prysyow ow toen frut, ow lenwel agan kolonnow a voes hag a heudhder.’ 18Hag ow leverel an taklow ma, skant y lettsons an routhow a sakrifia dhedha.

19Mes Yedhewon dhiworth Antiogh hag Ikonium a dheuth di, ha wosa dendil skoedhyans an routhow i a labydhas Powl ha'y dhraylya mes a'n sita, ow tybi ev dhe vos marow. 20Byttegyns, ha'n dhyskyblon owth omguntell a-dro dhodho, ev a sevis yn-bann hag entra y'n sita. Ha ternos ev eth yn-rag gans Barnabas dhe Derbe.

An Dehwelyans dhe Antiogh yn Syria

21Ha pan bregowthsens an aweyl dhe'n sita na ha gul meur a dhyskyblon, i a dhehwelis dhe Lystra ha dhe Ikonium ha dhe Antiogh, 22ow surhe spyrys an dhyskyblon ha'ga ynnia pesya y'n fydh, ha leverel y tegoedh dhyn dre lies galar entra yn gwlaskor Duw. 23Ha pan ordensens ragdha henavogyon yn pub eglos, gans pysadow ha penys i a's kommendyas dhe'n Arloedh yn neb a gryssens.

24Ena i a bassyas dre Pisidia ha dos dhe Pamfylia, 25ha pan gowssens an ger yn Perga i a dheuth yn-nans dhe Attalia 26hag alena i a woelyas dhe Antiogh, may fiens kommendys dhe ras Duw rag an ober re gowlwrussens. 27Ha pan ens i devedhys i a guntellas war-barth an eglos ha derivas an taklow re wrussa Duw dredha, ha fatell igorsa daras a fydh dhe'n Jentilys. 28Hag i a wortas pol'ta gans an dhyskyblon.