Powl yn Korinth

1Wosa an taklow ma ev a asas Athenys ha dos dhe Korinth. 2Ev a gavas unn Yedhow henwys Akwila, genesik a Pontus, neb re dhothya degynsow a Itali gans Priskilla y wreg, drefenn Klawdius dhe worhemmynna dhe'n Yedhewon oll mayth omdennens dhiworth Rom. Hag ev a dheuth dhedha, 3ha drefenn y vos a'n keth kreft ev a drigas gansa, hag yth esa owth oberi; rag gwrioryon a dyldow ens i a'ga kreft. 4Ha pub sabot ev a dhadhla y'n synaga, hag ev a assaya treylya ha Yedhewon ha Grekys. 5Ha pan dheuth Silas ha Timothi yn-nans a Makedonia, Powl a omri moy ha moy dhe'n ger18:5 a omri moy ha moy dhe'n ger: War-lergh re a'n dornskrifow a veu konstrynys y'n spyrys., ow toen dustuni dhe'n Yedhewon bos Yesu an Krist. 6Mes pan sevsons er y bynn ha kewsel blasfemi, ev a shakyas y dhillas ha leverel dhedha, ‘Re bo agas goes war agas penn agas honan; glan ov vy. Alemma rag, mos dhe'n Jentilys a wrav.’ 7Hag ev a omdennas alena ha mos dhe ji gour henwys Titius Yustus, gordhyer Duw, mayth esa y ji ryb tenewen an synaga. 8Lemmyn Krispus, rewler an synaga, ha ganso oll y vayni, a grysis y'n Arloedh, ha meur a dus Korinth, pan glewsons, a grysis hag a veu besydhys. 9Hag y'n nos, an Arloedh a leveris dhe Powl yn gwelesigeth, ‘Na borth own, mes kows ha na daw, 10rag yth esov vy genes, ha denvyth ny wra omsettya er dha bynn rag dha bystiga, drefenn bos dhymm meur a dus y'n sita ma.’ 11Hag yth esa trigys ena blydhen ha hwegh mis, ow tyski ger Duw yn aga mysk.

12Mes pan o Gallio prokonsul Aghaia, an Yedhewon, unys aga brys, a omsettyas erbynn Powl ha'y dhri dhe'n barr, 13ow leverel, ‘An gour ma a ynni tus gordhya Duw yn fordhow erbynn an lagha.’ 14Ha Powl owth igeri y anow rag kewsel, yn-medh Gallio dhe'n Yedhewon, ‘Mar pe kas a dhrogober po hager vileni, A Yedhewon, herwydh reson my a dhegemmersa agas krodhvol; 15mes rag bos hemma mater a wovynnow a-dro dhe eryow ha henwyn ha'gas lagha agas honan, ev dyghtyewgh agas honan; ny vynnav vy bos breusyas a'n taklow ma.’ 16Hag ev a's chasyas dhe-ves a'n barr. 17Ena i oll, ow talghenna Sosthenes, rewler an synaga, a'n gweskis a-rag an barr; mes ny wrug Gallio vri orth nagonan a'n taklow ma.

Dehwelyans Powl dhe Antiogh

18Wosa gortos lies dydh moy, Powl a leveris farwell gans an vreder ha goelya dhe-ves dhe Syria, ha ganso Priskilla hag Akwila, wosa ev dhe dreghi y wols yn Kenkrea; rag y feu dhodho ambos. 19I a dheuth bys yn Efesus hag ev a's gasas ena, mes ev eth yn synaga ha dadhla gans an Yedhewon. 20Ha pan y'n pysis a wortos pella, ny assentyas, 21mes ow kasa farwell ev a leveris, ‘Dos dhywgh arta a wrav, mar mynn Duw’; hag ev a woelyas dhiworth Efesus.

22Pan dhothya dhe Sesarea, ev eth yn-bann ha salusi an eglos, hag ena ev eth yn-nans dhe Antiogh, 23ha pan spensa termyn ena, ev eth yn-rag a le dhe le dre bow Galatia hag ena dre Frygia, ow krevhe an dhyskyblon oll.

Apollos yn Efesus

24Hag y teuth dhe Efesus unn Yedhow henwys Apollos, genesik a Aleksandria, gour freth ha skentel y'n skryptors. 25Ev re bia dyskys yn fordh an Arloedh, ha gwresek y spyrys ev a gewsi ha dyski yn kewar an taklow a-dro dhe Yesu, kyn hwodhva unnsel besydh Yowann; 26hag ev a dhallathas kewsel yn hardh y'n synaga; ha pan y'n klewas Priskilla hag Akwila, i a'n kemmeras ha styrya moy kewar dhodho fordh Duw. 27Ha pan vynnas ev mos yn Aghaia, an vreder a'n kennerthas hag i a skrifas dhe'n dhyskyblon may hwrellens y wolkomma; hag ev devedhys, ev a weresas meur an re a wrussa krysi dre ras, 28rag gans nerth ev a argyas orth an Yedhewon a-rag an bobel, ow kul prov der an skryptors bos Yesu an Krist.