An Deray yn Thessalonika

1Hag ow tremena dre Amfipolis hag Apollonia, i a dheuth dhe Thessalonika mayth esa synaga a'n Yedhewon. 2Ha herwydh usadow Powl, ev a entras ena, ha tri dydh sabot ev a dhadhlas gansa dhiworth an skryptors, 3owth igeri hag ow tiskwedhes dhedha bos res dhe'n Krist godhav ha dastrehevel dhiworth an re varow, ow leverel, ‘Hemm o an Krist, Yesu neb a bregowthav dhywgh.’ 4Ha re anedha a veu treylys, hag i a junyas gans Powl ha Silas, keffrys ha routh vras a'n Grekys kryjyk ha meur a venynes a roweth. 5Mes an Yedhewon eth ha bos leun a avi hag ow tri gansa drogwesyon a'n losels yn plen an varghas, i a guntellas routh ha gul deray y'n sita, hag ow fyski dhe ji Yason i a's hwilas rag aga dri a-rag kuntelles an bobel; 6mes pan na's kavas i a dennas Yason ha re a'n vreder dhe soedhogyon an sita, ow kria, ‘An dus ma neb re dreylyas an nor war y benn re dheuth omma ynwedh, 7ha Yason re's degemmeras; hag oll an re ma a far erbynn arghadowyow Sesar, ow leverel bos ken myghtern, Yesu.’ 8An routh ha'n soedhogyon a veu troblys pan glewsons an taklow ma, 9ha wosa kemmeres mewgh dhiworth Yason ha'n re erell, i a's livras.

Powl ha Silas yn Berea

10Hag a-dhistowgh, yn termyn nos, an vreder a dhannvonas yn-rag ha Powl ha Silas dhe Berea. Pan dheuthons di, i eth yn synaga an Yedhewon; 11ha'n dus ma o gwell yn aga gnas ages an re na yn Thessalonika, rag i a dhegemmeras an ger gans mall meur, ow hwithra an skryptors pub dydh, dhe weles mar pe gwir an taklow ma. 12Rakhenna meur anedha a grysis, ha niver da a'n benynes Grek hag a'n wer. 13Mes pan wodhva an Yedhewon a Thessalonika bos ger Duw pregewthys gans Powl yn Berea ynwedh, i a dheuth di ynwedh ow kryghylli hag ow korra an routhow yn deray. 14Ytho, an vreder a dhannvonas Powl dhe-ves, rag mos dhe'n mor; mes Silas ha Timothi a wortas ena. 15Ha'n re esa ow ledya Powl a'n dros bys yn Athenys, ha wosa degemmeres arghadow dhe Silas ha Timothi may teffens dhodho skonna gyllens, i eth dhe-ves.

Powl yn Athenys

16Hag yn Athenys, ha Powl orth aga gortos, grevys veu y spyrys ynno pan welas an sita leun a idolys. 17Rakhenna ev a dhadhlas y'n synaga gans an Yedhewon ha gans an wordhyoryon, ha pub dydh yn plen an varghas gans an re esa ena par happ. 18Mes re a'n filosoforyon Epikurek ha Stoik a geskewsi ganso, ha re a leveris, ‘Pandr'a vynn an klappyer diskians ma dhe leverel?’ Hag yn-medh re erell, ‘Dell hevel, pregowther a dhywolow astranj yw ev’; rag ev dhe bregoth Yesu ha'n dasserghyans. 19Hag orth y synsi i a'n ledyas dhe'n Areopagus, ow leverel, ‘A yllyn ni godhvos pyth yw an dyskas nowydh ma hag a dherivydh? 20Rag ty a dhre dh'agan diwskovarn taklow marthys koynt; rakhenna ervirys on ni godhvos styr an taklow ma.’ 21Lemmyn oll tus Athenys ha'n estrenyon trigys ena ny's tevo termyn marnas dhe leverel po klewes neppyth nowydh.

22Hag ow sevel yn kres an Areopagus, yn-medh Powl, ‘Gwer a Athenys, my a wel fatell owgh hwi fest kryjyk yn pub fordh. 23Rag, ha my ow tremena hag ow hwithra taklow agas gordhyans, my a gavas ynwedh alter mayth o skrifys “Dhe dhuw anwodhvos.” Ytho, an pyth a wordhyowgh yn tiskians, hemma my a iger dhywgh. 24An Duw neb a formyas an bys ha pup-tra ynno, neb yw Arloedh nev ha nor, ny drig yn templow gwrys gans diwla den, 25na nyns yw servys gans diwla den kepar ha pan ve dhodho edhomm a neppyth, rag ev a re bewnans hag anall ha pup-tra dhe bub den oll; 26hag ev a wrug a unn den pub kenedhel a dus mayth annetthens enep kowal an nor, hag ev a apoyntyas aga oesow destnys hag oryon aga annedhow, 27may hwillens Duw, martesen orth y hwila yn-dann dava ha'y gavoes, kyn nag yw ev pell dhiworth pub huni ahanan. 28Rag “Ynno ev ni a vew ha gwaya ha kavoes agan bosva.” Par dell leveris re a'gas berdh,

“Rag ni ynwedh yw y askorr.”

29A-ban on ni askorr Duw, ny goedh dhyn tybi bos an Duwsys kepar hag owr po arghans po men, imaj gwrys dre sleyghneth ha dysmygyans denel. 30Ytho, ny wrug Duw vri a'n oesow a dhiskians, ha lemmyn ev a worhemmynn dhe boblow oll yn pub le may kemmerrons edrek, 31drefenn ev dhe settya dydh may hwra breusi an bys yn ewnder, dre wour neb re apoyntyas, ow profya mewgh dhe oll, orth y dhrehevel dhiworth an re varow.’

32Pan glewsons a dhasserghyans an re varow, re a skornyas, mes re erell a leveris, ‘Ni a vynn goslowes orthis arta a-dro dhe hemma.’ 33Gans henna, Powl a omdennas dhiworta. 34Mes niver a wer a junyas ganso ha krysi, yn aga mysk Dionysius an Areopagit, ha benyn henwys Damaris, ha gansa re erell.