Vyaj Powl dhe Yerusalem

1Lemmyn dell hwarva, ha ni omdennys dhiworta, ni a woelyas, ow siwya resegva gewar dhe Kos, ha ternos dhe Rhodos hag alena dhe Patara. 2Pan gavsen gorhel parys dhe vos dres an mor dhe Fenikia, ni eth a-bervedh ha goelya. 3Hag owth aspia Kyprus hag orth y asa a'n barth kledh, ni a woelyas dhe Syria ha dos yn-nans dhe Tyr drefenn bos res dhe'n gorhel diskarga ena. 4Hag ow kavoes an dhyskyblon ni a wortas ena seyth dydh. Der an Spyrys i a leveris dhe Powl nag ella yn-bann dhe Yerusalem. 5Mes, ha'gan dydhyow ena diwedhys, ni eth alena ha pesya yn agan vyaj, i oll gans aga gwragedh ha'ga fleghes orth agan hembronk yn-mes a'n sita. Ena ni eth war benn-dewlin y'n treth ha pysi 6ha gasa farwell an eyl gans y gila ha mos a-bervedh y'n gorhel, hag i a dhehwelis tre.

7Pan gowlwrussen an vyaj dhiworth Tyr, ni a dheuth dhe Ptolemais, may salussyn an vreder ha gortos gansa unn jydh. 8Ha ternos ni eth yn-rag ha dos dhe Sesarea, ha ni eth yn chi Felip an aweyler, onan a'n seyth, ha triga ganso. 9Lemmyn yth esa dhe'n gour ma peder myrgh, gwyrghesow neb a brofoesa. 10Ha wosa ni dhe driga ena lies dydh, unn profoes henwys Agabus a dheuth yn-nans dhiworth Yudi, 11hag ev a dheuth dhyn, hag ow kemmeres grogys Powl ev a omgolmas er an dreys ha'n dhiwla ha leverel, ‘Yndellma y lever an Spyrys Sans, “Y'n for' ma an Yedhewon yn Yerusalem a wra kelmi an gour a bew an grogys ma, hag i a wra y dhelivra yn leuv an Jentilys.” ’ 12Ha pan glewsyn an taklow ma, ha ni ha trigoryon an tyller na a'n pysis nag ella yn-bann dhe Yerusalem. 13Ena Powl a worthybis, ‘Pandr'a wrewgh hwi, owth oela ha treghi ow holonn? Rag parys ov vy dhe vos kelmys keffrys ha merwel yn Yerusalem a-barth hanow an Arloedh.’ 14Ha pan na yllsyn y lesta, ni a dewis wosa leverel, ‘Re bo gwrys bodh an Arloedh.’

15Wosa an dydhyow ma, ni a ombareusis ha mos yn-bann dhe Yerusalem. 16Ha re a'n dhyskyblon a Sesarea eth genen ynwedh, orth agan hembronk dhe ji Mnason, den a Kyprus, dyskybel dhiworth an dalleth, may trikken ganso.

Powl A dhe Yerusalem dhe Weles Jamys

17Ha ni yn Yerusalem, an vreder a'gan degemmeras yn lowen. 18Ha ternos Powl a entras genen dhe Jamys, hag oll an henavogyon a dheuth. 19Wosa aga salusi ev a dherivas onan hag onan an taklow re wrussa Duw yn mysk an Jentilys der y venystrans ev. 20Pan glewsons, i a wordhyas Duw, ha leverel dhodho, ‘Ty a wel, broder, fatell eus lies mil yn mysk an Yedhewon neb re grysis, hag i oll yw diwysyk rag an lagha; 21hag a-dro dhis y feu derivys dhedha ty dhe dhyski oll an Yedhewon trigys yn mysk an Jentilys nagh a Moyses, ow leverel dhedha ma na drodrogghens an fleghes na kerdhes herwydh an devosow. 22Ytho, pyth eus dhe wul? Yn neb kas i a wra klewes dha vos devedhys. 23Rakhenna, ty gwra an pyth a leveryn dhis. Yma dhyn peswar gour re wrug ambos; 24kemmer an re ma, ha bydh purhes gansa ha pe may hallons treghi aga gols, ha pubonan a wra godhvos nag eus travyth y'n pyth re beu derivys y'th kever, mes ty dha honan dhe vewa ow kwitha an lagha. 25Hag a-dro dhe'n Jentilys neb re grysis, ni re skrifas lyther, ow ri agan ervirans y koedh dhedha omwitha rag an pyth re beu sakrifiys dhe idolys ha rag goes ha rag an pyth re beu tegys ha rag dijastita.’ 26Ena Powl a gemmeras an wer, ha ternos pan re bia purhes, ev hag i war-barth, ev eth y'n tempel, dhe ri avisyans pan vedha an dydhyow a lanheans kowlwrys, ha'n offrynn gwrys a-barth pub huni anedha.

Powl Dalghennys y'n Tempel

27Lemmyn, pan veu ogas kowlwrys an seyth dydh, an Yedhewon dhiworth Asia, orth y weles y'n tempel, a worras yn deray oll an routh, ha'y dhalghenna, 28ow karma, ‘Gwer Ysrael, gweresewgh! Hemm yw an den usi ow tyski dhe bubonan yn pub le erbynn an bobel ha'n lagha ha'n tyller ma, ha moy es henna, ev re dhros Grekys y'n tempel hag ev re dhisakras an tyller sans ma.’ 29Rag i re welsa kyns Trofimus, den a Efesus, y'n sita ganso, hag i a dybis y hwrussa Powl y dhri y'n tempel. 30Hag oll an sita a veu movyes, ha'n bobel a fyskas war-barth, hag ow settya dalghenn yn Powl i a'n tennas yn-mes a'n tempel, hag a-dhistowgh an darasow a veu deges. 31Hag i owth assaya y ladha, derivadow a dheuth dhe dribun an kohort bos oll Yerusalem yn deray; 32hware ev a gemmeras soudoryon ha pennow-kangour ha poenya yn-nans dhedha; hag ow kweles an tribun ha'n soudoryon i a astelas gweskel Powl. 33Ena ow tos nes, an tribun a settyas dalghenn ynno ha gorhemmynna may fe kelmys gans dew jayn, ha govynn piw o, ha pyth re wrussa. 34Re y'n routh a armas unn dra, ha re neppyth ken, ha rag na allas dysmygi travyth sertan drefenn an tervans, ev a worhemmynnis may fe hembrenkys y'n kastell. 35Hag ev devedhys y'n gradhow, res o dhodho bos degys gans an soudoryon drefenn nerth an routh; 36rag an routh a dus a siwya ow karma, ‘Dhe-ves ganso!’

Powl a Bled y Gen

37Hag ev ow pos hembrenkys y'n kastell, yn-medh Powl dhe'n tribun, ‘Eus kummyas dhymm dhe leverel neppyth dhis?’ Hag yn-medh ev, ‘A wodhesta kewsel Greka? 38Ytho, a nyns osta an Ejyptyan neb a wrug rebellyans a-gynsow ha ledya yn-mes y'n gwylvos an peswar mil wer a'n Sikariow?’21:38 Sikariow: Po Assassinyow. 39Ha Powl a leveris, ‘Yedhow a Tarsus yn Kilikia ov vy, burjes a sita nag yw isel, ha my a'th pys, gas vy dhe gewsel orth an bobel.’ 40Pan rosa kummyas, Powl ow sevel y'n gradhow a wrug sin dhe'n bobel gans y leuv. Pan esa taw meur, ev a arethyas dhedha yn Ebrow, ow leverel: