Powl A dhe Makedonia ha Pow Grek

1Pan hedhis an freudh, Powl a elwis war-barth an dhyskyblon ha'ga hennertha, ha wosa gasa kummyas anedha ev eth yn-rag dhe Makedonia. 2Hag ev ow mos der an ranndiryow, ev a's kennerthas gans lies ger, hag ev a dheuth yn Pow Grek, 3may spenas tri mis. Hag ev parys dhe woelya dhe Syria, bras a veu gwrys er y bynn gans an Yedhewon, hag ev a erviras dehweles dre Makedonia. 4Hag yth eth ganso Sopater mab Pyrrhus a Berea, Aristarghus ha Sekundus a Thessalonika, Gayus a Derbe, Timothi, ha Tyghikus ha Trofimus a Asia. 5An re ma eth yn-rag ha'gan gortos yn Troas; 6ha ni a woelyas dhiworth Filippi wosa dydhyow an bara heb goell, ha kyns penn pymp dydh ni a dheuth dhedha yn Troas, may hwortsyn seyth dydh.

Farwell Powl gans Troas

7Y'n kynsa dydh a'n seythun, pan omguntellsyn rag terri bara, yth esa Powl ow kewsel orta; drefenn y vos ervirys mos dhe-ves ternos, ev a besyas kewsel bys yn hanter-nos. 8Lemmyn yth esa lies lugarn yn stevell y'n soler mayth en ni kuntellys. 9Hag unn gour yowynk henwys Ewtyghus, esa owth esedha y'n fenester, eth ha bos fethys dre gosk down ha Powl ow kewsel pella. Fethys dre gosk, ev a goedhas yn-nans dhiworth an tressa leur hag ev a veu kemmerys yn-bann yn farow. 10Mes Powl eth yn-nans hag omblegya dresto, hag orth y wrynya ev a leveris, ‘Na vedhewgh yn ankres, rag yma y vewnans ynno.’ 11Ena Powl a yskynnas ha wosa terri an bara ha dybri, ev a besyas keskewsel bys yn bora; ena ev eth yn-mes. 12Hag i a dhros dhe-ves an gour yowynk yn few, ha konfortys meur ens i.

An Vyaj dhiworth Troas dhe Miletus

13Ni eth yn-rag dhe'n gorhel ha goelya dhe Assos, mayth esa war agan towl dri Powl y'n gorhel, rag yndella ev re ordensa, ervirys mos di war droes. 14Lemmyn pan vetsyn orto yn Assos, ni a'n dros y'n gorhel ha dos dhe Mitylene. 15Ha ternos ow koelya alena ni a dheuth a-dal Kios, ha'n jydh ow siwya ni a dremenas ogas dhe Samos, ha ternos ni a dheuth dhe Miletus. 16Rag Powl re ervirsa goelya dres Efesus, ma na spenna termyn yn Asia; rag yth esa ow fistena, mar kalla bos yn Yerusalem erbynn dy' Fenkost.

Powl a Gews orth an Henavogyon yn Efesus

17Dhiworth Miletus ev a dhannvonas dhe Efesus, ow kelwel henavogyon an eglos. 18Ha pan dheuthons dhodho, ev a leveris dhedha:

‘Hwi a woer, dhiworth an kynsa dydh may teuth vy yn Asia, fatell o genev pup-prys ha my genowgh, 19ow servya an Arloedh gans pub uvelder ha dagrow, ha prevyansow a goedhas warnav dre vrasow an Yedhewon, 20ha my heb hokya ow terivas pup-tra o dhe les dhywgh, hag orth agas dyski a-rag tus hag y'n chiow, 21hag ow tustunia keffrys dhe Yedhewon ha dhe Grekys a-dro dhe edrek a-rag Duw ha fydh yn agan Arloedh Yesu. 22Lemmyn otta, kelmys gans an Spyrys, yth esov vy ow mos dhe Yerusalem, heb godhvos an pyth a wra dos er ow fynn ena, 23marnas an Spyrys Sans a dheg dustuni dhymm yn pub sita, ow leverel bos kolmow ha galarow orth ow gortos. 24Mes ny akontyav ow bewnans a vri vyth dhymmo vy, unnweyth a kallen kowlwul ow resegva, ha'n menystrans a dhegemmeris dhiworth an Arloedh Yesu, rag doen dustuni dhe'n aweyl a ras Duw.

25‘Ha lemmyn otta, my a woer na vydh nagonan ahanowgh ow kweles ow fas na fella, mayth yth vy a-derdro yntredhowgh ow pregoth an wlaskor.20:25 an wlaskor: War-lergh re a'n dornskrifow wlaskor Duw. 26Rakhenna my a dheg dustuni dhywgh y'n jydh hedhyw ow bos glan a woes tus oll; 27rag ny omwithis vy rag derivas dhywgh oll an gusul a Dhuw. 28Kemmerewgh with a'gas honan hag a'n para oll ma'gas gorras an Spyrys Sans avel gorwoelysi rag bugelya eglos Duw20:28 eglos Duw: War-lergh re a'n dornskrifow eglos an Arloedh., a waynyas der y woes y honan. 29My a woer y teu wosa ow mones dhe-ves bleydhi gwyls, heb sparya an para, 30hag yn-mes a'gas mysk agas honan gwer a sev ow kewsel taklow gorth rag tenna dhe-ves an dhyskyblon war aga lergh. 31Rakhenna bedhewgh war, ow perthi kov na astelas vy keski pub huni dres teyr blydhen nos ha dydh, gans dagrow. 32Ha lemmyn my a'gas kommend dhe Dhuw ha dhe er y ras, a yll drehevel ha ri an eretons yn mysk oll an re sanshes. 33Ny hwensis vy arghans nag owr na dillas denvyth; 34hwi agas honan a woer an dhiwla ma dhe venystra dhe'm edhommow vy hag edhommow an re esa genev. 35Yn pup-tra my a dhiskwedhas dhywgh, y telledh, ow lavurya yndella, sokra an re wann ha perthi kov a eryow an Arloedh Yesu, dell leveris ev, “Moy gwynnvys yw ri ages degemmeres.” ’

36Ha pan lavarsa an taklow ma, ow mos war benn-dewlin gansa oll, ev a bysis. 37Hag yth esa meur a oelva gans oll, hag ow koedha war gonna Powl i a ammas dhodho, 38duwenhes a'n moyha drefenn an pyth a lavarsa, na welens y fas arta. Hag i a'n hembronkas dhe'n gorhel.