Powl yn Efesus

1Lemmyn dell hwarva, hag Apollos yn Korinth, Powl a dremenas der an ranndiryow ughella ha dos dhe Efesus, may kavas dyskyblon, 2hag ev a leveris dhedha, ‘A gemmersowgh hwi an Spyrys Sans pan gryssowgh?’ Hag yn-medhons i dhodho, ‘Hwath ny glewsyn ni mars eus Spyrys Sans.’ 3Hag yn-medh ev, ‘Yn py besydh, ytho, a vewgh hwi besydhys?’ I a leveris, ‘Yn besydh Yowann.’ 4Ha Powl a leveris, ‘Yowann a besydhyas gans an besydh a edrek, ow leverel dhe'n bobel may kryssens ynno ev neb esa ow tos war y lergh, henn yw, yn Yesu.’ 5Pan glewsons hemma, i a veu besydhys yn hanow an Arloedh Yesu. 6Ha Powl ow korra y dhiwla warnedha, an Spyrys Sans a dheuth warnedha, hag i a dhallathas kewsel yn tavosow ha profoesa. 7Yth esa anedha a-dro dhe dhewdhek gour yn somm.

8Ev a entras y'n synaga ha dres tri mis ev a gewsi yn hardh, ow tadhla hag owth assaya aga dri dhe gryjyans a-dro dhe wlaskor Duw. 9Mes drefenn bos re anedha penn-kales ha diskryjyk, ow kewsel drog a-dro dhe'n Fordh a-rag an routh, ev a omdennas dhiworta hag ow kemmeres an dhyskyblon ganso, yth esa ow tadhla pub dydh yn skol Tyrannus. 10Hemma eth yn-rag dres diw vlydhen, may klewas oll trigoryon Asia ger an Arloedh, ha Yedhewon ha Grekys.

Mebyon Skeva

11Ha Duw a wrug oberow marthys dres eghenn dre dhiwla Powl, 12may hwarva, pan veu dres dhe'n glevyon lienyow-dorn po apronyow ha re bia orth y groghen, aga klevesow a's gasas hag yth eth an drog spyrysyon yn-mes anedha. 13Mes re a'n hudoryon yedhowek gwandrek a assayas gelwel war hanow an Arloedh dres an re na hag ynna drog spyrysyon, ow leverel, ‘My a'th charj dre Yesu neb yw pregewthys gans Powl.’ 14Yth esa dhe unn Skeva, Yedhow hag arghoferyas, seyth mab esa ow kul hemma, 15ha'n drog spyrys a worthybis ha leverel dhedha, ‘Yesu devri a aswonnav, ha Powl a gonvedhav, mes piw owgh hwyhwi?’ 16Ha'n den hag ynno an drog spyrys a lammas warnedha, ow kul maystri warnedha ha'ga fetha, may fisons yn-mes a'n chi na, noeth ha goliys. 17Ha hemma a dheuth ha bos godhvedhys dhe vyns o trigys yn Efesus, ha Yedhewon ha Grekys, hag own a goedhas warnedha oll, ha hanow an Arloedh Yesu a veu meurhes. 18Ha meur a'n re neb a grysis a dheuth ha yes ha derivas aga oberow. 19Ha niver da a'n re neb a wre pystri a guntellas aga lyvrow ha'ga leski a-rag an bobel oll; hag i a reknas an pris anedha, hag yth o hanter-kans mil vath a arghans. 20Y'n for' ma ger an Arloedh a gressyas meur hag a veu nerthek.

An Tervans yn Efesus

21Pan veu kollenwys an taklow ma, ervirys o Powl yn y spyrys mos dhe Yerusalem, ow tremena dre Makedonia hag Aghaia, hag ev a leveris, ‘Wosa mos di, y koedh dhymm gweles Rom ynwedh.’ 22Ha wosa dannvon dew a'y venysters, Timothi hag Erastus, yn Makedonia, ev a wortas pols yn Asia.

23Lemmyn yth esa a-dro dhe'n termyn na meur a dros a-dro dhe'n Fordh. 24Rag unn gour henwys Demetrius, gweythor arghans, a wre templow Artemis a arghans, hag ev a dhre gwayn da dhe'n greftoryon. 25Ev a guntellas an re ma, ha gansa an weythoryon yn ober a'n par na, hag yn-medh ev, ‘Gwer, hwi a gonvedh ni dhe gavoes agan pygans dhiworth an ober ma, 26ha lemmyn, dell welowgh ha klewes, hag yn Efesus keffrys hag yn oll Asia ogasti, an Powl ma re dreylyas ha dynya routh veur, ow leverel a-dro dhe dhuwow gwrys gans diwla, nag yns duwow mann. 27Lemmyn yma peryll agan kreft dhe gelli y hanow da, mes ynwedh y fydh tempel an dhuwes veur Artemis akontys heb bri, mes moy es henna, y fydh hy braster lehes, neb yw gordhys gans oll Asia ha'n bys.’

28Pan glewsons hemma, ha lenwys a gonnar, i a skrijas, ‘Meur yw Artemis an Efesianys.’ 29Ha'n sita a veu lenwys a dheray, hag yn keskolonn i a fyskas y'n wariva, ow talghenna Gayus hag Aristarghus, tus a Makedonia, kowetha vyaj Powl. 30Powl a vynnas entra yn kuntelles an bobel, mes ny ros an dhyskyblon kummyas dhodho. 31Re a'n Asiarghow, neb o y gowetha, a dhannvonas dhodho, orth y ynnia na vettha y honan mos y'n wariva. 32Re a arma unn dra, re a arma neppyth arall, rag yth esa an kuntelles yn deray, ha ny wodhya an rann vrassa anedha prag yth omguntellsens. 33Re a'n routh a ros gorhemmynnow dhe Aleksander, neb re bia herdhys yn-rag gans an Yedhewon; hag Aleksander, ow kwevya y leuv, a vynnas styrya an dra dhe'n kuntelles. 34Mes pan konvedhsons y vos Yedhow, i a skrijas, unys aga lev, dres moy es dew our, ‘Meur yw Artemis an Efesianys.’ 35Ha wosa koselhe an routh, skrifennyas an sita a leveris, ‘Gwer Efesus, piw eus na woer bos sita an Efesianys gwithyas tempel an Artemis veur ha'y imaj a goedhas dhiworth nev? 36Drefenn bos an taklow ma heb aga nagha, res yw dhywgh bos kosel heb gul travyth diswar. 37Hwi re dhros an wer ma nag yns ladron a demplys na ny wrussons blasfemi orth agan19:37 agan: War-lergh re a'n dornskrifow agas. duwes. 38Rakhenna, mars eus dhe Demetrius ha'n greftoryon ganso krodhvol war nebonan, igerys yw an breuslysyow, hag yma prokonsuls: drens kuhudhans an eyl erbynn y gila. 39Mar hwilowgh neppyth moy, ervirys vydh y'n kuntelles lafyl. 40Rag yn tevri, yth eson ni yn peryll a guhudhans drefenn an tervans gwrys hedhyw, heb skila hag a yllyn ni ri rag an kuntellyans direwl ma.’ 41Pan lavarsa hemma, ev a dhannvonas dhe-ves an kuntelles.19:41 War-lergh an Vulgat gwers 41 yw rann a wers 40.