Timothi a Jun gans Powl ha Silas

1Hag ynwedh ev a dheuth yn-nans dhe Derbe ha dhe Lystra. Hag otta, yth esa ena unn dyskybel henwys Timothi, mab Yedhowes kryjyk mes y das o Grek. 2Ev o gerys-da gans an vreder yn Lystra hag Ikonium. 3Powl a vynnas orto mos yn-rag ganso, hag ev a'n kemmeras ha'y drodreghi drefenn an Yedhewon esa y'n tylleryow na; rag i oll a wodhva bos y das Grek. 4Lemmyn, hag i ow mos der an sitys, i a dherivas dhedha an erviransow ordenys gans an abesteli ha'n henavogyon yn Yerusalem, ma's obayens. 5Ytho an eglosyow a veu krevhes y'n fydh ha kressya yn aga niver pub dydh.

Gwelesigeth Powl a'n Gour a Makedonia

6Hag i eth dre rannvro Frygia ha Galatia, lettys gans an Spyrys Sans rag kewsel an ger yn Asia. 7Mes pan dhothyens bys yn Mysia, i a assayas mos yn Bithynia, ha Spyrys Yesu ny ros dhedha kummyas; 8rakhenna, ow tremena dre Mysia, i a dheuth dhe Troas. 9Ha gwelesigeth a omdhiskwedhas dhe Powl y'n nos: yth esa gour a Makedonia ow sevel, hag ev a'n pysis ow leverel, ‘Deus a-dreus bys yn Makedonia, ha gweres ni.’ 10Ytho, pan welsa ev an welesigeth, hware ni a ombareusis rag mos yn-rag dhe Makedonia, ha ni sertan Duw dh'agan gelwel rag pregoth an aweyl dhedha.

Treylyans Lydia

11Hag ow mora dhiworth Troas, ni a woelyas yn resegva gewar dhe Samothrake, ha ternos dhe Neapolis, 12hag alena dhe Filippi, hag yw pennsita y'n rann na a Makedonia, trevesigeth romanek16:12 trevesigeth romanek: Greka kolonia. Ha ni a wodrigas y'n sita ma niver a dhydhyow. 13Y'n sabot ni eth yn-mes a'n porth ryb avon, le mayth esa, dell dybsyn, tyller a bysadow, hag owth esedha ni a gewsis orth an benynes o kuntellys. 14Hag yth esa unn venyn henwys Lydia, marchont yn purpur, a'n sita Thyatira neb o gordhyores Duw, ow koslowes; ha'n Arloedh a igoras hy golonn dhe attendya an taklow kewsys gans Powl. 15Ha pan veu besydhys ha gensi hy mayni, hi a'gan pysis, ow leverel, ‘Mar synsowgh hwi ow bos lel dhe'n Arloedh, dewgh dhe ostya y'm chi’; ha hi a ynnias warnan.

Powl ha Silas yn Prison

16Ha dell hwarva, ha ni ow mos dhe'n tyller a bysadow, unn vaghteth ha gensi spyrys a dhewinieth a dheuth er agan pynn, neb a dhri meur a wayn dh'y mestrysi ow targana fortunyow. 17Hag owth holya Powl ha ni, hi a grias, ow leverel, ‘An dus ma yw gwesyon Duw an ughella, neb a bregoth dhywgh fordh selwyans.’ 18Hi a wre hemma lies dydh. Mes Powl eth ha bos anniys meur, hag ow treylya ev a leveris dhe'n spyrys, ‘My a'th ergh yn hanow Yesu Krist dos yn-mes anedhi.’ Hag ev a dheuth yn-mes y'n keth eur na.

19Ha'y mestrysi, ow kweles bos gyllys govenek aga gwayn, a dhalghennas Powl ha Silas ha'ga thenna dhe blen an varghas a-rag an rewloryon, 20hag orth aga dri dhe'n justisyow, i a leveris, ‘Yma'n dus ma, yw Yedhewon, ow trobla agan sita, 21hag i a bregoth devosow nag yw lafyl ragon ni Romanyon, na dhe dhegemmeres na dhe wul.’ 22Ha'n routh a sevis gansa er aga fynn, ha'n justisyow ow tenna dhiworta aga dillas a worhemmynnis may fens kastigys, 23ha wosa gorra warnedha meur a strokosow i a's tewlis yn prison, owth erghi dhe'n jayler ma's gwittha gans rach. 24Pan dhegemmeras arghadow a'n par na, ev a's tewlis y'n downa prison ha karghara aga threys y'n stokkys.

25Hag a-dro dhe hanter-nos yth esa Powl ha Silas ow pysi hag ow kormel Duw dre hymnys, hag yth esa an brisnoryon ow koslowes orta; 26hag a-dhesempis yth esa dorgrys meur, may feu kryghyllys selyow an prison; hag a-dhistowgh an darasow oll a veu igerys, ha kolmow pub huni a veu lowsys. 27Pan dhifunas an jayler ha gweles bos igerys darasow an prison, ev a dennas yn-mes y gledha, ha parys o dhe omladha, ow tybi y tianksa an brisnoryon. 28Mes Powl a elwis, ughel y lev, ow leverel, ‘Na wra drog vyth dhiso jy dha honan, rag yth eson ni oll omma.’ 29Hag ow kovynn golowys, ev a fyskas a-ji ow krena ha koedha a-rag Powl ha Silas, 30hag orth aga hembronk yn-mes ev a leveris, ‘Syrrys, pandr'a goedh dhymm dhe wul may fiv selwys?’ 31Hag yn-medhons i, ‘Krys y'n Arloedh Yesu, ha ty ha'th vayni a vydh selwys.’ 32Hag i a gewsis ger an Arloedh dhodho ev ha dh'y vayni oll. 33Y'n keth eur a'n nos ev a's kemmeras ha golghi aga goliow, hag ev hag oll y deylu a veu besydhys heb hokya. 34Ev a's dros yn-bann dh'y ji ha gorra boes a-dheragdha, hag ev hag oll y vayni a lowenhas y tothya ev ha bos kryjyk yn Duw.

35Pan dheuth an jydh, an justisyow a dhannvonas an soedhogyon, ow leverel, ‘Delivrewgh an dus na.’ 36Ha'n jayler a dherivas an geryow ma dhe Powl, ‘An justisyow re dhannvonas may fowgh hwi delivrys. Lemmyn, ytho, dewgh yn-mes ha kewgh yn kres.’ 37Mes yn-medh Powl dhedha, ‘I re'gan kastigas a-rag an bobel, heb agan bos dampnys, ha ni burjysi romanek, i a'gan tewlis yn prison. Ha lemmyn i a wra agan pellhe yn-dann gel? Ny wrons, devri, mes dens aga honan dh'agan dri yn-mes.’ 38An soedhogyon a dherivas an geryow ma dhe'n justisyow. Hag own a's teva pan glewsons aga bos burjysi romanek, 39hag i a dheuth ha dihares dhedha, hag i a's dros yn-mes ha'ga fysi a vos mes a'n sita. 40Ha wosa mos dhiworth an prison, i eth dhe ji Lydia, hag ow kweles an vreder i a's kennerthas, ha mos mes a'n sita.