Devones an Spyrys Sans

1Pan dhothya dy' Fenkost, yth esens i oll war-barth y'n keth tyller, 2hag a-dhesempis y teuth mes a nev tros kepar ha gwyns nerthek ha hwyflyn, hag ev a lenwis oll an chi mayth ens esedhys, 3ha tavosow kepar ha tan a omdhiskwedhas dhedha, lesrynnys hag ow powes war bub huni anedha, 4hag i oll a veu lenwys a'n Spyrys Sans ha dalleth kewsel yn yethow erell, dell ros an Spyrys dhedha galloes dhe gewsel.

5Lemmyn yth esa trigys yn Yerusalem Yedhewon, gwer gryjyk a bub kenedhel yn-dann nev; 6ha pan hwarva an tros ma, an routh a dheuth war-barth, ha penndegys ens drefenn pub huni dh'aga klewes ow kewsel yn y yeth y honan. 7Ha sowdhenys vons, ha marth a's teva, hag i a leveris, ‘Otta, a nyns yw oll an re ma neb usi ow kewsel tus a Alile? 8Ha fatell glew pub huni ahanan yn y yeth teythyek y honan? 9Tus a Parthia ha Medys hag Elamitys, ha trigoryon a Mesopotamia, Yudi ha Kappadokia, Pontus hag Asia, 10Frygia ha Pamfylia, Ejyp ha rannvroyow Libya ryb Kyrene, ha godrigoryon a Rom, 11ha Yedhewon ha proselytys, tus a Kreta hag Arabyon, ni a's klew ow kewsel yn agan yethow a oberow meur Duw.’ 12Ha marth o gansa i oll, ha sowdhenys ens, ow leverel an eyl dh'y gila, ‘Pyth yw an styr a hemma?’ 13Mes re erell, ow kul ges, a leveris, ‘Lenwys a win nowydh yns.’

Areth Peder

14Mes ow sevel gans an unnek, Peder a dhrehevis y lev hag arethya orta, ‘Gwer Yudi ha myns eus trigys yn Yerusalem, bedhes hemma godhvedhys dhywgh, ha goslowewgh orth ow lavarow. 15Rag nyns yw an re ma medhow, dell dybowgh, rag tressa eur an jydh yw, 16mes hemm yw an pyth a veu kewsys der an profoes Yoel,

17“Hag y fydh y'n dydhyow diwettha, yn-medh Duw,

my a dhinwa a'm Spyrys war gig oll,

ha'gas mebyon ha'gas myrghes a wra profoesa

ha'gas gwer yowynk a wra gweles gwelesigethow

ha'gas gwer goth a wra hunrosa hunrosow;

18war ow hethyon ha'm kethesow my a dhinwa a'm Spyrys

y'n dydhyow na,

ha profoesa a wrons i.

19Ha my a dhiskwedh marthusyon y'n nev a-vann,

hag toknys y'n norvys a-woeles,

goes ha tan hag ethenn mog.

20An howl a vydh treylys dhe dewlder ha'n loer dhe woes

kyns dos dydh meur ha splann an Arloedh;

21hag ena myns a gri war hanow an Arloedh a vydh selwys.”

22‘Gwer Ysrael, klewewgh an geryow ma: Yesu a Nazareth, gour kommendys dhywgh gans Duw, gans oberow galloesek ha marthusyon hag toknys hag a wrug Duw dredho yn agas mysk, dell wodhowgh hwi agas honan, 23an keth hemma, daskorrys herwydh towl fyrv ha ragwodhvos Duw, hwi a'n kemmeras, dre dhiwla tus a-ves dhe'n lagha, ha'y ladha, orth y fastya y'n grows, 24Duw a'n drehevis, ow lowsya gloesow ankow, rag ny yllys ev dhe vos synsys ganso. 25Rag yn-medh Davydh anodho,

“My a welas an Arloedh prest a-dheragov,

drefenn y vos ev a'm parth dhyghow ny vydhav kryghyllys.

26Rakhenna heudhik o ow holonn hag ow thaves a lowenhas;

keffrys ow hig a wra triga yn govenek;

27rag ny vynnydh gasa ow enev yn ifarn

na ri dha Sans dhe weles podredhes.

28Ty re dhiskwedhas dhymm an fordhow a vewnans;

ty a'm lenow a heudhder gans dha wolok.”

29‘Breder, gans fydhyans y hallav kewsel orthowgh a-dro dhe Davydh an ugheldas, ev dhe verwel ha bos ynkleudhys, hag yma y vedh genen ni bys y'n jydh hedhyw. 30Rakhenna, ow pos profoes hag ow kodhvos y tos Duw dhodho y hwre ev settya frut y dhiwglun war y se, 31ev a ragwelas ha kewsel a-dro dhe dhasserghyans Krist,

“Ny veu gesys yn ifarn,

ha ny wrug y gig gweles podredhes.”

32Duw a dhrehevis an Yesu ma, ha dhe henna ni oll yw dustunioryon; 33rakhenna, ughelhes dhe'n barth dhyghow dhe Dhuw, pan dhegemmersa dhiworth an Tas dedhewadow an Spyrys Sans, ev a dhinewis hemma hag a welowgh hag a glewowgh. 34Rag ny yskynnas Davydh dhe'n nevow, mes yn-medh ev y honan,

“An Arloedh a leveris dhe'm Arloedh vy,

‘Esedh a'm parth dhyghow

35erna worriv dha eskerens avel skavell-droes rag dha dreys.’ ”

36Rakhenna, godhvydhes oll chi Ysrael diogel, Duw re'n gwrug hag Arloedh ha Krist, an keth Yesu ma a growssowgh hwi.’

An Dus Kynsa Neb a veu Treylys

37Pan glewsons hemma, gwenys vons y'n golonn, hag i a leveris dhe Peder ha dhe'n abesteli erell, ‘Breder, pandr'a wren ni?’ 38Hag yn-medh Peder dhedha, ‘Kemmerewgh edrek, ha bedhes besydhys kettep penn ahanowgh yn hanow Yesu Krist rag gevyans agas peghosow, ha hwi a wra degemmeres ro an Spyrys Sans. 39Rag yma'n dedhewadyow dhywgh hwi ha dh'agas fleghes ha dhe'n re usi pell, myns a alwo an Arloedh agan Duw dhodho.’ 40Ha gans meur a eryow erell ev a dhug dustuni ha'ga ynnia, ow leverel, ‘Bedhewgh selwys a'n henedh gorth ma.’ 41Ytho, an re a wolkommas y er a veu besydhys, hag y'n jydh na y feu keworrys a-dro dhe dri mil a enevow; 42hag yth esens ow pesya yn dyskas an abesteli hag y'n kowethyans, yn terri an bara hag yn pysadow.

43Hag own a dheuth dhe bub enev; ha meur a varthusyon hag toknys a hwarva der an abesteli. 44Yth esa oll an gryjygyon war-barth, ha pup-tra a's tevo yn kemmyn; 45hag i a wertha aga fythow ha'ga gwara, hag i a's ranna dhe beub oll, dell esa edhomm dhe nebonan. 46Ha pub dydh oll ow pesya yn tiwysyk ha keskolonn y'n tempel, hag ow terri bara yn aga chiow, i a gevrenna boes, heudh ha sempel aga holonnow, 47ow kormel Duw hag ow kavoes bodh da an bobel oll. Ha pub dydh an Arloedh a geworra dh'aga somm an re o selwys.